Inuiattut ullorsiornissamut pilersaarutit

Ullortunermi kalaallit inuiattut ullorsiorneq, nalunaaqutaq arfineq pingasunut aallartillugu erfalasorput sumiiffinni tamani pisarnertut amuneqassaaq.

Illoqarfinni nunaqarfinnilu inuiattut ullorsiornermi pisartut naliginnaasut ingerlanneqassapput.

Erfalasuleereernerup kingorna ullaakkorsioqatigiinnerit, naalagiaqatigiinnerit, iliveqarfinni naasortaliinerit, piorsarsimassutsikkut nersornaasiinerit nunaqqatigiinnillu ataatsimoortitsinerit nereqatigiinnertaqartut ingerlanneqassamaartut, kommunit pilersaarutaanni atuarneqarsinnaapput.

Inuiattut ullorsiornermi pilersaarutit naggaserlugit kujataani tapartitsisoqartoq sumiiffinni arlalinni meeqqanut inersimasunullu qititsitsisoqassaaq.

Timersorneq qitiutinneqassasoq

Uummannami inuiattut ullorsiornermi - tassa juunip 21-ani - aqqusineqatigiiaat iligiitsillugit nalunaaqutaq tallimanut isikkamik arsaatsitsilluni unammisitsisoqassamaarpoq.

Aqqusineqatigiit aqqusineqatigiinnut allanut unammillerusukkunik, Uummannami kommunip allaffeqarfiani peqqinneq sunngiffillu immikkoortortaqarfianut tallimanngorneq juunip 19-aatinnagu nalunaartariaqartut, Avannaata Kommunia facebookkimi quppernermini allappoq.

Arsaattussarpassuit

Kangerlussuarmi aamma isikkamik arsaatsitsisoqassaaq, nalunaaqutaq marlunut arsaattarfimmi. Arsallaqqinnerpaaq aamma isertitseriallaqqinnerpaaq akissarsiassaqartut, Qeqqata Kommunia facebookkimi quppernermini allappoq.

Ittoqqortoormiinittaaq ullortunersiorneq isikkamik arsaatsitsinermik aamma malunnartinniarneqassaaq. Meeqqanut inersimasunullu nalunaaqutaq marluniit arsartitsisoqassamaarpoq.

Kalaalerpaluttut sammineqassasut

Nunatsinni illoqarfiit annersaasa aappaata Sisimiut timersortarfiani nalunaaqutaq ullup-qeqqaniit tallimat tungaanut kaffillernermi, innuttaasut kalaalerpaluttunik assassukkaminnik tuniniaanissaminnut periarfissaqarput.

Tuniniaatitsinissaq kulturikkut illorsuup Taserallip aaqqissuussaaraa.

Sisimiuniinnaanngitsoq inuiattut ilisarnaatitsinnik saqqummersitsisoqassaaq.

Tassami Paamiuni, Nuummi Ittoqqortoormiinilu inuiattut ullorsiornermi kalaallisuuginneqqusaatsitsoqartussanngorpoq.

Nuummi ’Kittat Inuiaat Show’-imik taallugu nalunaaqutaq qulingiluaniit qulit tungaanut kalaallisuuginneqqusaatsitsinermik ingerlataqassasoq, Kommuneqarfik Sermersuup nittartagaani atuarneqarsinnaavoq.

Ullut arlallit sammisaqassasut

Nunatta kujataani, Kommune Kujallermi, nunatta sinneranut sanilliullugu annertunerusumik pilersaaruteqartoqarpoq, tassa ’Sapaatip akunnera kulturisiorfik’-mik taallugu aaqqissuussisoqarami. Ataasinngornermiit sapaatiuppat Inuiattut ullorsiornissatta tungaanut Narsami, Nanortalimmi Qaqortumilu pilersaarutit, Kommune Kujalliup nittartagaani atuarneqarsinnaapput.

Maluginiagassat ilagivaat Qaqortumi Nanortalimmilu arfininngornermi juunip 20-ni puiseqqaanniunnerit ingerlanneqassammata, nunap sinnerani juunip 21-ani ingerlanneqartussaasut.

Kujataani illoqarfiit annersaanni Qaqortumi inuiattut ullorsiornermi, nalunaaqutaq aqqanermut, tasersuaq kaajallallugu arpatsitsisoqassaaq, QSP aaqqissuisoralugu.

Inuiattut ullorsiornissamut illoqarfinni nunaqarfinnilu pilersaarutit kommunit nittartagaanni aamma facebookkimi quppernerini atuarneqarsinnaapput.