Umiatsiaaqqanut tapiissutit atorluarneqartut

Namminersorlutik Oqartussat aamma EU-p akornanni aalisarnikkut suleqatigiinnissamik isumaqatigiissutaannut atatillugu, atortulersoriikkamik, tassani sillimaniarnermut atortut ilanngullugit, inuussutissarsiutinik siuarsaanissaq siunertaralugu, nutaamik 6 miiterit ataallugu angitigisumik umiatsiaarartaarnissamut, ukiut tamaasa tapiisoqartarpoq. Tapiissutit sumiiffinni allatigut inuussutissarsiutitigut periarfissarpassuaqanngitsuni umiatsiaararsortunut ikorfartuinissamut periarfissiinissamik siunertaqarput. Tapiiffigineqartussanik pingaarnersiuilluni tulleriiaarinermi piffiit aalisarnissamut periarfissakitsut salliutillugit tapiiffigineqartarput. Periarfissaq taanna pitsaasuusoq aammalu atorluarneqartoq umiatsiaararsortut tapiiffigineqarsimasut kiisalu Kalaallit Nunaanni Aalisartut Piniartullu Kattuffiat, KNAPK, oqarput.

Soqutigineqarluartoq

Nunap immikkoortuini Qaanaami, Tunumi Kujataanilu Paamiuniit kujammut, umiatsiaararsortut annikinnerusumik isertitaqartartut misilittakkat takutippaat. Sumiiffinni pineqartuni atortulersoriikkamik umiatsiaarartaarnissamut 84 procentit tapiissutigineqartarlutillu Kalaallit Nunaata sineriaata sinnerani umiatsiaararsortunut 75 procentit tapiissutigineqartarput. Umiatsiaarartaarnissamut tapiissutit umiatsiaararsortup imminnut pilersorsinnaanissaanut qulakkeerinnittuussapput, qinnuteqaatillu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit suliarineqartarput. Inuussutissarsiutinik siuarsaanissamut, tassa nutaamik umiatsiaarartaarnissamut, siorna 2,9 millionit koruunit missaat aningaasaliissutigineqarput, qinnuteqartunillu piumasaqaatinik naammassinnissimasunit 20-sunit aqqanillit akuerineqarput. Ukioq manna tapiissutit 3,4 millionit koruunit missaanniipput, qinnuteqartuniillu 46-sunit 13-it tapiiffigineqarlutik. 

Qinnuteqartartut amerliartortut

Sumiiffinni inuussutissarsiornikkut periarfissakinnerusuni nutaamik umiatsiaarartaarnissaq siunertaralugu aningaasanik ileqqaarnissaq ajornartorsiutaasartoq KNAPK-p siulittaasua Pele Blytmann oqarpoq.

- Isorliunerusuni sumiiffiit ilaanni aalisakkeriveqanngitsuni piniarnerinnaq inuussutissarsiutaasarpoq, taakkunanilu umiatsiaararsortut nutaamik umiatsiaarartaarnissaminnut piuniutinilluunniit nutarterinissaminnut ileqqaarnissaat ajornakusoortarpoq. 

- Amerlanerujartortullu qinnuteqarfissaq ilikkariartormassuk tamanna qujanarpoq, taanna oqarpoq.

Namminersorlutik Oqartussat aamma EU-p akornanni aalisarnikkut suleqatigiinnissamik isumaqatigiissutaannut atatillugu, umiatsiaarartaarnissamik qinnuteqarnissamut periarfissaq pitsaalluinnartoq, siunissamilu ataavartumik atuutsinneqarnissaa pisariaqartoq, KNAPK-p siulittaasua isumaqarpoq.

Annertuumik iluaqutaasoq

Siorapaluk 30-it sinnilaarlugit inoqartoq, Qaanaamiillu 50 kilometerit missaannik avannarpasinnerusumiittoq, Kalaallit Nunaanni nunaqarfiit avannarpasinnersaraat. Nunaqarfimmi aalisakkeriveqanngilaq, piniarnerlu pingaarnertut inuussutissarsiutaavoq. Maassannguaq Oshima Siorapalummi piniartuuvoq, taassumalu oqarnera naapertorlugu nunaqarfimmi umiatsiaararsortut ukioq kaajallallugu aalaakkaasumik isertitaqarnissaminnut periarfissaqanngillat. Siorapalummi piniartut marluk nutaamik umiatsiaarartaarnissamut ukioq manna tapiiffigineqarput. Maassannguaq Oshima 2015-imi nutaamik umiatsiaarartaarnissamut tapiiffigineqarpoq, tamanna aningaasanik isertitaqarniarnikkut iluaqutigilluarsimallugu taassuma oqaatigaa. 

- Qaanaap Qeqertallu eqqaani sikukkut qimussimik qaleralinniarneq ukiuunerani taamaallaat ingerlasarpoq, aasaaneranilu piniarnerinnaq inuussutissarsiutaasarluni.

- Poca 550-imik 90-inik motorilimmik 2015-imi umiatsiaarartaarnikuuvunga, tamatumalu kingunerisaanik ungasinnerusumut piniariarsinnaalerkuullunga, taanna oqarpoq.

Savissivimmi piniartoq Gabriel Halsøe nutaamik umiatsiaarartaarnissamut tapiissutinik siullermik 2011-imi pissarsivoq, ukiorlu manna qinnuteqaataa aamma akuerineqarpoq.

- Poca 550 115-nik motorilik 2011-mi pisaaraara, taakkulu inuussutissarsiorninnut assut iluaqutaasimapput. Kisianni motoriiarnikuugama ukioq manna qinnuteqaqqikkama nutaamik umiatsiaarartaarnissannut aamma akuerisaavunga.

- Nunaqarfimmi aalisakkeriveqanngimmat piniarnerinnerinnarlu inuussutissarsiutaammat nutaamik umiatsiaartaarnissamut motoritaarnissamulluunniit ileqqaaruteqarnissaq ajornakusoorpoq.

- Taamaammat nutaamik umiatsiaartaarnissamut periarfissaq isorliunerusuni najugalinnut assut iluaqutaavoq, taanna oqarpoq.

Gabriel Halsøe umiatsiaarartaarnissamut 84 procentimik tapiiffigineqarpoq. Piffissamili kingullermi motooriaaqqaninni pissutigalugu umiatsiap nalingata sinnera maannakkut akilersinnaanngikkallarlugu taassuma oqaatigaa. Aningaasalli pissarsiarinissaannut piffissamik periarfissinneqarsimalluni taassuma erseqqissaatigaa.