– Iluatsilluartorujussuuvoq

Inunnguaq Hegelund aasaanerani ulapaarsimaqaaq. Norgemiut umiarsuaatileqatigiiffiata HX Expeditionsip, ulluinnarni HX-imik taaneqartartup, umiarsuaanni takornariartaatini Nunatta sineriaani angalasuni tamani, kalaallit nerisassiaannik sassaalliisartuusimavoq.

- Iluatsilluartorujussuuvoq. Ilaasut ilarpassuisa oqaatigisarpaat angalanertik tamakkerlugu aatsaat taama mamartigisunik nerillutik.

- Uannut pingaarnerpaaq tassaavoq, Nunarput Issittumilu nerisassiavut pillugit paasisaqarnerullutik angerlarnissaat, kalaaleq iggarissorsuaq Inunnguaq Hegelund oqarpoq.

Norgemi umiarsuarnik takornariartaatinik angallassisartoq HX Expeditions peqatigalugu taama oqaaseqarpoq.

Inunnguaq Hegelund nammineq takornariartaatit taakku ilaanni igasunut aqutsisuusimavoq.

Nerisassiat 40-ngajaat

Taassuma oqaluttuaraa, HX-ip suliffeqarfiutimilu, Arctic Food by I-ip, suleqatigiinnerisigut aasaanerani umiarsuarnut takornariartaatinut Nunatta sineriaani angalasunut ilaasunut nerisassiat Nunatsinneersut assigiinngitsut 36-t sassaalliutigineqartarsimasut. Ulloqeqqasiornermi, unnukkut aamma immikkut ittumik nerisassiat sassaalliutigineqartunut tallimaasunut ilaatillugit nerisassiatut.

Inunnguaq Hegelundip sulisui kalaallit igasut umiarsuarni tamani ilaasimapput. Taamaaliortarsimallutik nerisassat pitsaassusaat qulakkeerniarlugu aamma takornariat nerisassiortunik naapitsisinnaaqqullugit.

David J. McDonald Greves, umiarsuaatileqatigiinni pisortaq, HX-imi iggavinni suliaqartunut tamanut siuttuusoq, Inunnguaq Hegelund New Arctic Cuisinemi piorsaasutut taavaa.

Taaguummi New Nordic Cuisinemi pineqartoq tassaalluni, qallunaatut Nunat Avannarliit iggaviattut taaneqartartoq. Tamatumani pineqarluni Qallunaat aamma Nunat Avannarlermiut nerisassioriaasiannik ukiut 15-it matuma siornagut mumisitsineq.

– Piniartutut, aalisartutut aamma igasutut misilittagartuutut najukkamini ileqqutoqqanik ilisimasaqarluarpoq Issittumilu nerisassianik takutitsinissaminik nuannarisaqartuulluni. Nerisassiat nungusaataanngitsumik pisarineqarsimanerat najukkamilu tunisassiarineqarsimanerat, HX-imi pingaartitatsinnut naapertuulluinnarppoq. 

- Suleqatigiinnitsigut Kalaallit Nunaata nerisassioriaatsikkut oqaluttuarisaanera piviusunik oqaluttuassartalimmik oqaluttuarinissaanut periarfissippaatigut – tamatumalu saniatigut Issittumi nerisassianik nunarsuarmi ilisimaneqalersitsiniarnermik suliniuteqarneruneq tapersersorlutigu, David J. McDonald Greves oqarpoq.

HX-ip umiarsuaataanni takornariartaatini aappaagu aamma kalaallit nerisassaataannik pitsaasunik sassaalliisoqartarnissaa qilanaaraa.

- Takornarianit ukioq manna qisuariaatigineqartut eqqarsaatigalugit, Inunnguaq Hegelundip isumaqatigiissuteqarfigineranik sivitsuisariaqarnissarput qularinngilluinnarparput. Nerisassanik misiliisitsisarnikkut Kalaallit Nunaannut angalatitsisarnivut allaanerulluinnartumik misigisassaqartitsilerput, David J. McDonald Greves oqarpoq.

Nunarsuaq tamakkerlugu tusaamaneqarneq

Igasoq pikkorissoq Nunatta avataanit aamma maluginiarneqarsimavoq.

Angalasunut atuagassiami ilisimaneqarluartumi Travel+Leisure-mi Inunnguaq Hegelund aamma HX-imik suleqateqarnera aggustimi quppernerni arfinilinni allaaserineqarpoq. Atuagassiap nunarsuaq tamakkerlugu millionikkaanit atuarneqartartup suliniut tikkuarlugu assersuutissaanerarpaa, najukkami nerisassiarineqartartut qanoq imminni pilerisaarutigineqarsinnaanerat – tamatumalu peqatigisaanik Nunarput nerisassanik pitsaasunik sassaalliisartutut maluginiarneqartilerlugu.

Nerisassanik inuussutissarsiuteqarneq nukittorsarneqarsinnaasoq

Inunnguaq Hegelundip iluatsitsilluarnera umiarsuarnut takornariartaatinut ilaasut misigisimasaattut nerisassanik misileeqqaarnerinnaanngilaq. Norgemiut takornariartitseqatigiiffiannik suleqateqarnerup Kalaallit Nunaanni inuussutissarsiutinik nukittorsaasoqarsinnaaneranik periarfissatut isigivaa.

– Nuuk Issittumi inuussutissanik nioqquteqarfinngorsinnaassasoq neriuppunga. Piumaneqarnerat annertusiartorpoq, maannakkullu takusinnaavarput najukkami ingerlatsisut amerlanerusut umiarsuarnut takornariartaatinut pisisartunullu anginerusunut allanut pilersuiniarlutik soqutiginnilersimasut, oqarpoq.

Tamatumunnga peqatigitillugu Inunnguaq Hegelund suleqatinilu HX-imik suleqateqarnertik iluaqutigalugu Issittoq tamakkerlugu angalasimapput. Nunatsinnit Islandimut aamma Svalbardimut – Danmarkimullu.

- Qanoq iliorsinnaanitsinnik angalalluni takutitsisaqattaarneq misigisaavoq angisooq. Aamma igasut inuusuttut, Kalaallit Nunaannik pitsaanerpaamik takutitsisimasut, tulluusimaarutigeqaakka, oqarpoq.