Arctic Sounds Academymi suliassaqarfimmi angutinik ulikkaartumi Sara Maalialu peqataarusupput

Kaammattuutaasumik ersaattaanneq, isiginnaartut avaallattut kaammattuutaasumillu nateq tukkarlugu. 

Nuummi Katuami marsip arfineq pingajuanni tusarnartitsinermi ARNAQ-mi aaqqissuisuusut ersaattaanneqarput, ukiup aappassaanik nunarsuarmi arnat anguniagaqarniarlutik saqqumiiffianni aaqqissuussinerminnut. Siullermeertumik suleqatigiit arnaannaapput suiaassutsikkullu ikinnerussuteqarlutik, isiginnaartitsinermi aaqqissuisut aamma arnaammata.

ATUARUK AAMMA

"Arnaq" oqaluttuarisaanermi Katuaq-mi allappoq

- Misigisimavunga teknikerit puigorneqarajuttartut, taamaattumik peqataasinnaagatta nuannaarutigeqaara – aamma takutinniarlugu uagut angutituulli sapinngitsugut, 21-nik ukiulik Sara Andersen inuusuttut qullilerisut ilaat oqarpoq.

Isiginnaartitsinerit ilaanni inersuaq isiginnaartitsivillu taartuinnaapput, erinarsortoq qaamaneq pillugu erinarsortoq kisimi qullermik seqerneqarsimalluni.There is a light, taaguutigaa.

Tunuani qaamasumik alutornartumik seqerneqarsimavoq.

Uanga ilusilersugara! Sara Andersen oqarpoq.

Inuusuttut allat ikittunnguit peqatigalugit Arctic Sounds Academymi peqataavoq – ilinniarfiusoq Sisimiuni nipilersornermi pikialaartitsinermik Arctic Sounds Festivalimit aallaaveqartoq, siunertaalluni nunatsinni arnat suiaassutsikkullu ikinnerussuteqartut isiginnaartitsivimmi teknikeritut aaqqissuussinernilu amerlanerulersinnissaat.

- Arnamik teknikereqarsimanngisaannarsoraara. Tassalu Sisimiuni.

Taama oqaluttuarpoq Maria Camilla Kristiansen, Arctic Sounds Festivalip siulersuisuiniittoq, nipilersornikkut saqqummersitsinernilu saqqummiinermi annertuumik sulisimasoq.

2024-mi suliniut aallartimmat arnat suiaassutsikkullu ikinnerussuteqartut kisimik ilinniarfimmiisinnaapput. Ullumikkut angutit inuusuttut aamma peqataasinnaapput.

- Suliasssaqarfiup uuma iluani angutitavut inuusuttut aamma peqataatikkusuppavut, angutillu aamma ilinniassavaat arnat peqataasut inissaqartillugullu, Maria Camilla Kristiansen oqarpoq nangillunilu:

Arnallu inissamik tigusinissartik ilinniassavaat

Klassemini arnartatuaq

Suliassaqarfimmi arlalitsigut arnartatuaaffiusartumi arnatut inissaqarniarneq ilungersunarsinnaavoq – ilaannikkullu nuanniissinnaasumi. Sara Andersen tamatumani isumaqataavoq.

Siorna Danmarkimi Frederikshavnimi eventteknikeritut ilinnialerpoq. Aallartinnissani qilanaareqaa.

Paasivaa klassemi arnartatuaalluni, aamma naak taamaannissaa naatsorsuutigisimagaluarlugu.

- Ilimagereersimavara taamaasinnaanera angutaannaat akornanniissallunga. kisiannili ilumut tamaanneranut piareersarsimanngilara, Sara Andersen oqarpoq.

Klassemi silaannaq nuanneeqaaq. Ammip qalipaataanik aallaaveqartumik, siaassutsimut tunngasumik allarpassuartigullu immikkoortitsisoqarpoq.

Sara Andersen misigisani pillugit ilinniartitsisuminut saaffiginnikkami ilalerneqanngilaq.

- Ikioqquneq iluaqutaanngilaq, oqaluttuarpoq.

Naggataagut naammagilerpaa taamaatillunilu.

- Ilaannikkut oqimaattumik uggorisarpara taaamaatiinnarsimanera. Ilinniagassaqaraluaqaanga, aammali qujamasuppunga taamatut silaannaqartoq qimakkakku, Sara Andersen oqarpoq.

Taamatulli aalajangiineq oqitsuinnaanngilaq, Eventteknikkimi ilinniassallugu nuannareqaara, avatangiisinilu taamaattuniinnissaq – kisianni uterlunga taamaattunik misiginissaq eqiagaara.

Nuannaangaarama akuersivunga

Arnaq alla aamma ilinniarfimmiissimasoq tassaavoq 18-inik ukiulik Nuummeersoq Maalia Naasunnguaq Rasmussen Skifte. Sara Andersen ilinniarfik aallartimmalli peqataasimasoq, ukioq manna siullermeertumik Maalia Rasmussen suliniummi peqataalerpoq.

- Arnat ammalluinnartut nutaaliullaqqissullu naapinnerat nuannerluinnarpoq, ilumut malugisinnaallugu ilisimasamik ingerlateqqinnissaat pimoorukkaat, oqarpoq.

Maalia Rasmussenip misilissimanngisaannarpaa isiginnaartitsiviup tunuaniinneq – nalinginnaasumik isiginnaartitsisarfimmiittarsimavoq guitarinngikkuni erinarsorluni. Siornali periarfissaqalerpoq nipilerinermik malinnaanissaminut Akisuanerit Festivalimi kiisalu Nuummi Suialaa Arts Festivalimi.

Suialaa Festivalip ingerlanneqarnerani nipilerisoq tassanngaannaq Maalia Rasmussen Skiftemut saaffiginnippoq aperalugu Josef Tarrak tusarnaartitsinerani nipilerisuusinnaanersoq.

- Imaappunga: Suna? Malinnaarujuuinnarpungami, paasinalugu susoqarnersoq, Maalia Rasmussen Skiftte oqarpoq.

Oqarfigineqarami taamaallaat backing Trackia nipaalu kisiisa sammissagini, eqqarsarpoq ajornarnavianngitsoq.

- Nipilersortarpungami, taamaattumik suna nipiginnersoq ilisimallugu, oqarpoq.

Paasivaalu nipimik aqutsineq nuannersuusoq. Kingorna neqeroorfigineqarpoq ukioq manna Arctic Sounds Festivalimi peqataanissamik, tamannalu Arctic Sounds Academymi teknikkilerinerup ilagaa.

- Nuannaangaarama akuersivunga, Maalia Rasmussen Skifte oqarpoq.

Tikilluaqqusaasutut misinnarpoq, sianiippaluttunik aperisinnaalluni, tusarniittunillu suliaqarluni, imaluunnit ima tusarniitsigisunik iluarsiniarnerani ikiorneqartariaqarluni.

Suliassaqarfimmi peqataarusuttoq

Maria Camilla Kristiansenip takorluugaraa Arctic Sounds Academymi ima angusaqarnissaq periarfissaqalerluni kalaallisut ilinniartinneqarnissamut soorlu qullinerinermi nipilerinermilu teknik pillugu arnamit ilinniartinneqarluni.

- Aqqulli takeqaaq – ukiorpassuillu ingerlassallutik. Taamaaliorsinnaalernissamulli ilinniartitsisariaqarpugut, Maria Camilla Kristiansen oqarpoq.

Anguniakkamut alloriarneq siulleq tassaavoq arnat ilinniarnissaannut avatanagiisinik toqqissisimanartumik pilersitsinissaq.

Siunissaq takorluukkallu pineqartillugit ilinniarfimmi piukkunnartunut marluusunut suut tamarmik ajornanngillat.

- Neriuppunga ullut arlaanni kisimiivillunga qullilerisinnaajumaarlunga – isiginnaartitsisarfik piareersarlugu, ikioqqunngikkaluarlungalu nammineq naammassisinnaassallugu, Sara Andersen oqarpoq.

Maalia Rasmussen Skiftep naluaa isiginnaartitsivimmiissanerluni imaluunniit tunuani – ataatsikkoortillugillunniit.

- Ilumut ilinniarusuppunga suliassaqarfimmiinnissara qulakkeerlugu, oqarpoq nangillunilu:

- Kisianni soorunami pikkoriffigilernissaa takorloorpara tulluussimaarutigisannillu suliaqarlunga.