Immiussaq qaqutigoortunik nipilik nipilersornermi akissarsisinneqartoq
Tallimanngormat unnukkut Nuummi akissarsisitsinerni Koda Awardsimi ajugaasut akissarsitinneqarput.
Assi: Koda Awardsimit tusagassiorfinnut assilisaq
Nipit qaqutigoortut erinniorluagaapput.
Kalaallit immiussaat ”Malungivara”, tallimanngormat unnukkut eqqumiitsuliortut SIGU Mikelu akimasuumik nersornaaserneqarpoq.
Taakkumi Nuummi Koda Awardseqarnerani ukioq manna akissarsiarititaq pissarsiaraat.
1991-mili Koda siusinnerusukkut Kalaallit Nunaannut akissarsiarititamik taaneqartumik Koda Awardsinik kalaallinut erinniortunut taalliortunullu akissarsititsisarpoq.
Ukioq mannalumi aamma taama pisoqarpoq.
- PIffissami eqqissisimanngiffimmi ajornakusoortumilu nipilersornerup eqqumiitsuliortullu Kalaallit Nunaanni kulturimik kinaassutsimillu takutitsisunut malunnartinnissaa suli ersarinnerulerpoq, Kodami siulittaasoq Loui Törnquist februarimi siusinnerusukkut akissarsisitsineq pillugu oqarpoq.
Ukiumut akissarsiarititaq taalliortumut erinniortumulluunniit, ukioq manna immiussamik saqqummersitsisumut tunniunneqartarpoq. Akissarsiarititat ukiup siuliani saqqummersitanut tunniunneqartarput.
Toqqaasartut SIGU Mikesillu immiussaat taalliorluakkatut nipigilluinnartuuneranullu nersualaarpaat.
- Nipilersortut pikkorilluinnartuunerat erseqqissumik tusarneqarsinnaavoq, immiussamilu nipit qaqutikkut – immaqaluunniit siornatigut saqqummersitani allani tusarsimanngisaannakkat ilanngunneqarput, naliliisartut naliliinerminni oqarput.
Piginnaanilillu nutaaq Aleq tallimanngornermi akissarsisitsinermi aamma akissarsitinneqarpoq.
Taassuma immiussamini ”Inuunerma Hinningani” , nammineq sumiorpalussutsini atorlugu erinarsukkamini piginnaanilimmut akissarsiarititaq pissarsiaraa.
- Aleqatsiaq (Aleq, aaqqiss.) Avanersuup eqqaaneersuuvoq, nunatsinnilu nunap ilaanit tassannga eqqumiitsuliortut amerlasuut saqqummersitsineq ajorput, naliliisartut naliliinermut tunngavilersuutiminni oqarput.
Piginnaanilimmut akissarsiarititaq ukiut tamaasa erinniortumut, taalliortumut nipilersoqatiginnulluunniit tunniunneqartarpoq.
Aleq-p immiussaa immikkuullarissutit ersarissutullu nipeqarnermigut kiisalu taallat erinnallu suliarineqartut Avanersuup eqqaaneerpalaarnermigut nersualaarneqarpoq.
- Aleqatsiap piumassuseqarnermigut pikkorilluinnarnermigullu kiisalu suleqatigisani peqatigalutit immiussaminnut tunniusimalluinnarnermikkut pitsaalluinnartumik imaqartumik angusaqarput, naliliisartut oqarput.
