Frankrigimiut filmiliaat Uummannami takutinneqarput

Filmiliortartut franskimit ilitsersuisumit Thierry Machadomit siulersorneqartut filmiliap Pipaluk – pigen der løb om kap med vinden immiunneqarnerata aappassaa sapaatip-akunnerani matumani aallartippaat.

Filmimi pingaarnertut inuttaapput 14-inik ukiulik Mila Heilmann Kreutzmann, ilaatigut filmimit Ivalumi ilisimaneqartoq, aamma 75-inik ukiulik Rasmus Lyberth.

Pipaluk 13-inik ukiulik, Avannaata Qimussersuanut peqataaniarluni takorluugaqarpoq, allanilli annerusumik tapersersorneqanngilaq. Piniartutoqqalli Pipaluk qimussernermik aallaqqaataaniit ilinnartippaa.

Filmiliortitseqatigiiffiup Ex Nihilop filmi ilaqutariinnut isiginnaagassiaasoq oqaatigaa, taamaattumik qanoq inerneqarumaarnersoq oqaatiginngikkaluarlugu Pipaluk qimussimik sukkaniunnermi ajugaassasoq kikkullu tamarmik uummataat ajugaaffigissagaat ilimagineqarsinnaavoq.

Meeqqat angerlarsimaffiannik suleqateqarneq

Uummannami immiussineq Ann Andreasen aamma Uummannami meeqqat angerlarsimaffiat suleqatigalugu ingerlanneqarpoq, taamaattumik naatsorsuutigisinnaavarput meeqqanik amerlasuunik isiginnaartitsisartunik pingaarnertut inuttaasut avataatigut peqataasoqarnissaa.

Pipaluk — pigen der løb om kap med vinden qaqugu takuteqqaarneqassanersoq, Ex Nihilusip suli oqaatigisinnaanngilaa.

Nunarsuaq tamakkerlugu takutitseqqaarneq

Uummannami ilaatigut immiunneqartoq, franskit filmiliaat alla Katuami nunarsuaq tamakkerlugu arfininngorpat unnukkut takuteqqaarneqassaaq.

Filmi pineqartoq tassaavoq Greenland (Banquise) ilaatigut Aka Niviâna, Josef Tarrak, Nukâka Coster-Waldau, Paaliit Mølgaard Rasmussen, Paalu Jerimiassen aamma Rebbi Jørgensen inuttaaffigineqartoq.

Franskeq niviarsiaraq (Nina Rousseau) tammaaneqartoq filmimi pineqarpoq. Taassuma nukaata angajuni ujaariniarlugu ukiut pingasut qaangiuttut Kalaallit Nunaannukarpoq.

Isiginnaartitsisartut filmiliornermilu suliaqartut allat nunarsuaq tamakkerlugu takuteqqaarneqarnerani najuutissapput.

Nunarsuaq tamakkerlugu takuteqqaarneqarnera Nuuk International Filmfestivalip ukioq manna qulissaanik ingerlanneqartup, takutitassaata taanna ilagaa. Festivalimi septembarip 16-ianniit 19-iata tungaanut filmertitsinerit saniatigut aamma Nordisk Rådip filminut nersornaasiuttagaanik tunniunneqartarpoq.

Nuuk Film Festivalimi aamma piviusulersaarut Erfalasorput soqutiginartoq takuteqqaarneqassaaq. Johannes Ujo Müllerip oqaluttuarisaanermut tunngasumik piviusulersaarusiaani kalaallit erfalasuat qanoq pinngorsimanersoq ukiullu 40-t matuma siornatigut siullermeertumik amuneqarmalli Erfalasorput Kalaallit Nunaanni qanoq isumaqalersimanersoq oqaluttuarineqarpoq.