Timersornermik sammisalik nersorniarneqartoq
Tusagassiortoq Noah Mølgaard ukiuni 35-ni timersornermi misigisanik innuttaasunut ingerlatitseqqiisarpoq. Tallimanngormallu nalliuttorsiornera Naalakkersuisunit Hans Egedep illuani nalliussineqarpoq.
Noah Mølgaard naasunik tunissummillu Naalakkersuisunut ilaasortamit Nivi Olsenimit, tallimanngornermi Hans Egedep Illuani ilasseqatigiinnermi tunineqarpoq.
Foto: Trine Juncher Jørgensen
Ilinniartitaanermut, kulturimut, timersornermut ilageeqarnermullu Naalakkersuisoq Nivi Olsen tallimanngornermi Noah Mølgaardip ukiunik 35-nngortorsiorneranut atatillugu ilasseqatigiinnermi tunissutinik naasunillu tassunga tunniussinermini tiguartissimavoq.
Noah Mølgaardillumi CV imaannanngitsoq ukiut ingerlanerani timersornermi pisunik ingerlatitseqqiisarnermini sanarfisimavaa.
Aallakaatitsinerit saqqummersitallu
Noah Mølgaardi timersornermik tusagassiortutut Arctic Winter Gamesinik 15-nik, nunatsinni pissartanngorniunnernik 35-nik, assammik arsarnermi nunarsuarmi pissartanngorniunnernik pingasunik, Island Gamesinik, Avannaata Qimussersuinik, Inuusuttut nunarsuarmi pissartanngorniunnerinik allarpassuarnillu Kalaallit Nunaanni timersornermut attuumasunik tusagassiisarpoq.
Atuakkanillu arlalinnik saqqummersitsivoq, ilaatigut isikkamik arsaanneq pillugu "Kalaallit Nunaanni isikkamik arsaalluni pissartanngorniunneq" 2022-mi tissisaarullu marlunnik oqaasertaligaq ”Koor´- Hold da op, mand”, 2018-mi Noah Mølgaardip Tusagassiorfik Sermitsiaq.AG-mi sulinerani saqqummersinneqartoq.
– Nalliuttorsiorninnik malunnartitsiumanerat tupaallaatigaara. Suliattummi isigiinnarpara, inunnulli allanut sunniuteqarsimanera nuannaarutigaara. Timersorneq inuuninnut annertuumik ilaajuarpoq, timersornermilu pisunik allanut ingerlatitseqqiisarneq nuannaraara, Noah Mølgaard, Ilulissani peroriartorsimasoq, timersornermillu annertuumik sungiusaanermillu ingerlataqarsimasoq, peqatigiiffinnilu assigiinngitsuni siulersuisunut ilaasortaasarsimasoq oqarpoq.
Noah Mølgaardimik ilasseqatigiinneq Hans Egedep illuani pivoq, tassani ilinniartitaanermut, kulturimut, timersornermut ilageeqarnermullu Naalakkersuisoq Nivi Olsen allallu oqalugiarput.
Foto: Trine Juncher Jørgensen
Timersuutinik nuannarinerpaasaqarpit?
– Timersuutit tamarmik immikkut nuannequteqarput. Assammik arsarsinnarluni isikkamik arsariaraanni imaluunniit issittumi timersuutinut qimussimillu ingerlaniunnernut, taakku tamarmik arlaatigut sunniuteqartut takuneqarsinnaavoq. Ilulissanili peroriartorama nammineq qimmeqarpunga, taamaammallu Avannaata Qimussersua immikkut misigissuseqarfigivara, Noah Mølgaard oqarpoq, taannalu KNR-ikkut timersornermik aallakaatitsisarnerminik nangitsissaaq, aammali taartissamik ataatsimik arlalinnilluunniit timersornermik ingerlatitseqqiinermik pimoorussilluni sulerusuttumik ujarlerpoq.
– Suliarami uanga Hjalmar Berglundimit tiguara, piffissallu ilaani suliap allamut ingerlateqqinnissaa suliassaraara.
Nivi Olsenip saniatigut aningaasaqarnermut naalakkersuisoq Aqqaluaq B. Egede (IA) isumaginninnermullu, suliffeqarnermut, ilaqutariinnut nunamullu namminermut naalakkersuisoq Maritha Broberg (A) kiisalu inuit arlallit timersornerup silarsuaaneersut, tassani Kalaallit Nunaanni Timersoqatigiit Kattuffianni siulittaasoq Claus Nielsen, siulittaasuusimasoq Nuka Kleemann, ullumikkut ilinniartitaanermut, kulturimut, timersornermut ilageeqarnermullu naalakkersuisoqarfimmi naalakkersuisoqarfimmi pisortaasoq, ilasseqatigiinnermi peqataapput.
