Aviaq Reimer Olsenip tupinnartuliat upperai, aamma nammineq pisariaqartissimavai

Aviaq Reimer Olsenip puisip amia naamassallugu sungiusimavaa.

Ilaqutariinni mersortartuni inunngorpoq, meeraanerminilu angerlarsimaffimmini tamanna naamasarsimavaa. Aanaata aanaqqiiatalu kalaallisuut peqqissaarlutik ilaqutariit kinaassusiat ersersillugit mersortarlugillu kamiit inuttami isigaannut naammaqqissaartut mersortarpaat.

- Perungaatsiareerlunga aatsaat nalinginnaasunik kamippattaarpunga, Aviaq Reimer Olsen oqaluttuarpoq.

- Kamiit aallaqqaammut qanoq qeratatigisartut eqqaamavara, oqarpoq nangillunilu:

- Ammit taamaapput.

Aviaq Reimer Olsen maanna ullut tamaasa Kittani (Nuummi mersortarfimmi), Amitsilami (Qeqertarsuatsiaani mersortarfimmi) aamma Ammiamiimi (Kapisilinni mersortarfimmi) immikkoortortaqarfimmi pisortatut tipimik taassuminnga naamasaqartarpoq. Tassani puisip amianik naqqaniit suliarinnittarput, kiisalu assassornermi ileqqutoqqanillu ilisimasatik atuartunut takornarianullu ingerlateqqittarpaat.

- Inuiattut assuutigut asanninnermik sanaajupput, Aviaq Reimer Olsen oqarpoq.

Tamannalu ilisimasaqarfigaa. Asanninnermi qanoq pissaaneqartigisoq inuunermini ilinniarsimavaa.

Iffiukkat sikaritsillu

Aasianni meeraanermini angerlarsimaffiani puisip amiata tikka iffiukkat sikaritsillu tikkanik ilaqarpoq. Tassani Aviaq Reimer Olsen anaanani Lillian Brandt Reimer aatakkunilu najugaqarput. Kingusinnerusukkut aqqaluai marluk inunngorput. Angajullersaavorli - ernutaqqaataallunilu ernutaqqiuteqqaataavoq, aamma Aasianni najugaqartoq soorluttaaq utoqqartai aamma nunaqarfinnit mikinernit Qeqertarsuup Tunuaniittuneersut.

- Igalaaminertut kikkunnit tamanit paarineqartussatut misigivunga. Asaneqartorujussuullungalu toqqissisimasupilussuuvunga, Aviaq Reimer Olsen oqarpoq.

1993-imi novembarip 22-anni inunngorpoq. Ulloq taanna angaava qulleeqqanik tunguusanik 93-inik aatakkuisa illuannut nivinngaavoq. Illu qaqqajunnamiippoq, kikkullu tamarmik takusinnaavaat: Inunngorpoq. Ullumikkut ileqquuvoq. Aviaq Reimer Olsen inuuissioraangat qulleeqqat ilaqutaasa igalaavini ikumasarput, taamaalillunilu illoqarfimmiut tamarmik inuuissiortoq naluneq ajorpaat.

Ikinngutiginerpaasani Uiloq Kaspersen meeraaqatigaa. Ulloq ataasiinnaq nikingallutik inunngorput, taamatullu aamma, qimassanatik, alliartorput.

- Immitsinnut perlaartarlutalu singernigut qilertarpagut, Aviaq Reimer Olsen oqaluttuarpoq.

Qimmeqarput, qimmillu piaqqigaangata Aviaq Reimer Olsenip Uiloq Kaspersenillu inuusatut atisalersortarpaat. Naak ullumikkut illoqarfeqatigiikkaluarlutik takorpiarneq ajorput. Takugaangamillu arnat marluk taakkua akornanni suut tamarmik qangatut ipput, imminnut malinnaavigipput.

- Qitornannut Aja Uiluuvoq, paniannullu Aja Nipituujuvunga, Aviaq Reimer Olsen oqarpoq.

Napparsimmaviup tikka

- Anaanaaqisunga inuppassuit oqartarput. Aammali meeqqakka inuunerup toqullu akornanniittut isiginnaarnikuugakkit taamaallunga isumaqarpunga, Aviaq Reimer Olsen oqarpoq oqaluttuarlunilu:

- Taamaammat napparsimmaviup tikka saperpara. Tassani ersillungalu soriarsinnaanngitsutut misiginikuuvunga, taanna oqarpoq.

Ernini Malik inunngormat Aasianni GU-mi ilinniarnertuunngorniarpoq. 2012-imi decembarimi ukiut pingajussaarluni allaaserinnittussanngoruttortoq ernisuliaarnissaa nakorsat annilaanngatigaat. Taamaammat Nuummut aallarunneqarpoq.

- Erseqalungalu kiserlioqaanga, Aviaq Reimer Olsen oqaluttuarpoq.

Meeraata uumaannarnissaa aarlerinartoqartoq nalunngilaa, Nuummilu ilaqutaqanngilaq. Ilaqutariilli Kuutak Reimer Olsenip, ullumikkut uiata, illoqarfiit pingaarnersaannut tikinnissaanut angajoqqaanngortussallu napparsimavimmi juullisioqatigiinnissamut oorinik katersipput.

Malik 2013-imi januaarimi, qaammatip ataatsip missaanik inorluni, inunngorpoq. Ilaqutariit Aasiannut uteqqinnginnerminni sapaatip akunnerini marlunni napparsimmavimmiipput. Sapaatip akunnera ataaseq qaangiummat ilinniarnertuunngorniarnini nangeqqippaa.

- Sakkortoqaaq, taanna oqarpoq.

- Erninermulli atatillugu sunngiffeqartarneq pikkoriffiginngilara.

Ukiup affaa qaangiuttoq, agguaqatigiissillugu angusarissaarnerpaalluni, ilinniarnertuunngorniarfimmi nasartaarpoq. Malik qaammatini arfineq-pingasuni siullerni aqqaneq-marloriarluni napparsimmavimmi uninngasaraluartoq naammassivoq. Naartunermini erninerminilu allanngorartoqaannaavissimanera pissutigalugu taama ateqalerpoq.

- Kristumiuuvunga, upperisarali ulluinnarni aallutinngilara. Taamaammat Guutimut qinunngisaannarpunga, meeqqagulli annaaleratsigit qinusarpunga, taanna oqarpoq nangillunilu:

- Asanninneq inuunermik annaassisartoq tupinnartoqartorlu upperalugu oqartuaannarpunga.

Tupinnartuliat pisariaqartinnikuugassigit?

Aap, arlaleriarluta.

Immussuaq aatsitaq

Aviaq Reimer Olsen meeqqat atuarfianni atuareerluni Danmarkimut efterskoleriarpoq.

- Ataatsimoorfiungaarmat nuannareqaara, taanna oqarpoq.

Ulluni taama atorusunneruai, inunnik avatangiiseqarluni.

Illoqarfimmi mikisumi Karupip kujataatungaaniittumi efterskolemi ukiumi ataatsimi atuarnermini nammineersinnaaneq ilinniarpaa. Niviarsiaqqat pingasut ineqatigai. Tassani iffianik patitanik sikatsitsisarmata immussuup aatsitap tikka naamaneqarsinnaasarpoq.

- Tamanna eqqumiigeqaara, taanna oqarpoq.

Aviaq Reimer Olsenip kulturimik allamik naapitsinermigut nammineq qanoq ittuunerluni aamma paasivaa: Sumiiffimmi inuit tamarmik imminnut ilisimasuninngaanneerpoq.

- Taxaraangama sumukalernersunga aperigaanganga angerlarsimaffik oqaatigisariaqanngilara. Kikkunnukalernerlunga oqaannartarpunga.

Efterskolemi allatut paasiuminartuunissaq ilinniartariaqarpaa.

- Paasinneqassaguma oqaaseqartuartariaqarlungalu nassuiaasariaqarpunga, Aviaq Reimer Olsen oqarpoq.

Aammattaaq Kalaallit Nunaat kalaallillu pillugit ilisimasakitsoqarnera maluginiarpaa. Efterskolemi ullut siulliit ilaanni ineqataata neriartoqataarusunnersoq aperaa.

'Danskisut paasisarunanngilaq' ineqataa Aviaq Reimer Olsen oqaatsinik akinngimmat ilaminnut oqarsimavoq.

- Imaappunga: Sooq qallunaatut oqalussinnaanngissoraanga?, Aviaq Reimer Olsen oqarpoq.

' Ilami akinngilatit, eqqumiitsumik kiinarsuinnarputit', ineqataa oqarpoq. Ineqatigiilli imminnut ilikkalertorput, taamaalillutillu suli maannamut ikinngutigiipput.

- Aamma uanga taakkunannga ilikkagaqaqaanga, Aviaq Reimer Olsen oqarpoq.

Kulturinik assigiinngitsunik soqutigisaqarnera ilinniagaqarnissaanut suliffianullu aalajangeeqataavoq.

Ilisimatusarfimmi inuiaat kulturiat oqaluttuarisaanerallu ilisimatusarfigai, inaarutaasumillu allaaserisamini Nuummi GUX-imi ilinniartut ilinniartitsisullu akornanni kulturikkut paatsooqatigiittoqarsinnaanera allaaseraa. Ilinniartitaanermi soqutigilluarpaa, namminertaarlu ilinniarnertuunngornianut atuartitsisarsimavoq.

Ilisimatusarfimmi piffissap kingumut qiviarnissaa oqaluttuarisaanerlu atorlugu ullumikkut pisut paasinissaat ilikkarpaa:

- Kinaasugut, suminngaanneernersugut aamma sooq kulturerput taamaannersoq, taanna nassuiaavoq. Kalaallisuut assersuutaapput.

- Sooq taama amerlatigisunik najoqqutassiaqartarlutalu qanoq isikkoqarnissaa pillugu isumaliutersortarpugut? Aviaq Reimer Olsen anaanami aanaminilu oqaasii issuarlugit oqarpoq:

- ‘Qalipaatit assigiissapput, una taama takitigissaaq, amerlu una puisup taannarpiap amianik sananeqassaaq, kamiillu qaqortuussallutillu ima mersorneqassapput.'

Kalaallisuut ilaatigut imminut ilisaritinnertut, ammerillaqqissuunermut nuliaalluartuunermullu takussutissaavoq, taanna nassuiaavoq nangillunilu:

- Ilaquttakka toqqaannartumik uannut taama oqarnikuunngisaannarput. Ilisimaneqaannarporli.

Ilisimatusarnermini paasinnilernartunik misigisarpassuaqarpoq, soorlu attaveqaatinik nutaanik paasisaqarluni ilisimasallu pigeriikkani oqaasertalerpai.

Assaat tappiorannartuiakkat

Aviaq Reimer Olsen 2016-imi ilisimatusarluni naartuleqqippoq. Ernivissaa oktobarip 28-anut ullulerneqarsimavoq, aqaguanilu misilitsittussaavoq.

- Piffissaq eqqorlugu misilitsinniassagama suli ullualuit naartussasoq neriuutigaara, Aviaq Reimer Olsen panini Ivaana pillugu oqarpoq.

Taamaattoqanngilarli.

Aviaq Reimer Olsenip meeraa siulleq inorluni inuunikuummat aappassaanik naartunera qanimut malinnaavigineqarpoq. Naartunerata aallaqqaataa aggustimi misissortinnissaata tungaanut ajornartorsiuteqarpallaanngilaq. Ingerlaannaq unitsinneqarluni innangaannartussanngortinneqarlunilu oqarfigineqarpoq. Tamannalu ajornartorsiulersitsivoq. Kuutak Reimer Olsenimi Kangerlussuarmi sulivoq, Malillu meeqqerivimmiippoq.

Tupinnartulialli taakkua ilaqutariittut misigisimasaasa ilaat pivoq.

Ulloq taanna timmisartoq ataaseq ataatsimik inissaqarpoq. Kinguaattoormallu Kuutak Reimer Olsen meeqqerivik matutinnagu ilaquttaminut tikissinnaanngorpoq.

- Taamaammat timmisartut kinguaattoortarnerat ilaannikkut iluaqutaasarpoq, Aviaq Reimer Olsen oqarpoq.

Ullut arfineq-pingasut qaangiummata Ivaana nalunaaquttap akunnerisa marluk minutsillu 15-it ingerlaneranni sapaatip-akunneri qulit sioqqullugit erniaraa. Aasarissuuvoq kiallunilu, eqqaamavaa, ernisarfillu suli kianneruvoq:

- Anersaartorniarpiarsinnaanngingajappugut, Aviaq Reimer Olsen oqarpoq.

Ernisarfik sulisunik assaminnik tappiorannartuiaannaavissunik ulikkaarpoq. Aviaq Reimer Olsen piareersimagaluarluni misigisaminik upperiuminaatsitsivoq:.

- Inoqaqalunilu pisoqaqaqaaq, meerarpullu qanoq innersoq eqqarsaatigersuaarpara, Aviaq Reimer Olsen oqarpoq.

Ernineq ilungersunarpoq, Ivaanalu aniguissanersoq sivisuumik nalornissutigineqarpoq. Inuunera napparsimmavimmi nakorsat maskiinallu malinnaaffigaat. Aviaq Reimer Olsenip tamanna sivisuumik akueriniarsaraa. Ivaanalu inunngormat juumooq oqarpoq: 'Panissaarpusi'.

- Taava qissasiinnarpunga, uigalu qianngisaannaraluartoq aamma qiavoq.

Panitsik ajunnginnersoq aperigamik akineqanngillat. Nakorsalli panimmik misissuisut ilaata niaqquni nuisillugu angajoqqaat ima oqarfigigai: 'Qingaa arnisarpoq'.

Mikeqaaq. Mikingaarami assaa Aviaq Reimer Olsenip kulluanut nermussinnaanngilaq.

- Inunngortut allat assigalugit aappalunngilaq. Qernerujullunilu pullappoq, Aviaq Reimer Olsen oqaluttuarpoq. Ivaana inuunerminit ulloq unnuarlu siulleq 22-riarluni anersaartorunnaaraluarpoq.

Aviaq Reimer Olsen qinuvoq. Panissaartitsisortik paarsilluarumaarlutik neriorsorpaa.

Asanninnermi taamaaliortitsisarpoq.

- Paniat asanninnermik pinngortinneqarpoq, asanninnerlu aamma taassuma annassutigissavaa, Aviaq Reimer Olsen oqarpoq.

- Kuisissanersoq aperineqarpugut. Taamaalioruma tunniutiinnartutut misinnassammat taamaaliornianngilluinnarlunga eqqarsarpunga, taanna oqarpoq.

Tamarmik angerlareerunik aatsaat kuisissaaq. Angerlarpullu. Aallaqqaammut angerlarsimaannaqqaartariaqarput, naggataatigullu decembarimi inuit allat peqatigisaleqqilerlugit ilaqutariittut sisamaasutut inuuneq qilanaarilersinnaalerpaat.

Kaffi kaagilu

Naartusut allat assigalugit utaqqineq erninermi kingornalu pisussat pillugit naatsorsuuteqarfiuvoq.

- Uannummi pakatsinarpoq. Meeqqakka pinnagit, timigali qanorlu misigisaqarnera pakatsissutigaakka, Aviaq Reimer Olsen oqarpoq.

Misigisaq tamanna allanut oqaluttuarissallugu åisariaqartippaa. Taamaammat Facebookimi qupperneq Inortumik meerartaarnikut pilersippaa. Taanna aqqutigalugu arnat allat nunatta peqqinnissaqarfiani inortumik meerartaanikut naapippai.

- Ilaat ilisarisimavakka. Naluinnarparali inortunik meerartaarsimasut, Aviaq Reimer Olsen oqarpoq.

Meeqqat inorlutik inunngornikut pillugit unammillernartut ersarissarniarlugit 2018-imi tamanut ammasumik ataatsimiititsivoq.

- Peqatigiiffimmilu pilersitseriasaarput (Kalaallit Nunaanni Inorlutik Inunngornikut Peqatigiiffiat, aaqq.), uangalu siulittaasunngorpunga, Aviaq Reimer Olsen, qaammarsaanermik suliaqarnini pissutigalugu nersornaatisisoq, oqaluttuarpoq.

Ilaatigut angajoqqaat meerartaaminnik inorlutik inunngorsimasunik perorsaasut ajornartorsiungaarnerminni amerlanertigut kisimiittarnerat qaammarsaaviginiarlugu inorlutik inunngorsimasut nunarsuaq tamakkerlugu ulluat malunnartippaat.

Peqatigiiffik ukiuni pingasuni piuvoq.

Puisit amiisa tikka

Aviaq Reimer Olsen isumassarsigaangami piviusunngortinniartuarpai. Meeraalluni tungeq atorlugu nivingasumik siniffiliorniassagami aatakkuni kikiannik qilaamut ikkusseqquai.

Takornarissat ammerivimmi takornariartinneqarumasut amerliartormata Aviaq Reimer Olsen iseraangamik akiliisarnissaannut qinnuteqarsimavoq. Aamma Ammiamii ukiup ingerlanerani amminik suliarinnissinnaaniassammat containerimik qerititsivimmik nutaamik qinnuteqarsimavoq.

Suli kalaallisuuliorneq ilinniarpaa - aamma ullumikkumut nalimmassarniarpai.

- Siornatigut ilaqutariinni arnat utoqqaat ilaqutariinnut tamanut kalaallisuuliortarput, ilisimasaallu kinguaariinnut tulliuttunut ingerlateqqinneqartarput. Uangali aamma suliartortarama taamaaliorsinnaanngilanga, Aviaq Reimer Olsen oqaluttuarpoq

- Tamatuma saniatigut sila pissutigalugu pitsaasunik amiliorneq ajornakusoorneruleraluttuinnarpoq.

Taamaappat nutaamik aaqqiissuteqartoqartariaqarpoq. Ilaatigut Aviaq Reimer Olsenip ilaqutaasalu ukioq manna siusinnerusukkut aqqalussani apersortissammat nammineq mersorsimasaat tungujortut atorlugit aaqqiissuteqarput. Kalaallisuuni atorneqartartunik mersoruminarnerungaartunilli atugaqarput.

- Kalaallisuuliorneq attatiinnarneqassaaq, aammali ineriartortinneqartariaqartoq isumaqarpunga.