Arnaq 78-inik ukiulik Sisimiunut arfineq-pingajussaanik pisuttuartoq

Maria Sethsen, Nuummiu Danmarkimi najugalik, Kangerlussuarmiit Sisimiunut ulluni aqqanilinni pisuttareerluni juulip 18-ianni apuuppoq.

Arnaq qallunaaq 71-inik ukiulik aalajangersimasumik pisuttuaqatigisartakkani ilagaa.

- Sisimiunut apuulluni nuannernerpaavoq, Maria Sethsen angalareerluni Danmarkimut uternermi kingorna AG-mut allappoq.

- Aqqutaani naapitsigaangatta ukiukka taasarakkit, tupigusuttarput, ilai oqartarput namminneq aamma uattut utoqqaliumaarlutik suli piginnaaneqarlutik, oqaluttuarpoq.

Maria Sethsenip inoqarfiit taakkua marluk akornanni pisuffigineqartartoq nuannarineqarluartoq 2016-imi siullerpaamik pisuttuarpa. Ernuttani taamani ilagaa.

– Sisimiunut 2016-imi apuunnerput nuanneqaaq. Jornguma pania, arnaa ilaqutaalu erfalasulerlutik allagartalisarlutik tikilluaqqusiartorput. Apuunnerput puigunaaqaaq, eqqaamasalikkersaarpoq.

Maria Sethsenip pisunneq nuannarilerpaa, aasaq mannalu 165 kilometerit arfineq-pingajussaanik pisullugu.

- Pinngortitarsuaq pisullugu angalaarfigalugu timimut eqqarsartaatsimullu nukissanik tunisisaqaaq.

Angalaneq tamaviaarnarpoq, qummukajaat qaangeruminaapput kuuillu arlallit ikaarneqassallutik — arnalli ilagisatik aqqutaanilu naapitatik peqatigalugit taakku qaangerpaat.

Arctic Circle Trail naggammik maanna pisuffigalugu isumaqatigiipput.

- Aamma taama ukioqalereerluni qasunalaarpoq, Maria Sethsen oqarpoq. Septemberimi 79-inik ukioqalissaaq.

Pisuttuartarnerit eqqaamasallu inuunermi sinnerani eqqaamajuassallugit oqaatigaa.