AVANNAATA QIMUSSERSUA
Aqaguinnaqaaq: - Piareerluinnaleqqavugut
Nunatsinni qimussit sukkanersiukkat Qasigiannguani aqagu arfininngornermi Avannaata Qimussersuaqarnissaanut piareerluinnalerput. Aqqut atuarneqareerpoq, qimmit piareeqqapput, aqaguliuna ulloqeqqanut aallarunik. Sukkaniunnissarsuaq aqagukkaangat suut kingullertut piareersaatigisarneraat paasiniarparput aqagumullu naatsorsuutaannik paasiniaaffigalugit.
Minik Olsvig Svendsen Ilulissani qimusserartoq assip saamiatungaani takuneqarsinnaavoq. Angutimmarik Thygesen qimminilu Kiinaalik Ilulissani qimmit nakorsaaniittut assip talerpiatungaaniittut.
Assit: Nammineq pigisat
Sukkaniuttussat 26-t tamarmik Qasigiannguanut tikereerput, TV-kkut aallakaatitsisussat Issittumi Sakkutooqarfiup ullaaq manna tikiuppai. Qanimut avataaniillu isiginnaartussat qilanaaginnarsinnaalerput.
Unammisussattaaq qimmitillu aqagu ulloqeqqanut aallarnissaminnut piareerluinnaleqqapput. Taakkununnga ilaavoq Saattormiu 22-nik ukiulik Angutimmarik Thygesen. Pissanganeq takkutillattaalersimasoq ullaatungaa oqaluukkatsinni oqaluttuarpoq.
- Ajunngilanga, pissangalaarpunga. Pissanganartarpoq soorunami, ukioq naallugu piareersarfiginikuullugu, Angutimmarik oqarpoq.
Taanna inuusukkaluarluni aappassaanik Avannaata Qimussersuartussaavoq, Ilulissanimi 2024-mi Avannaata Qimussersuinut peqataaqqaarami.
Angutimmarik Qasigiannguanut arfininngormat tikikkami aqqutissartik pingasoriarlugu atuareersimallugu oqaluttuarpoq. Aqqutissamik ilaa immap sikuaniimmat apullu tarajortaqarmat qimminut qanoq sunniuteqassanersoq pissangagilaarpaa.
- Qimmit sungiusimagamikku nunakkoortillutik aputitorlutik, aput imigaralugu. Taava sikumut pigaangamik tarajortalimmik aputitoraangamik sungiusimannginnamikku ilaannikkut taaqqungassutigilaarsinnaasarpaat. Kisianni taamaannera takerujunnginnami ajunngilaq.
Angutimmarik Thygesen qimminilu unammiarnerminni angalavissorput. Siullermik Saattuniit qamuteralannik sikup sinaanukariarlutik umiatsiamik Qaarsunukarput. Qaarsuniit timmisartumik Ilulissiariarlutik Qasigiannguanut umiarsuarlutik. Aana sakkutuut umiarsuanni Qasigissiarusaarnerminni assia.
Assi: Nammineq pigisaq
Aallarfissaat nuunneqartoq
Sukkaniuttussat 26-ugamik aallarfissaq annertoorujussuaq pisariaqartippaat. Aallarfissaat siunniunneqaqqaaraluartoq qimussinut assigiinngitsumik atugassaqartitsimmat allanngortinneqarnikuuvoq. Ilaammi illinerniillutillu allat sermiinnaanerusukkut aallartussanngoraluaramik.
SUKKANIUTTUT KILLIFFII MALINNAAFFIGEQQISSAAKKIT
Avannaata Qimussersuinut peqataasut aqagu sukkaniunneranni killiffiisa siornatigornit malinnaaffiginissaat ajornannginnerussaaq.
Sukkaniuttussat qaammataasakkut malinnaaffigineqarsinnaanngorlugit Garmin inReachinik nassataqartinneqassapput.
Tamanna Avannaata Kommuniata suliniuteqarneratigut pivoq.
- Avannaata Qimussersua kulturitsinnut pingaaruteqartorujussuuvoq, aamma innuttaasut amerlasuut Nunatsinniittut unammineq malinnaavigisinnaanissaanik kissaateqarput. Taamaattumik peqataasut unammineq tamaat malinnaavigisinnaanissaat periarfississinnaagatsigu nuannaarutigaarput, Avannaata Kommuniani borgmesteri Lars Erik Gabrielsen tusagassiorfinnut nalunaarummi taama oqarpoq.
Suliniummut tapersersuisut:
Avannaata Kommunia
VB Marine & Service
Garmin Nordic Denmark
Kalaallit Nunaanni Qimussertartut Kattuffiat
Ugguuna malinnaasinnaavutit:
Avannaata Qimussersua 2026 | Events Event - TracTrac
Qimussit assigiimmik atugaqarlutik aallarniassammata aallarfissaat illerngup avataanut nuunneqarpoq. Taamaalilluni tamarmik sermitarasaartukkut aallartussanngorlutik.
- Iluarpoq tamatta aallarfissatta assigiilernerat. Inatsisaagami aamma KNQK-p malittarisassaani aallarfiit tamarmik assigiinnissaat, Angutimmarik oqarpoq.
Aallarfissaq inissereerpoq aqagumullu aallarnissaq utaqqisaaginnalerluni. Sukkaniunnissamut aqaguinnanngoraangat suut tamarmik ajunnginnersut qulakkeerneqartarpoq.
- Piareersagassat kingulliit, qamuteeqqat, aallarfissaq, pituffissat qajannaannersut, qimmit anaajareerlugit tamakkua. Tapersersersuisuma ilisarnaataat qamuteeqqanut aamma nippussussuakka.
- Soorunami neriuppunga ingerlalluassallunga, naatsorsuuteqarpallaanngilanga, Angutimmarik oqarpoq.
Angutimmarik Avannaata Qimussersuinut 2024-mi annguteqqaarami ikiortimilu ilaat Salik. Sukkaniuttussat aallalernerminni katillugit sisamanik ikiorteqarsinnaasarput. Qimmit aallalernermi kalussarneranni pituutaasa ilarutinnginnissaat ilaasa suliarisarpaat, ilaasalu pituffik kipisarlugu.
Assi: Nammineq pigisaq
Ataatani illinersioraa
Angutimmariup qimusserneq qaatuuppaa. Ataatanimi Thomas Thygesen, aamma pingasoriarluni Avannaata Qimussersuani ajugaanikoq, meeraallunili qimusseqatigisarpaa.
- Sungiusartanngikkaluarpaanga, kisianni ilaanni sungiusaassutigisartagaanik issuartarpara, Angutimmarik oqarpoq.
Qimminimi nammineq sungiusartarpai. Sukkaniutinik qimmeqassagaanni sivisuumik sungiusaanissaq pisariaqarpoq.
- Ukioq ataasiinnaanngitsoq sungiusarneq ingerlasarpoq. Qimunneq ilikkarteqqaariarlugit, ukioq taanna sukkaniussutiginiaraanni qimutsigilluarlugit nukkassarluarlugit pangalissinnaanngortillugit timersortillugit.
Iluliarmiu Minik Olsvig Svendsen qimminilu Avannaata Qimussersuani angusarinnerpaagamik marloriarlutik normu 8-nngornikuupput.
Assi: Nammineq pigisaq
Aallarluarnissaq pingaaruteqarpoq
UKIUNI QULINI KINGULLERNI AVANNAATA QIMUSSERSUANI AJUGAASUT
2015: William Jensen, Saqqaq
2016: Edvard Samuelsen, Saattut
2017: Edvard Samuelsen, Saattut
2018: William Jensen, Saqqaq
2019: Ville Siegstad, Ilulissat
2020: Corona peqqutigalugu sukkaniuttoqanngilaq.
2021: Kristian Lundblad, Sisimiut
2022: Anton Street, Saattut
2023: Milan Mathæussen, Ilulissat
2024: Thomas Thygesen, Saattut
2025: Henrik Jensen, Ilulissat
Sukkaniuteqataasussaq alla Iluliarmiu 35-nik ukiulik Minik Olsvig Svendsen aamma aqagumut piareerluinnaqqavoq.
- Ullaaq nerisitsereerama, qamutit piareersarlugillu sukkaniutissagut piareersalaassuakka, taanna oqarpoq.
Minik Olsvig Svendsen Avannaata Qimussersuanut 2014-imi peqataaqqaarpoq, taamanerniilli arfinilissaanik maanna unammeqataasussaalluni. Sukkaniuttartuuniaruni piffissarujussuaq atorneqartarmat oktobarimili qimusseqattaarluni aallartippoq. Qasigiannguanullu marsip 18-iani tikikkamili aqqutissartik pingasoriarluni atuareerpaa.
- Ajunngittorujuuvoq, manittuinnaavoq qummukajaaqarnanilu. Manna manittuinnaagami.
Ilulissanut sanilliullugu qanoq innerua?
- Allaanerujuuvoq, Ilulissani qummukajaaqarlutalu ammukajaaqaratta.
Inissilluassagaannili aallartilluarnissaq pisariaqartuaannarpoq.
- Iluamik aallarluaraanni siullernut akuulluni, tassanngaanniit sukkaniunneq imminut ilusilipajaartarami. Aallarluarnissaq pingaaruteqangaatsiartarpoq.
Qanormi naatsorsuuteqarpit?
- Asuki, naatsorsoruminaalaarnermut. Nalunarnermut. Aamma sukkasoorpassuit ikannermut. Nalunartuaannarpoq qanoq inissinnissaq. Kisianni soorunalimi sukataassuunga, Minik taama naggasiivoq.
