TIMERSORNEQ

KAK aamma Air Greenland isumaqatigiissuteqartut

Kalaallit Arsaattartut Kattuffiat (KAK) aamma Air Greenland ukiuni pingasuni atuuttussamik isumaqatigiissuteqarput. Nunanut allanut unammisartut aningaasaliiffigineqaraluartut, sineriammi arsaattartunik ineriartortitsinissamut sunniuteqarluassasoq, KAK allappoq.

Jacob Nitter Sørensennip, Air Greenlandimi pisortaaneq aamma Kenneth Kleist, Kalaallit Arsaattartut Kattuffianni (KAK) siulittaasup, ukiuni pingasuni suleqatigiinnissaminnik isumaqatigiissutertik, 3 million koruuninik nalilik, ukiuni pingasuni atuuttussaq, Nuup mittarfissuani atsiorsimagaat, assimi takuneqarsinnaavoq.

Assi: Gabriel Danielsen / Air Greenland.

Masauna Peary Masauna Peary Journalist

Saqqummersinneqarpoq 4. Juuli 2026 - 15:44

KAK aamma Air Greenland suleqatigiinnissamut isumaqatigiissut 3 million koruuninik nalilik, juulip aallaqqaataaniit ukiuni pingasuni 2029-p naaneranut atuuttussaq, atsioqatigiissutigaat.

Isikkamik arsaattartut pikkorivissut, junior-inik taaneqartartut aamma arnat angutillu, nunanut allanut futsalimik aamma silami isikkamik arsaallutik unammisartui, sungiusaatigalugu naapeqatigiittarnissaannut aamma nunanut allanut unammersuariartarnissaannut isumaqatigiissut imaqarpoq.

Nunatsinni isikkamik arsaattartut pikkorivissut, juniorinik taaneqartartut aamma Arnat angutillu futsalimi silamilu isikkamik arsaannermi sungiusaatigalugu aamma nunanut allanut unammiartortarnissartik ukiuni pingasuni tulliuttuni qulakkeeramikku nuannaarutissaqarluarput.

Isumaqatigiissut pikkorivissunut taamaallaat tunnganngitsoq

Ussassaarut

Isumaqatigiissut KAK-mut aningaasatigut iluaqutaavoq, isumaqatigiissummi aningaasat 3 million koruunit KAK-mut sipaarutaasussat, nunatsinni isikkamik arsaannermik ineriartortitsinermut atorneqassapput.

- Taamaalilluta aningaasat allanut atorneqartussaagaluit isikkamik arsaannerup futsalillu piorsarnissaanut periarfissaqalerpugut nunatsinni tamarmi klubbit sulinerisigut, Kenneth Kleist tusagassiutinut nalunaarummi allappoq.

Suleqatigiinnissamik isumaqatigiissuteqarnikkut nunanut allanut unammisartut katersuunnissaannik ajornannginnerulersitsiinnanngilaq.

- Timersornikkut piorsaaneq KAK-mi timersoqatigiiffinni ingerlanneqassaaq, Jacob Nitter Sørensen allappoq.