Dida G. Heilmann maajip 15-ianniilli Ilisimatusarfimmi ph.d.-nngorniarluni ilinnialerpoq, tassanilu ukiuni pingasuni tulliuttuni Kalaallit Nunaanni angutit, angutitut inissisimaffiit anguterpalussuserlu pillugit ilisimatusassaaq.
- Paasisaqarneruleqqissagama pissanganaqaaq. Tamannalu Kalaallit Nunaannut iluaqutaangaassaaq, taanna Sermitsiap Nuummi suliffittaavani naapimmagu oqarpoq.
Dida G. Heilmann maajip 15-ianniilli Ilisimatusarfimmi ph.d.-nngorniarluni ilinnialerpoq, tassanilu ukiuni pingasuni tulliuttuni Kalaallit Nunaanni angutit, angutitut inissisimaffiit anguterpalussuserlu pillugit ilisimatusassaaq.
- Paasisaqarneruleqqissagama pissanganaqaaq. Tamannalu Kalaallit Nunaannut iluaqutaangaassaaq, taanna Sermitsiap Nuummi suliffittaavani naapimmagu oqarpoq.
- Angutit inuusuttut taakkualu ulluinnarni inuunerminnut, angutaassuserminnut, isumassuinermut, inuiaqatigiinnut ilaanermut kinaassutsiminnullu isiginnittaasiat pillugu ilisimasat killeqarput, taanna oqarpoq.
Suliniut taaguuteqartoq „Masculinity, Care, and Environmental Change: Young Men’s Lives in Greenland“ (Anguterpalussuseq, isumaginninneq avatangiisillu allanngornerat: Angutit inuusuttut Kalaallit Nunaanni inuunerat, aaqq.) Danmarks Frie Forskningsfondimit 3,8 millionit koruuninik aningaasaliiffigineqarnermigut pivisunngorsinnaasimavoq.
Ilisimatusarneq Roskilde Universitetimi angutit pillugit ilisimatusarnermi lektorimit Kenneth Reinickemit siulersorneqarpoq, Ilisimatusarfimmilu issittumi atugarissaarneq pillugu ilisimatusarfik suleqatigineqarpoq.
Angutit inuusuttut inuiaqatigiinni pissutsit silaannaallu pissusiata allanngoriartorneranni qanoq inissisimaffeqalertarnersut kinaassutsimillu ineriartortitsisarnersut misissorneqassaaq.
- Angutit tusagassiutini imminut toquttoqarsimaneranut, ilinniakkaminnik unitsitsiinnartarnerannut pinerluttuliortarneranulluunniit tunngatillugu eqqaaneqartarput. Angutilli inuusuttut ulluinnarni qanoq isiginnittaaseqarpat?, Dida G. Heilmann aperivoq.
Hawaiimut New Zealandimullu sanillersuiartussasoq
Dida G. Heilmann 2021-mi perorsaanermi kandidatinngorsimavoq, tamatumali kingorna assiliinermik piviusulersaarusiornermillu suliaqartarsimalluni. Ilaatigut piviusulersaarusiaq Arctic Sport & Dene Games Nuummi marsip arfernani takuteqqaarneqartoq.
Ilisimatusarluni suliniut aallartikkuniuk issittormiut pinnguaataannik timersortartut attaveqarfigisartakkani atorluarnerussavai.
- Angutit inuusuttut Nuummi Qaqortumilu najugallit misissornerussavakka. Aammali issittumi inuit, Hawaiimiut New Zealandimiullu nunasiaataasimasut eqqarsaatigaakka.
Ilisimatuussutsikkut misissuinerit assigiinngitsorpassuit angutit pillugit sivisuumik sammisaqarfiusimapput. Sooruna angutit anguterpalussuserlu ilisimatusarfigissallugit pingaaruteqartoq?
- Soorlu oqaatigereeriga nunatsinni angutit inuusuttut taakkualu ulluinnarni inuunerat pillugit ilisimasavut killeqartupilussuupput, taanna akivoq nangillunilu:
- Taamaammat angutit inuusuttut pillugit assigiinngisitaarnerusumik pitsaanerusumillu isiginnittaaseqartoqalerumaartoq neriuppunga. Aamma anguterpassuit unammillernartitaat qanoq iliuuseqarfigineqarsinnaanersut paasineqalerumaartoq.
