Arnannguup tusarnaartut nuannisarterujussuarai

Arnannguaq Gerstrømip erinniarsua Lines of Belonging nipilersoqatigiissuanit appisimaarneqartoq tusaarnaartunit nipilersortunillu nuannarineqarluarpoq.

Tamanna sisamanngornermi unnukkut Aalborgimi tusarnaartitsivimmi Musikkens Husimi Aalborgimi nipilersoqatigiissuarnit nipilersorneqaqqaarmat erserpoq.

Arnannguaq Gerstrøm scenemut qaqilluni naasunik tunineqarmat tusarnaartut ersaartaallunillu avaalaarput. Scenemit aqqareersoq ersaartaatiinnarput – qaqeqqittariaqarporlu. Taava nipilersoqatigiissuit aamma nikuillutik ersaartaateqataapput.

Arnannguaq Gerstrøm erinniarsualiaminik appeqqaarnissaq sioqqullugu Lines of Belonging pillugu oqaluttuarpoq. Lines of Belonging tassaavoq nipilersukkat atorlugit naak kulturini allani inuugaluarluni Kalaallit Nunaannik uummammioqarnermik oqaluttuaq.

- Oqaluttuarisaanermut kinaassusermullu tunngavoq, pinngortitamit kalaallillu nipilersugaannit erinarsuutaannillu isumassarsiaavoq, Arnannguaq Gerstrøm qilaatersuutigaluni aajja, ajjajjamillu inngiutigaluni oqaluttuarpoq. Kalaaleq erinniarsualiortoq aamma tassani ersaattaatigineqarpoq.

Arferup qarlornera nipilersoqatigiissuarnit appinneqartoq

Lines of Belonging Aalborgimi nipilersoqatigiissuarnit piumasarineqarpoq, minutsillu aqqaneq-marluk missaanni sivisussuseqarluni. Nipilersoqatigiissuillu aqutsisuisa pisortaat Amerikamiu Joshua Weilerstein aqutsisuuvoq.

Erinarsuut minutsialunni arferup qarlorneranit isumassarsiarititamik aallartippoq. Aallaqqaasiut immikkuullarissuuvoq erinniarsuarnullu tusarnaartitsissutigineqartartunut allanut eqqaananngilluinnarpoq. Arnannguaq Gerstrømip ilaatigut teknikki immikkut ittoq atorpaa, tassa katuut atorlugu tumerparpaarsuaq agiaraanni taamaalilluni arferup qarlorneratut nipeqalersarpoq.

Erinniarsuup sinnera nikisarnerpalaarneruvoq, kalaallillu erinarsoqatigiivinut qilaatersortarnermullu eqqaanarpoq, aammattaarli nunani avannarlerni nipilersornermut immikkuullarissumut, soorlu erinniortut Griegip Sibeliusillu atortagaannut assinguvoq.

Aalborgimi nipilersoqatigiissuarni ilaasortat 65-it tamarmik Lines of Belonging-imi appisimaartinneqarput. Taakkualu suliaq naammassilluarpaat.

Aqutsisut pisortaat naammagisimaarinnittoq

Aalborgimi nipilersoqatigiissuit aqutsisuisa pisortaata Arnannguaq Gerstrømimik suleqateqarnini naammagisimaarluinnarpaa.

- Suliamik kusanarluinnarumi tamatuminnga inniminniineq tusarnaartitseqqaarnerlu ataqqinaataangaarpoq, Joshua Weilerstein oqarpoq.

- Arnannguup oqaloqatigineratigut kalaallit inuiaqatigiit nipilersoriaasiannik kulturianillu ilinniarnera assut nuannerpoq.

- Tusarnaariat nipilersoqatigiillu qisuariarnerat erinniarsuup qanoq killitsinnartigineranik nuannertigineranillu ersersitsilluinnarpoq.

Joshua Weilersteinip Amerikamiuugami kalaallimit erinniarsuaq imminut pingaaruteqangaartutut isigisimallugu erseqqissarpaa.

- Amerikamiuugama Arnannguup erinniarsuanik tusarnaartitsinissaq nunarsuarmi politikkikkut pissutsit maanna atuuttut eqqarsaatigalugit aamma piffissami Kalaallit Nunaata unammilligassaqarfiungaartumi matumani kalaallit inuiaqatigiinnut tapersersuinerannik ersersitsinissaq eqqarsaatigalugu uannut immikkut pingaaruteqarpoq, Joshua Weilerstein oqarpoq.

Tusarnaariat pilluaqqusisut

Erinniarsuarmik tusarnaartitseqqaarnermi Aalborgimi nipilersoqatigiissuit tusarnaartartutoqai pingaarnertut tusarnaariartuupput, aammali inuit Kalaallit Nunaannut attuumassuteqartut arlallit takkupput.

Kikkut tamarmik nuannaarput. Ingammik aallarniut oqaluuserineqarluarpoq – Arnannguaq Gerstrømilu, unillatsiarnermi ilaquttanilu qaninnerusut paarlersuarmut anillakkami assamminneqaqattaarlunilu pilluaqquneqaqattaarpoq.

- Tusarneqaaq - tulluusimaarutigingaarpatsigit, sakia Jette Posborg oqarpoq.

Isiginnaariat aamma assammikkumallutillu erinniarsuaq pillugu qujasarmata viinni qaamasoq nillaarissoq ataasiaannarlugu najorsiffigaa.

Nordjyskemi naliliisartoq, nipilersornermi professori Tore Mortensen, tusarnaartitsineq Sibeliusip Rachmaninovillu erinniaannik aamma atuiffiusoq tallimanik ullorialerlugu nalilerpaa.

"Nipilersukkat kusanartumik erinnerneqarsimasut assigiimmik ilusilersorneqarput, Gerstrømillu nipilersoqatigiissuit pikkorissut pinngortitap pissusiinik inuiaallu kinaassusianik marlunnik, ullumikkut kalaallinut piviusunik, ersersitsinissamut atorluarpai. Erinniarsuaq nuannersoq pissanganartorlu, suliamik nutaamik malitseqartinneqartariaqartoq,” Tore Mortensen Lines of Belonging pillugu allappoq.

Arnannguaq Gerstrøm erinniarsualiortutut maanna soqutigineqarluarpoq. Taanna agiartartut sisamaasartut atorlugit erinniarsuami A Bad Ice Year-ip tusarnaartinneqaqqaarnissaanut sapaatit-akunnerani matumani Skotlandip avannaani Orkneyp qeqertaanniippoq.

Tusarnaartitseqqaarneq Danmarks Radiomit immiunneqarpoq. Tusarnaartitsineq tamarmi DR P2-kkut septembarip 18-ianni nalunaaqutaq 19.20 aamma septembarip 26-ani nalunaaqutaq 12.15 tusarnaarneqarsinnaassaaq. Piffissaliussat danskit nalunaaqutaat malillugu piffissaliussaapput.