Uuliasiornissamik suliniut oqartussanit unikaallatsinneqartoq

Ingerlatseqatigiiffik naapertorlugu siusinnerpaamik 2027/28-mi ukiukkut qillerineq aallartissinnaassasoq, oqartussanit ilimagineqarpoq. Suliniut suli aallulluinnarlugu, akuersissutillu pisariaqartut pissarsiarineqarpata qinnuteqaatillu isumannaatsumik akisussaassuseqartumillu suliarineqarsinnaalerpata qillerineq aallarteqqinnissaa siunertaralugu, 80 Mile nalunaarpoq.

Amerikamiu aningaasaliisartoq pimoorussivoq

Kinguaattoortoqaraluartoq uuliasiornissamut pilersaarutini aalajangiusimallugu, ingerlatseqatigiiffiup aningaasaqarnikkut suleqatigisaa, Greenland Energy Company nalunaarpoq.

"Issittumi suliaqarniaraanni erinitsajuitsuunissaq, naleqqussarsinnaaneq siunissamullu ungasissumut isiginnittaaseqartariaqarneq pisariaqarpoq. Pilersaarutitta pitsanngorsarnissaannut inuiaqatigiinnullu, suleqatitsinnut oqartussaasunulluunniit attuumassuteqartunut attaveqarnerup nukittorsarnissaanut piffissaq manna atussavarput. Greenland Energy Companyp Kalaallit Nunaanni sulinera sumiiffimmut tassunga, tassani innuttaasunut aamma piffissaq ungasinnerusoq eqqarsaatigalugu akisussaassuseqarluni pisuussutinik ineriartortitsinissamut periarfissanut tatiginninnitsinnut nakussassaataassaaq,“ Greenland Energy Companymi pisortaaneq Robert Price oqarpoq.

Oqartussaasunit mianersoqqussut

80 Mile uppernarsaavoq inatsisinik unioqqutitsinermikkut atortunik nunamut ilioqqaasimanertik pillugu mianersoqqussummik tunineqarsimallutik. Suliffeqarfiulli erseqqissarpaa atortunik akuersissummik pigisaqartumut ilioqqaaneq pineqarani Nerlerit Inaannut ilioqqaasoqarsimammat, tassanilu Greenland Airportsip toqqorsivianik attartornissamut akuersissut pissarsiarineqarsimavoq.

Ingerlatseqatigiiffik nangilluni allappoq Namminersorlutik Oqartussat pigisaani toqqorsivimmiisitsinissamut isumaqatigiissummut immikkut akuersissuteqarnissaq pisariaqartoq ilisimanagu, Greenland Airports tamakkiisumik Namminersorlutik Oqartussanit pigineqarmat.

Roderick McIllree Sermitsiamut ima oqarpoq:

- Isumaqanngilanga atortutsinnik ilioqqaanermi malittarisassanik unioqqutitsisoqarsimasoq; mianersoqqussummik taamaallaat tunineqarpugut, tassanilu malitarisassat sorliit unioqqutinneqarsimanersut iluamik erseqqissarneqanngilaq. Iliuuserinngisatsinnik, nunat tamalaat akornanni inatsisinik unioqqutitsisimasutut unnerluutigineqarperput ajuusaarnarpoq, tassami oqartussanit pigineqartumik piffimmik attartorpugut, akuersissutit piumasaqaataasut pissarsiarinissaata tungaanut, atortuvut ilioqqarsinnaanissaat sumiiffissaqartinnissaalu eqqarsaatigalugit.

Amerikamiut aningaasaliisartut akuliunnerisa kingorna uuliasornissamut suliniut maluginiarneqalerpoq. Aningaasaliisut tupaallannartumik ussassaaruteqarput. Ilaatigut amerikamiu tv-kkut tusaamasaq Dr. Phil peqataatillugu. Ussassaarineq uuliamik annertuumik qillerinernik piiaanernillu qanittukkut piviusunngortussanik isumaqalersitsiniarsaripput. Tamannali oqartussanit arlaleriarluni ilumuunngitsutut uppernarsarneqarpoq, ingerlatseqatigiiffiup akuersissutit pisariaqartinneqartut arlaallit suli amigaatigimmagit.