Uummannami illumi ataatsimi ini filmliorfittut ilerpoq.
Nive Nielsenip guitarini qaamasoq tigummiarlugu inimi kalaalerpaluttunik ulikkaaqqasumi issiavoq. Qaqqat, immap sermillu assingi iikkami nivingapput, timmiaq kiversimasoq nipilersortartut qulaani aarsaarpoq, taassumalu eqqaani violini, nipilersortut qilaatersortartullu nipilersuummut ilaasarput.
Nive Nielsen kisimi sammineqassanngilaq. Violinertartoq saqqummerpoq, arnat qilaatersortut aamma peqataapput, peqataasullu arlallit Uummannap Meeqqat Angerlarsimaffiannit, Nivep meeqqanik nipilersoqatigisaanik, peqataapput. Ilaatigut aamma arnaq inuusuttoq takisuunik nujalik. Taanna tassaavoq Nive Nielsenip pania.
Nive Nielsen & The Deer Childrenip saqqummersitassaanni oktobarip qulingiluaani saqqummersussami erinarsuut My Mother’s Namemut videoliarineqarpoq.
Nive Nielsenip pania erinarsuummik tusarnaartitsimmat oqaluttuaq imaqarnerulerpoq, erinarsuummimi arnat Nive Nielsenip siulii — anaanani, aanani aanaqqiinilu — ersersinneqarmata videoliami aamma kinguaariit tulliuttut ilanngunneqarput.
Arnat taassuma siulii
- Anaanaga aanagalu taakkualu siulii eqqarsaatigilerpakka, Nive Nielsen oqaluttuarpoq.
Arnat assorilisimaarsimagaluarlutik akiuuttuartut taassuma oqaluttuarai.
Oqaluttuat sakkortuut ilaat kinguaariit arlallit matuma siornatigut Nivep aanaqqiianut, panimmik toqukkut annaasaqartumut ernuttaminillu isumaginnissimasumut tunngatinneqarpoq.
Tamanna angutit pissaaneqassusaata suli atuunneranut, uppernarsaataavoq. Tamannalu arnanut angutinullu peqqinnanngilaq.
- Nive Nielsen
- Aanama anaanaa siusissukkut toquvoq, taamaammat aanaavata utoqqanngoreersup ernuttani najorumallugu umiamik Qullissaniit Uummannamut ipulluni aallarpoq, Nive Nielsen tulluusimaarluni oqaluttuarpoq.
Aanaqqiiata ernuttani taamaalilluni isumagilerpaa. Toqunnginnerminilu ernuttani qeqarnissaanut kalaallisuuliuuppaa.
- Ernuttami kalaallisuuisa naammassinissai angumerai, erinarsortartoq misilittagaqarluartoq taama oqarpoq, taassumalu nipilersuutini inuit indie-nik (saqqummersitsivimmut attuumassuteqanngitsut, aaqq.) taasarpai.
Tamannaana My Mother’s Namemi isumassuillunilu nakussatissutaasoq.
Taamaammat oqaluttuarisaanermut ilaasut tassaaginnanngillat atit qaniginerpaasalluunniit, tassaappulli naleqartitaat, misilittagaat akisussaaffiilu kinguaariikkuutaani kingornunneqartartut.
Nive Nielsen kinguaariit ingerlaneranni allami inissisimalersimavoq, paniatalu Uummannami videoliami peqataanerani kinguaariit imminnut atanerat erseqqilluinnarpoq: Nive arnanut nammineq kingoqqiffigisamit kinguaariillu tulliisa akornanniippoq.
Saqqummersitat ukiut aqqanillit nikingasut
Nive Nielsen & The Deer Children kingullermik saqqummersitaqarmata ukiut aqqanillit qaangiupput. Feet First 2015-imi saqqummermat nipilersorneq taamaatinneqanngikkaluartoq inuunermi allat pingaarnerulersimapput.
- Pisoqangaatsiarpormi, Nive Nielsen oqarpoq.
Aanaanngorpoq, taava corona atuutilerpoq, tusarnaartitsinerit taamaatinneqarput isiginnaartitsinermilu sulineq sulinerup ingerlarngani initunerulerpoq. Nunani tamalaani filmiliornermi peqataaneq aningaasaqarnikkut ataqatigiissaarinissamut iluaqutaavoq, aammali saqqummertarnissaminit qasuersaarnerusinnaanermik ilinniarfigaa. Isiginnaartitsisarfimmi siornatigut ittoortaqaaq, qanorlu ilassineqarnissanilu isumakuluutigalugu.
- Isumaqarpunga iperaasinnaanerulersimallunga, oqarpoq
Nive Nielsen & The Deer Childrenip immiussartik My Mother’s Name oktobarip qulingiluaani saqqummersissavaat, Kalaallit Nunaallu angalaarfigisassat ilagaat – angalanerit qaqugu ingerlanneqassanersut suli aalajangerneqanngilaq.
Assi: Nammineq pigisaq
Nive Nielsen nipilersukkanik suliaqarnermini aamma taamaappoq. Erinarsuutit immiussai pilertortumik immiunneqarneq ajorput, ilai pissusissamisut nammineq inissittarput, ilaat taassuma isumaata naammatsinnissaata tungaanut arlaleriarlutik immiunneqartariaqartarlutik. Immiusseqqinnerit immaqa pitsaassusermik pingaartitsisuuneq pissutigalugu siornatigut ingerlanneqartarput, allanngorsinnaasoqartuaannarmammi.
- Siornatigornit sanilliullugu maannakkut sukkanermik suliaqarsinnaalersimallunga isumaqarpunga, taanna oqarpoq.
Taamatuttaaq erinarsuusiami nammineq paasinnittarnermisut tusarnaartartunit paasineqartarnissai tiguartisimaffigivallaarunnaarsimavaa. Inuusunnerungallarami tusarnaartut taalliami nammineq paasinnittarnermisut paasineqartarnissaa kissaatigisarsimavaa. Erinarsuusianili ullumikkut nammineq paasineqartussatut suliarai.
- Taalliornerup pitsaaqutaa tassaavoq inunnit assigiinngitsunik piffissaq qanoq ikkaluarpat paasineqarsinnaasarnerat.
Aamma tamanna ukiut aqqanillit qaangiuttullu allannguutinut pissutaasinnaavoq: nipilersukkap isumaa aquttariaarullugu — allallu erinarsuutip namminneq paasinnittaatini atorlugu paasinninnissaanut periarfissillugit.
Ilaqutariittut oqaluttuaannaanngitsoq
Erinarsuut My Mother’s Name ilaquttamini arnanut aallaqqaammut tunngatippaa, suliarli ingerlatillugu ilaqutariit oqaluttuarisaanerat kisiat eqqarsaatigiunnaarlugu aamma arnat — inuillu allat tamarmik — silarsuaat eqqarsaatigilerpai.
Naleqartitat ilaannikkut mumingasinnaasartut, aningaasallu, angusaqarluarsinnaaneq pigisallu inunnit pingaarnerutinneqartalersimasut oqaluttuarpoq.
- Naggataatigut toqugutta tamakku eqqaamajunnanngilagut, tamakkumi naleqartissimanngilagut, taanna oqarpoq.
Tassunga erinarsuutip qulequtaa ataqatigiippoq. Inuit tamarmik anaanaminniit inunngortarput, taamaalillunilu inuit tamarmik aningaasat inissisimaviilluunniit apeqqutaatinnagit iluminni naleqalersarput.
Tassanngaanniit eqqarsaatit suiaasusermut pissaanermullu ikaarsaarput. Anaanat pissaaneqarnerugaluarpata erniusut sorsungaartinnginnerini immaqa eqqarsarluaqqaartoqartariaqaraluarpoq.
Trumpi arlaatigut eqiiallatitsisoq
Taamaalilluni Donald Trump oqaluttuamut pulavoq. Donald Trumipip arnat pillugit isiginnittaasia Nive Nielsenimut aalassatsitsivoq, tassami angutit naalagaassusaat suli nukittuumik inissisimavoq.
- Tamanna angutit pissaaneqassusaata suli atuunneranut uppernarsaataavoq. Tamannalu arnanut angutinullu peqqinnanngilaq, taanna oqarpoq.
Nivep oqaloqatigiinneq tamanna Trumpip Kalaallit Nunaat pillugu oqaaseqaqattaartarneranit immikkoortikkuminaatsittarpaa. Aammattaaq USA inuuneranut attuumassuteqarluarpoq. Uia, nipilersortartoq Charles Shapiro – Charlie – Amerikamiuuvoq, ilaqutariillu USA-mi Danmarkimilu najugaqarsimapput. Aarhusillu avannaatungaani Langåmi maanna najugaqarput.
Charlie Trumpimut isornartorsiuisuusoq Nive oqaluttuarpoq, taanna taassumalu ilaqutai ikinngutaalu aqqutigalugit USA-mi ineriartorneq Amerikamiut isiginnittaasiannit malinnaaffigisimavaa. Trumpilli Kalaallit Nunaat pillugu oqaasii immikkut eqqortissutigai.
- Qanimut malinnaaffigalugit artornarsimaqaaq. Angerlarusuvissoraluarpungami, taanna oqaluttuarpoq.
Kalaallit Nunaat pillugu pissutsit ilungersunarnerpaaffianni, misigisamilu kingorna Trumpip “tikiutingajalernera” erseqqilluinnarmat, suli sakkortunerusumik misigivoq.
- Oqimaassimaqaaq.
Trumpi naleqartitagut siornatigut eqqarsaatigineqarpiarneq ajortut pillugit inunnik qisuariartitsisimasoq Nive isumaqarpoq.
Nive Nielsen ukiut aqqanillit qaangiuttut saqqummersitseqqippoq. My Mother’s Name ilaquttami arnartai aallaavigalugit isumassarsiarineqarpoq.
Assi: Nammineq pigisaq
- Ajortuugaluarluni naapertuilluanngitsuliornerit immaqa akueriinnartarnerigut, immaqalu eqqartornerusariaqarlugillu eqqarsaatiginerusariaqarigut inuit eqqarsartaasiannik allanngortitsillunilu eqqaasitsivoq.
My Mother´s Name Trumpi pillugu taalliarineqanngilaq. Nivep politikkikkut allanngoriartornerit arnat, pissaaneqarneq inuillu naleqassusiat pillugit apeqqutinut saqqummersitani sammineqartunut kajumilersissutigilersimallugit oqaatigaa.
- Imaassinnaavoq arlaannik pissuteqarlunga tamakku sammilerikka, qamuunalu ilumioqartugut eqqaasinneqarpunga. Eqqaamasariaqakkatsinnik peqarpugut. Oqaluuserisariaqakkatsinnik peqarpugut.
Erinarsuutit maanna Naalagaaffeqatigiinnermi tusarnaartitsisarfippassuarni tusarnaarteqqinneqassapput.
Nive Nielsen & The Deer Children Danmarkimi novembarimi tusarnaartitsissapput, aamma Kalaallit Nunaanni tusarnaartitsinissartik pilersaarutigaat.
