Film.gl-imi siulittaasunngortoq: Ataatsimoorluta kivitseqatigiissaagut

Kalaallit Nunaanni filmiliortartut peqatigiiffiat Film.gl sapaatit-akunneri marlussuit matuma siorna ataatsimeersuarmat ilaasortaq Mads Madsen pappiaqqamik kaasarfimmioqarpoq.

Oqalugiaatissaq unnuaammat pappiaqqamut allassimasaa kaasarfianiippoq. Nalunartut pillugit. Film.gl-mi siulittaasunngorniuttoqalerpat oqalugiaatissaa.

Siulittaasuusoq Klaus Georg Hansen siulittaasutut sassaqqinniarani avammut nalunaaruteqarsimavoq, tamatumalu kingorna filmiliormi peqatigiiffiup ilaasortaasa, ilitsersuisoq isiginnaartitsisartorlu imminut ilinniartissimasoq Mads Madsen siulittaasunngornissaminut soqutiginninnersoq aperillattaalersimavaat. Siulittaasunngornissani soqutigissanerpaa?

Mads Madsenip tamanna nalornissutigisimavaa.

- Aallaqqaammut siulittaasunngornera iluamik paasinngilara. Kina siulittaasunngussanersoq takussallugu soqutigisimagaluarpara, taanna oqarpoq.

Aalajangertinnani allanik siulittaasutut sassartoqassanersoq paaseqqaarusuppaa. Ataatsimeersuarnermilu siulittaasunngorniunnissamut oqaluuserisassaq tikinneqarmat pappiaraq oqalugiaatissaminik allattuiffigisimasaa suli kaasarfianiippoq.

- Allamik qinigassanngortittoqassagaluarpat taanna qinersimassagaluarpara, Mads Madsen oqarpoq.

Sivitsortumik nipaallisoq nikuippoq, qinigassanngortinninilu nalunaarutigalugu pappiaraq qupperlugu atuarluni aallartippoq:

- Uaguuvugut inuussutissarsiutit nunarsuarmi artornarnerpaat ilaannik suliaqarusuttut, nuannaraarpullu. Piviusulersaarutit pisuusaartitalluunnit, allaat issittumi akissarsiallu annikippallaartut aqqutigigaluaraangatsigit suliagut pinngitsoorsinnaaneq ajorpagut. Taamatullu soqutigisamut tunniusimalluinnarneq uanga illersorusuppara.

Siulittaasunngorlaap qanoq taamaaliussalluni matumani oqaluttuaraa.

Periarfissaq atorluarneqassasoq

Mads Madsen arfineq-pingasut qulingiluallu missaanni ukioqarluni filmiliornermik soqutigisaqalerpoq. Filmiliornerli aatsaat ukiut tallimat matuma siorna Danmarkimiit Kalaallit Nunaannut nuunnermini inuussutissarsiutigilerpaa. Filmiliortarfimmik Arctic Creativemik ullumikkut piginnittuullunilu ilaatigut Grønlandsbankenimut Air Greenlandimullu ussassaarutinik suliaqartarpoq.

Mads Madsenip Klaus Georg Hansen, ukiuni arfineq-marlunni film.gl-imi siulittaasuusimasoq, kingoraarpaa. Ataatsimeersuarnermi oqalugiarnermini siulittaasutut tunuartup sulisimanera qutsavigaa, aamma politikkikkut tamaviaarluni naammagittartumillu suliaqarnermigut filmiliortartut nutaamik inissisimalersinnerini qutsavigaa.

- Klausip maannakkut inissisimaffiga tunngavilerpaa. Maannakkullu inissisimaffigiligara uannit kingoraartarinnittussanut tunngaviliisuussaaq, Mads Madsen oqarpoq.

Mads Madsenip siulittaasup taarsernerani suliassat, bankimut allaffissornermullu attuumassuteqartut maannakkut suliarai. Tamakkuali naammasseriarpata Film.gl piffimmut nutaamut pisikkusullugu oqarpoq.

- Kalaallit Nunaat nunanit allanit aatsaat taama soqutigineqartigaaq, periarfissarlu suli periarfissaatillugu atorluartariaqarparput, Mads Madsen oqarpoq.

Kalaallit filmiliaasa nunani tamalaani suli tusaamaneqarnerulernissaannik siunissaq ungasinnerusoq eqqarsaatigalugu takorluugaqarpoq.

Oqaluttuarisaanermi pisoqarfiusoq

Kalaallit filmiliortarnerat oqaluttuarisaanermi piffissami pingaarutilimmi inissisimavoq.

Kalaallit Nunaanni Filminstitutti siornaak pilersinneqarpoq. Sulininilu ukioq manna januarimi aallartippaa. Inunnguaq Gerth Filmiliornermik, filmiliortarnermut filmertarfinnilu kulturimik siuarsaaniarluni suliniummik aallarnisaanermi pisortatut siuttuussaaq.

- Inunnguaq Gerthilu marluulluta matut nutaat ammartiterneqarnissaat suleqatigiissutigissavarput.

Suliniutit ilaat eqqartorneqartoq tassaavoq Kalaallit Nunaanni filmiliornerup aningaasalersorneqartarnerata qanoq pitsanngorsarneqarnissaa.

- Paasissutissat tamanut ammanerulersissavagut, Mads Madsen oqarpoq.

Nunani tamalaani filmiliortartut Kalaallit Nunaanni filmiliornissamik soqutiginninnerat piffissami matumani annertusigaluttuinnarpoq. Akisoqaarli, tamannalu inuppassuarnit nunatsinni filmliornermik suliaqarsimanngitsunit tupaallaatigineqarpoq.

- Islandimisut Rekyavíkimut meriarluni atortorissaarutit biilinut qulinnut ikioqqaannariarlugit filmiliorfissamukartoqaannarsinnaanngilaq, Mads Madsen oqarpoq, misilittakkanilu pillugit peqatigiiffimmi ilaasortanut oqalugiarnermini erseqqissaavoq.

Soqutiginninnerulerneq atorluarlugu, kikkut tamarmik toqqissisimanissaat pitsaasumillu pineqarnissaat anguniarlugu, nunani tamalaani filmiliortartunik suleqateqarnissaminnut sinaakkutissat eqqortut atorlugit pilersitsisoqartariaqartoq taanna isumaqarpoq.

- Amerlavallaat sulinerminni ulapippallaartarput, taanna oqarpoq.

Sulinerup sivisussusia kisiat eqqarsaatiginngilaa, aammali filmiliortartut Kalaallit Nunaannut suliartornerminni qanoq pissusilersortarnissaat eqqarsaatigaa.

- Maaniikkumagussi inuillu taakku ilagalugit peqatigerusukkussigit, taamaaliortariaqarpusi-mik oqarsinnaasariaqarpugut, oqarpoq.

Isiginnittaaseq nutaaq

Mads Madsenip Film.gl peqatigiiffik ilaasortanit aqunneqartutut attatiinnarniarlugulu nukittorsarniarpaa.

- Siulittaasutut suna tamaat naalagaaffigalugu aaliangersaarusunngilanga. Inuit peqataatinneqartariaqarput, taanna oqarpoq.

Ataatsimeersuarnerminni suliassaqarfinnut immikkoortortanullu assigiinngitsunut agguarneqarput.

- Taamaalillutik ilaasortat Film.gl-ip sulineranut sunniuteqarluarnerulissapput, suliaminnullu tamarmik immikkut sinniisuussapput. Imaannerulissaaq: Uummap una akisussaaffigigaa allap una akisussaaffigissavaa, taanna oqarpoq.

Mads Madsen peqatigiiffimmut ilaasortaanermini peqatigiiffiup iluani eqimattanik pilersitsisoqartartoq arlaleriarluni maluginiartarsimavaa, siulittaasutullu eqimattat sulilernissaat sulissutiginiarpaa.

- Inunnik kivitsisariaqarpugut, oqarpoq.

Nuummi ukiualuit najugaqarsimanini iluaqutigalugu isumaqarpoq.

- Allamik isiginnittaaseqalernissaq eqqussinnaavara, oqarpoq suleqatigiissinnaannginnerlu, immaqaluunniit pisimasunik ilisimasaqannginneq pissusissamisoorluinnartoq erseqqissarpaa.

Neriuutigaali ataatsimoornerusoqassasoq, taamaaliornikkut kalaallit filmiliortartut tamarmik nukittunerulissammata:

- Inuiaqatigiit amerlanngilagut, suliaqarfimmi inuit amerlanngilagut, tapiissutillu tupinnaannartumik amerlanngitsut pigaagut. Taamaammat suleqatigiissinnaannginnermik oqarneq inissaqartissanngilarput, taanna oqarpoq.

Piffissaq eqqaamanartoq

Nunani tamalaani filmiliortartut amerlanerusut Kalaallit Nunaannut tikisinneqartalernissaat ukiorpassuarni oqaluuserineqarpoq. Aningaasatigut periarfissat kisimik apeqqutaanngillat, misilittagaqarnerlu pingaaruteqartoq Mads Madsen oqarpoq.

- Aningaasat siullertut amigaatiginngilagut, eqqumiitsuliornermili isumassarsiat qanoq piviusunngortinneqarsinnaanerannik ilisimasat amigaatigaagut, taanna oqarpoq.

Suliakkiisoqartillugu, suliffeqarfiit nunani tamalaaneersut atortorissaarutinik tamaani attartoraangata, suliassaqarfiup ineriartortinneqarneranut tamanna tapersiisartoq taanna nassuiaavoq.

- Taamatut pisoqaraangat ilisimasat misilittakkatillu suliassaqarfimmut ilanngunneqartarput, taakkulu suli atorneqarsinnaapput, Mads Madsen oqarpoq.

- Taamaalilluta misigisat puigunaatsut puigunngisaannarsinnaavagut.