Uuliasioqatigiiffiit akuersissuteqaratik atortunik nussuisimanerata kingunerisaanik mianersoqqussummik tunineqartut

Berigtigelse: BlueWest Helicopters er ikke involveret i Greenland Energy Company opgaveløsning, og var i Nerlerit Nunaat for en anden klient i området. 

Tunumi innuttaasut piffissami qaninnermi paasivaat, kalittaat Bestla atortunik oqimaatsunik containerinillu prammimik usilersorsimasoq Nunap Qeqqani Nerlerit Inaannut tikissimasoq.

Permagreenip nutaarsiassaqartitsivimmut Danwatchimut uppernarsarpaa Greenland Energy Companymit aamma 80 Mile-imit Nunap Qeqqani uuliasiornermut atortorissaarutit atorneqartussat, assartorneqarneri isumagisaralugit.

"Aap, Greenland Energy kalittakkanik praminillu ikioripput uppernarsarsinnaavara. Maskiinat atortullu Nunap Qeqqani uuliasiornermi atorneqartussat pineqarput", Jeppe Steffensen Permagreenimi pisortaaneq oqarpoq. Akuersissutinut apeqqummut tunngatillugu Greenland Energy Companymut saaffiginninnissaq kajumissaarutigaa.

Mianersoqqussut

Uuliasioqatigiiffiit "akuersissummik sunnguamilluunniit peqanngitsut“, atortorissaarutillu Dundasimit tigusimasaat nunamut ikkussuinissamut akuersissutaat qaangiussimasoq, Inuussutissarsiornermut aatsitassanullu naalakkersuisoqarfimmi pisortaq Jørgen Hammeken-Holm oqarpoq.

Taamaattumik naalakkersuisoqarfik tusagassiutitigut nalunaaruteqarpoq. Ingerlatseqatigiiffiillu "sakkortuumik mianersoqquneqarput“, assartuinermullu tunngasut tamarmik siunissami suliarineqannginneranni, aatsitassanut oqartussaasunut nalunaarutigineqaqqaartariaqarneranik akuerineqaqqaartariaqarnerannillu oqariartuuteqarluni.

Tusagassiutitigut nalunaarut naapertorlugu atortorissaarutit pineqartut tassaapput siornatigut Dundasimiit Tasiilamut assartorneqarsimasut. Bluejay Miningip Ilmenit-imi suliniutaanut atatillugu atortorissaarutit atorneqarsimapput, tassanilu Greenland Energy Companyp aamma 80 Milep pisortaat Roderick Mcillree siuttuusimavoq. Naalakkersuisoqarfik naapertorlugu atortorissaarutit 2025-mi Dundasimit Tasiilamut nuunneqarneranni piginnittoq akuersissummik peqarsimavoq, akuersissulli taanna maanna qaangiussimalersoq maannakkorpiarlu suliarineqaqqittoq ilisimatitsissutigineqarpoq.

Immikkut killiliisoqartariaqarnersoq nalilersimallugu, taamaattorli Nerlerit Inaanni pissutsit ajunngitsutut isikkoqarnerat pissutigalugu atortunik Tasiilamut assartuisoqarnissaanik piumasaqarnissaq ingasaassinerunngitsoq, Naalakkersuisoqarfik ilisimatitsivoq.

Pisortaaneq utoqqatserpoq

Greenland Energy Companyp aamma 80 Milep pisortaat Roderick McIllree Sermitsiamit oqaloqatigineqarpoq. Taassuma pisoq ajuusaarutigaa, atortullu akiliuteqarlutik Greenland Airportsip Nerlerit Inaanni toqqorsivianiisissinnaallugit ingerlatseqatigiiffik isumaqarsimagaluarpoq.

- Ilisimavarput atortorissaarutit akuersissummik pigisatsinni, inissinneqarnissaannut akuersissuteqarnissaq pisariaqartoq, isumaqarsimagaluarpugulli atortorissaarutit Tasiilamiit mittarfiup eqqaanut sapaatip-akunneranut 15.000 dollarinik akiliuteqartarnikkut, nuunneqarsinnaasut. Taamaammat pisortat ilisimatinneqanngillat, kukkunerlu tungitsinninngaanneerpoq. Kukkuneq tamanna uteqqinneqassanngilaq, Roderick Mcillree oqapoq.

Akuersissutinik pingasunik utaqqineq

Ingerlatseqatigiiffik akuersissutinik pingasunik tunineqarnissaminut maanna utaqqivoq. Nerlerit Inaanniit akuersissuteqarfiusumut atortunik assartuinissamut akuersissut, qilleriviup atortunillu allanik maanna Canadamiittunik usingiaanissamut akuersissut kiisalu misileraalluni qillerinernik aallartitsinissamut akuersissut.

- Qinnuteqaatit tamaasa oqartussaasunut nassiuppavut, maannalu akuersissummik tunineqarnissamut qinnuteqaatit nalilersorneqarput, Roderick Mcillree oqarpoq.