Carsten Siegstad mikrofonimik tigummiarluni tusarnaartitsisarfimmut qanittukkut qaqiguni, tusarnaariat tikilluaqqunissaat suliassareqqissavaa.
Inuit katersuussimasut qiviallatsiaannarlugit kiinnat ilisarnartut siulliit takussavai: Nipilersortartoq ukiorpassuarni suleqatigisimasani. Nunatsinni ukiorpassuarni siornatigut suleqatigisimasani. Ilaqutariillu ukiumut ataasiaannarluni naapittakkani – tassa maani.
Taannali kisimi taama inissisimanngilaq.
Kalaallinummi amerlasuunut Kalaallit Nunaannik ulloqartitsinerit kalaallinut amerlasuunut ilaquttanik, ikinngutinik ilisarisimasanillu siornali takusimanngisanik naapitsiffiusarput. Naapeqqittarnerit nipilersortoqartarneratulli aamma kulturimut tunngasunik takutitsinertulli aalajangersimasumik ileqqutoqanngorsimapput.
- Inuit taama amerlatigisut naapittarlugit nuanneqaaq – eqqumiitsuliortut aamma inuit immaqa ukiorpassuarni takusimanngisat. Takoqqinnerni takorniuunnerit pingaaruteqarnerpaasarput, Carsten Siegstad ulluinnarni inuunermini Københavnimi Christian Kirkemi ulluinnarni suliassanik isumaginnittartuusoq nuannaarluni oqarpoq.
Carsten Siegstadip Kalaallit Nunaannik ulloqartitsisarnerit 2001-imiilli peqataaffigisarpai, taamanimi Kalaallit erinarsoqatigiivini Aavaat-kunni erinarsoqataasarami. Aaqqissuussisarnerni 2006-imili pisussanik saqqummiisartunngorpoq, tamatumalu kingorna aaqqissuussisarnerni aalajangersimasumik avammut kiinnertartuulluni. Marloriaannarluni – tassa coronap nunarsuarmi tuniluunnera pissutigalugu – tusarnaartitsisarfimmut qaqisimanngilaq. Aammattaaq 2019-imiilli ”Kalaallit Nunaat Tivolimi”-mi aqutsisunut ilaasortaavoq, taakkualu Tivoli suleqatigalugu Kalaallit Nunaata Ulloqartinneqarnissaa pilersaarusiortarlugulu ineriartortittarpaat.
Taamaattumik Kalaallit Nunaannik Ulloqartitsisarnerit ukiuni 50-ini aaqqissuunneqartarnerisa affaangajaanni aaqqissuussisarnerit Københavnimi Kalaallinit naapittarfiunerannit ukiumoortumik Kalaallit kulturiannik malunnartitsinerit annersaannut ineriartortitseqataasimavoq.
Atuarfik Samuel Kleinschmidtimi Nuummiittumi aallartittoq
Kalaallit Nunaannik ulloqartitsisarnerit oqaluttuassartaat Tivolimi aallartinngilaq.
Atuarfik Samuel Kleinschmidtimi — taamanikkut Nuummi ilinnialernissamut piareersaatitut atuartitsinermi — aallartippoq. 10. klassimi atuartuusimasut 3. realimilu atuartuusimasut Danmarkimut ilinniariarlutik aallarunik attaveqaqatigiittarniarlutik 1975-imi isumaqatigiissutigaat. Taamaattumillu ukiumut ataasiarlutik Københavnimi aalajangersimasumi naapeqatigiittarnissartik isumaqatigiissutigalugu.
Tivoli toqqarneqarpoq, ullorlu taanna tassaavoq aggustip aallaqqaataa — ulloq kikkut tamarmik eqqaamasinnaasaat, tassa Danmarkimi ilinnialersussat imaluunniit ilinniarnerminnik naammassinnereerlutik Nunatsinnut angerlartussat.
Aappaaguani, 1976-imi aggustip aallaqqaataanni, Tivolimi siullermeerlutik naapipput — taamanikkut aliikkusersuisoqaranilu nipilersortoqaranilu pisortatigoortumik aaqqissuussisoqanngilaq.
- Tassaaginnarluni Kalaallit naapeqatigiiffigisinnaasaat. Taamanikkut inuit 20-25-t missaanniittut naapeqatigiipput. Oqaloqatigiittoqarluarpoq kingornalu immaqa allamut ingerlaqqillutik, Carsten Siegstad oqaluttuarpoq.
Peqataasartut ukiut ingerlanerini amerliartorput.
Tivolimi naapeqatigiittarneq tusaamaneqaleriartorpoq, Kalaallillu amerliartuinnartut Tivolimut aggustip aallaqqaataanni aqqusaarsisarlutik. Ilinniartut ikinngutigiillu akornanni torrutiinnarlugu naapittarnermik aallartittoq Danmarkimi Kalaallit akornanni ileqquulersimavoq.
Aatsaalli 2001-imi ukiut 25-nngortorsiorneqarnerata nalaani aaqqissuussisarneq allanngorluinnarpoq. Peqataasartut ukiut tamaasa amerliartuinnartut, Tivolimit takuneqarsinnaavoq taamaattumillu aqutsisoqatigiinnik „Kalaallit Nunaat Tivolimi“-mik taaguutilimmik pilersitsisoqassasoq aalajangerneqarluni. Tamatuminnga suliniuteqartut ilagaat Sidsel Møller, Kalaallit Nunaannik ulloqartitsisarnernik 1976-imi aallartitseqataasimasoq, aamma taanna aqutsisoqatigiinni siullersaalluni siulittaasuuvoq.
- Tivolip aperigamisigut aaqqissuussisarneq qanoq ineriartortinneqarsinnaanersoq, tamannalu Kalaallit Nunaannik Ulloqartitsisarnernut ullumikkut amerlanernit ilisimaneqartunut aallarniutaalluni, Carsten Siegstad oqaluttuarpoq.
Nipilersortitsisarneq allanik ilaneqarmat
Carsten Siegstad aqutsisoqatigiinnut 2019-imi ilaasortanngorpoq ullumikkullu Kalaallit Nunaannik Ulloqartitsinerni pisussat ineriartortitseqataaffigai, Kim Falck-Petersen akisussaanerpaasoq aningaasaqarnermullu tunngatillugu akisussaasoq, aamma nipilersortartoq Ib Uldum, tusarnaartitsinerit teknikikkut ingerlanneqarnerannik isumaginnittuusartoq peqatigalugit. Kalaallit Nunaannik ulloqartitsinerni pisussat aaqqissuunneqarnerini Tivolimit taakku suleqatigineqartarput.
- Tivolimit ima oqarfigineqaratta: Ullut marluk atorneqassapput, qanoq pisoqassava? Taava pilersaarutit katitertarpavut siunnersuutivullu ingerlateqqittarlugit. Qujanartumik amerlanersaat piviusunngortinneqartartut Carsten Siegstadip oqaatigaa.
Aaqqissuussisarnerni nipilersorneq pilertortumik qitiulerpoq, taamaattumillu Carstenip tamanna akisussaaffigilermagu pissusissamisoorluinnarluni. Tassani pissutsit nalunngilai namminerlu erinarsoqatigiinni Aavaat-kkunni erinarsoqataasarsimalluni, 2006-imi pisussanik saqqummiisartutut atuuffeqalernissani sioqquterujussuarlugu.
Aqutsisoqatigiinni ilaasortaasut akissarsiaqanngillat, taamaallaammi pisussanik saqqummiisartoq kisimi akilerneqartarami.
- Pingaaruteqartoq isumaqaratta taamaaliortarpugut.
Kalaallit Nunaannik Ulloqartitsisarnerit ukiuni siullerni nipilersortunik tusarnaartitsinerinnarnik imaqaraluarput. Amerlanertigut nipilersortartut assigiinngitsut ulluni marlunni, piffissat assigiinngitsut atorlugit, tusarnaartitsisarput. Piffissalli ingerlanerani annerusumik pisoqartarnissaa annerutinneqariartuinnarluni. Aaqqissuunneqartartoq nipilersornermik tusarnaartitsinerinnaanani Kalaallit kulturiannik avammut saqqummiivittut aamma atorusunneqarmat.
Taamaattumik sammisat amerliartuinnartillugit oqallitsitsisoqartarluni, qilaatersortoqartarluni, uaajeertitsisoqartarluni, Issittormiut unammiuaarnerinik aaqqissuussisoqartarluni, qaannamik takutitsisoqartarluni, eqqumiitsulianik assassukkanillu takutitsinernik kiisalu Kalaallit timersortartut nersorniarlugit aaqqissuussisoqartarluni. Tamatuma peqatigisaanik aamma inissaqartinneqalerlutik ilisimatusartut, atuakkiortut, eqqumiitsuliortut inuillu allat kulturimik suliaqartut, Nunatsinni ullutsinni pisartunik kulturikkullu takkussuuttunik oqaluttuarsinnaasut.
- Kalaallit Nunaannik Ulloqartitsinernut takkuttussat soorunami aliikkusersortussaavavut, aammali Tivolimut nalaatsornerinnakkut takkuttartut allat amerlasuut Kalaallit Nunaannut tunngasunik paasisaqartikkusuppavut. Inuimmi nuna pillugu ilisimasaqarnerulersimallutik angerlarusuttarput.
Naak ukiut 25-t kingulliit ingerlaneranni pisartut allanngortinneqarsimagaluaqisut nipilersorneq pingaarnertut sammineqartuaannarpoq.
2026-MI TIVOLIMI KALAALLIT NUNAATA ULLUI
Ulloq: Arfininngorneq 1. august aamma sapaat 2. august.
Piffissaq: Nal. 11.00-21.00 ulluni marluusuni.
Sumiiffik: Tivoli, København.
- Tamannami pissutigalugu inuit amerlanerit takkuttarput.
Kalaallit Tivolimi naapikkaangata
Carsten Siegstadip aqutsisoqatigiinnilu pisussat katiternerini nutaaliornerup ilisarineqarsinnaasullu oqimaaqatigiissaarnissaat pingaartittarpaat. Siornatigut kalaallinik nipilersortartunik nutaarluinnarnik inissaqartitsoqartaraluarpoq. Ullutsinnili nipilersornermik aallussaqareersut pingaartinneqarnerusarlutik.
- Inuppassuit nipilersukkat nalunngisatik tusarnaarniarlugit takkuttarsimasut paasigatsigu. Kalaallit Nunaannik ulloqartitsinerit eqqaakulunnernik ilaqartorujussuusarput.
Tamatuma peqatigisaanik eqqumiitsuliortut nipilersortartullu aatsaat taama soqutiginnitsigilerput.
Tivolimi tusarnaartitsiniarlutik nipilersortartut nipilersoqatigiillu 20-t 30-llu akornanniittut Tivolimi tusarnaartitserusuttut ukiut tamaasa aaqqissuisunut saaffiginnittarput.
- Naaggaarnissaq sapernarnerpaasarpoq, eqqumiitsuliortorpassuaqarpoq pikkorissorpassuarnik, taakkuali tamaasa peqataatissinnaanngilavut.
Taamaattumik aqutsisoqatigiit aalajangerput ukiunik 50-inngortorsiorluni nalliuttorsiorneq immikkut ittumik tusarnaartitsinermik malunnartinneqassasoq. Aatsaat siullerpaamik Kalaallit Nunaanni kisimiillutik erinarsortartut tusaamasat arfineq-marluk, illup nipilersortartui peqatigalugit, tusarnaartitsivimmi ataatsimi katersuutissapput.
- Tusaamasaanerit sapinngisamik amerlanerpaat katersuutsikkusukkatsigik. Tusarnaariat tusarnaartitsinermi ataatsimi taamaalillutik nipilersortartut assigiinngitsut erinarsugaasa nuannernerpaartaannik tusarnaarnissaat anguniarlugu sapinngisamik nipilersortartut tusaamasat amerlanerpaat katersorniarpavut.
Carsten Siegstadip inuit 4.000-it aamma 6.000-t akornanniittut Kalaallit Nunaannut attuumassuteqartut ulluni marlunni taakkunani Tivolimut takkunnissaat naatsorsuutigaa. Tamakkua saniatigut Tivolimukartussanik tusindilikkuutaanik allanik, kalaallit nipilersugaat kulturiallu misigisaqarfigineqarsinnaasunik, ilaqartoqassaaq.Taassumunngali Kalallinut ulloqartitsinerni inuit naapeqatigeeqqittarnerat pingaarnerpaavoq.
- Inuit ilaat ukiumut ataasiaannarlunga takusarpakka. Taakkulu maaniittarput. Taamaattumik ullut taakku uannut immikkut illuinnarput.
18-issaanik ukioq manna tusarnaartitsisarfimmiileruni pisussanillu saqqummiileruni Kalaallit Nunaata Ulluinik ukiuni 25-ngajanni ingerlanneqarsimasut pingaarnersarissavaat. Ilinniartut 20-t 25-llu akornanniittut siulliit Tivolimi 1976-imi naapeqatigiinneranniilli allanngortoqarsimaqaaq. Ataaserli allanngunngilaq. Taassuma eqikkaalluni ima oqaatigaa:
- Kalaallit Nunaannik ulloqartitsisarnerit inunnik katersisitsisarnissaat suli pineqarpoq.
