Kalaallit Nunaat ataqqiniarlugu qajariamik ingerlaaqatigiinnermi 300-t sinnerlugit peqataasut

Freja Hansen, qajariamik kinngusaarnermi Danmarkimi pissartaq, inuit 300-nit amerlanerusut ilagalugit Københavnip umiarsualiviani qajariamik takutitsivoq.

Takutitsineq Danmarkimi kalaallit kattuffiata Uagut aamma Mellemfolkeligt Samvirkep Kalaallit Nunaat ataqqiniarlugu aaqqissuussaraat. Ulloq taanna Naalagaaffiit Peqatigiit nunap inoqqaavinut ullorititaraa.

Freja Hansenip aaqqissuussisoqarnera qajariartartut Facebookimi quppernerini assigiinngitsuni takuaa, angunnilu Mogens Hansen peqatigalugu umiarsualivimmi takutitseqataalluni.

- Nuannisaqatigiittoqassasoq takusinnaagakku, Kalaallit Nunaata tassanilu kulturip ataqqiniarneqarneranut peqataaniarlunga aalajangerpunga. Pingaartumik qajartorneq pissarsissutigilluartarnera eqqarsaatigalugu, Freja Hansen oqarpoq. Taanna imaani angalanermik ukiuni aqqanilinni misilittagaqarlunilu qajariartartut Københavnimi ataatsimoorfiini marlunni ilaasortaavoq.

Isiginnaartut tusindilikkuutaat takutitsineq umiarsualivimmut alakkartersimagaat, kattuffiup Uagut tusagassiuutitigut nalunaarutigaa.

- Seqinnarissuup ataani ingerlaaqatigiinneq nuanneqaaq, Freja Hansen oqaproq. Imaani ataatsimoornerup malugineqarluarsinnaanera aamma eqqaavaa.

- Inuppassuit qajariarlutik ataatsimoorlutik aalajangersimasumukaarlutik ingiaqatigiinnerat arajutsiuminaappoq, oqarpoq.

Qajariamik takutitsineq Nordatlantens Bryggemiit aallarput. Tassanngaanniit Skuespilhusetip eqqaani Ofelia Pladsimukaarput, Langelinie aqqusaariarlugu Nordhavnimi Sandkajimut apuullutik. Puttasuliami qisunnik sanaami nipilersortoqarlunilu isiginnaartitsisartut Inuánima, kalaaleq isiginnaartitsisartuullunilu erinarsortartoq Nukâka Coster-Waldau aamma nipilersortartoq Kristoffer Jul, aliikkusersuipput.

Qajariamik ingerlaaqatigiittuni peqatigiiffimmi Qajaq Københavnimeersut marluk siuttuupput. Peqatigiiffimmi tassani inuit ileqqutoqaat aleutillu qajalioriaasaat atorneqartarlutillu sanaartorneqartarput.

Ingerlaaqatigiit uniffimmini tamali kinngusaqattaarlutik takutitsisarput. Nordhavnimut apuutinngitsiarlutik Freja Hansen ingerlaaqataasorlu alla kinngusaaqatiserineqarput.

- Kingorna oqarasuaatitta normui pivagut. Immaqa sungiusaqatigiittalersinnaavugut, oqarpoq.

Freja Hansenip saniatigut qajariamik ingerlaaqatigiinnermi Tuluit Nunaata aallartitaa Victoria Elizabeth Billing, Københavnimi suliffissaqarnermut, akulerutsitsinermut inuussutissarsiornermullu borgmesteri Andreas Keil kiisalu kattuffimmi Uagut-mi pisortallunilu sunngiffimmi qajariartartoq Julie Rademacher peqataapput.