Avannaata Qimussersuaqarnissaanut kissaatit: Issi apullu
Anngunniuffiit tamangajammik unammiffissaq ilanngullugu aputissaasuallutillu sikuniaataarput. Qimussimik sukkaniuunnissarsuaq Qasigiannguani marsip 28-ani pisussaq kinguartinneqassanersoq allamulluunniit nuunneqassanersoq KNQK-mit isumaliutersuutigineqarpoq.
Sisimiuni siorna Avannaata Qimussersuaqarmat aputissaaleqisoqanngilaq.
Assiliisoq: Oscar Scott Carl
Kalaallit Nunaanni Qimussertartut Kattuffianni siulittaasoq Mikkel Jeremiassen ulluni makkunani silasiortuarpoq. Avannaatami Qimussersuani unammisussat ukioq manna pilersaarutaasumik katillugit 27-ussanersut nalorninarpoq.
Taakkuami anngunniuffissaat tamangajammik sikunngitsoorsimanngikkunik aputissaasuapput.
- Akuttupput, imaakkajuttarnikuugami aput amigaataanani, kisiannili sikkorlulluni imaluunniit sikunngittuupajaarluni. Massakkut ataatsikkoortutut oqaatigisariaqaramik. Siku amigaataavoq, kisianni aamma aput amigaataavoq, Mikkel Jeremiassen taama oqarpoq.
Sumiiffippassuarni issaasannera, sikuniaasaarnera aputissaaasuaneralu KNQK-mit Qasigiannguanilu unammersuarnissamut aaqqissuisunit ulapisitsivoq.
- Kipiluttunarpoq, aamma uagutsinnut qaavatigut sulinarpoq.
Mikkel Jeremiassen siorna Sisimiuni sukkaniunnermi malinnaaqqissaarpoq.
Assiliisoq: Arnaq Nielsen
Nuunneqarataannaavoq
Silap taama atugassaqartitsinera peqqutigalugu ulloq unammiffissaq nuunneqanngikkuni unammersuarfissap sumiiffia nuunneqarataannaavoq. Qasigiannguimmi unammersuarfissaasoq ilanngulluni aputissaasuavoq.
- Suli maanngamut marsip 28-at siunertaralugu sulinerput ingerlavoq. Kisianni aamma apriilimut nipituumik eqqarsaqatigiilluta pivugut, Mikkel Jeremiassen oqarpoq nangillunilu.
- Kisiannilu taama oqaannarsinnaanata. Qulakkeeqqaangassaagami timmisartussaqassanersugut ilumut apriilimut kinguartitsisoqassappat.
Apriilimmi aallartinnerani poorskissaaq, poorskillu nalaa angallaffiungaatsiartarmat kinguartitsisinnaaneq nalorninarpoq. Upernaviup Uummannallu anngunniuffianeersut aamma Sisimiuneersut timmisartumik unammiartarput. Unammersuarnissaq kinguartinneqassanersoq allamulluunniit nuunneqassanersoq qaammat una naappat aalajangiisoqassaaq.
- Aaqqissuisullu aalajangiunnikuuarput aalajangiinissaq kingulleq februaarip naanerani pissasoq. Tassani aalajangiiumaarpugut, pinngortitap qanoq atugassaqartinneraatigut takulaariarlugu.
Ilulissaneersoq Henrik Jensen siorna Avannaata Qimussersuanngorpoq.
Assiliisoq: Oscar Scott Carl
Sungiusarniarneq erloqinartoq
Avannaata Qimussersuanut peqataaniaraanni piareersarluarnissaq pisariaqarpoq.
- Unammineq taanna sakkortuujugami, qimmit qasujaallisarluakkat qimuttorineqartarput. Piffissamik aamma taanna atuinartarami, Mikkel Jeremiassen oqarpoq.
Piffissap imaalinerani sungiusarneq aallartereersimasussaagaluartoq anngunniunniartut sungiusarfissaasuapput. Anngunniuffinni qulingiluaneersut sungiusarfissaasa aputaasanngikkuni sikuniaataarnera peqqutigalugu peqataaniartut ikippallaassanngitsut KNQK-mi siulittaasup neriuutigiinnarsinnaavaa.
- Qimussip nammineq aalajangissuaa qimunneri annikippata anngunniunnermut ilaassanerluni.
Neriuutilli annerpaartaraat apillunilu sikumi unammiffiusartuni sikunissaa. KNQK-p siulittaasua neriuutissaqarnerarpoq.
- Pitsaanerulaanngualaarpoq issakkunni aputeqannginnersuaniit. Apilaartiternikuugatta suamik. Taava aamma soorlu maani Uummannami februaarip 18-iata missaani 20-nik issilissasoq siulittuutaavoq, Mikkel Jeremiassen taama oqarpoq.
Suut tamarmik pilersaarutaasutut pissariarpata Avannaata Qimussersua arfininngornermi marsip 28-ani Qasigiannguani pissaaq.
Meeqqat sukkaniunnissaat Avannaata Qimussersuaaraa pingasunngornermi marsip 25-ani pisussatut pilersaarutaasoq.
