Kuuit nillertorujussuit nunalu naggorluttoq aqqutigalugit

Imeq isortuinnaavoq nillertorujussuullunilu, Bo Normanderillu uppatai tikillugit itissuseqarluni.

Erneranut nukarlermut imeq suli timaani qatsinnerusumut killippoq.  

Erngup naqqa tummaarisaat sioraavoq manngertoq aamma sioqqanut maakkarnartunut eqqaanartut nikerartumik tummaaraat. Uffarnermi aloqutitik atorunnaartariaqarsimavaat, erngup naqqani maakkarnartumi millugunneqartarmata. 

Taamaattumik ataataq erninilu marluk nassataminnik nammallutik Tunumi Tasiilap kitaani qaqqat Mittivakkat sermianit aattumit kuukkut kamillaangallutik pisupput. 

Siornatungaaniippoq ikaagassaat meterinik hunnorujunik arlalinnik isorartutigisoq, sioqqat qingartaqqiussimasut, piffissami sivikitsumi imermit qaqiffigisinnaasatik aqqusaartarlugit.

Erngup nillernera nissunut annernartuinnaavoq, imermilu isortuinnaasumi alloriarfissartik tulleq qanoq ititiginersoq takusinnaanngilaat.

- Ilaannikkut ernera nukarleq ikiortariaqartarpara tigummisariaqartarlugulu uippallinnginniassammat, Bo Normander oqaluttuarpoq.

Ataasiakkaanik alloriartarlutik sarfartukkut pisupput, pingasuullutik illuatungaanut apiuunnissamik tungaanut. Aatsaat tassunga pigamik oqiliallassinnaanngorput.

Bo Normanderip utoqqatserpasilluni ernini oqarfigai, tulliani feeriarnissartik taama ilungersunartigissanngitsoq.

- Tullianik nunanut kiattunut feeriassaagut, ernera angajulleq ingerlaannarluni akivoq.

Ulluni arlalinni Tunumi inuilaarsuarmeereerlutik quiasuppasissumik taama oqaloqatigiipput.

Angalaneralli aamma ilaqutariittut feriarnertut nalinginnaanngilaq. Bo Normanderip ernini marluk Mittivakkat kaajallallugit 85 kilometerit missaannik isorartutigisukkut pisummik angalaqatigai, Issittumi pinngortitami attorneqarsimanngitsumi nammineerlutik pisunnermik misigisaqartikkumallugit, namminerlu Kalaallit Nunaata ilaanik siornatigut tikissimanngisaminik ilisimasaqalerumalluni. 

Tunu atuakkami ilaatinneqassasoq 

Pisummik angalanerat aalajangersimasumik siunertaqarpoq. Bo Normander ilaatigut atuakkanut 'Naturguide Grønland'-imut aamma 'Turen går til de smukkeste vandreruter i Grønland'-imut (Kalaallit Nunaanni pisummik aqqutit kusanarnerpaat) atuakkiortuusimavoq. Pisummik aqqutinut ilitsersuummi maanna saqqummersinneqareersumi Nunatta Kitaa Kujataalu ilaapput, Tunuli ilaatinneqarani. Saqqummersussami tullermi tamanna allanngortikkusuppaa.

- Soorunami misigisassarsiornissaq siunertarineqarpoq, aammattaarli Tunumi pinngortitaq inuilaarsuarlu alutornangaartut pillugit ilisimasanik siammarterinissaq siunertarineqarluni, Bo Normander oqarpoq.

Misigisassarsiorluni misissuinermit paasisat Naturguide Grønlandimi aamma pisummik angalanermut ilitsersuutissami tulliuttumi atorneqarumaarput, tassanilu Tunu ilanngunneqassasoq pilersaarutaavoq. Mittivakkat kaajallallugu pisunneq imaannaanngitsoq taamaallaat pineqassanngilaq, aammattaarli Tasiilap eqqaani pisummik aqqutisssat ajornannginnerusut soorlu Naasuliartarfimmut aamma Qaqqartivakajimmut pisummik aqqutissat ilanngunneqassallutik. 

Aqqutissat aamma assigiinngitsorujussuupput. Normanderip pisummik aqqutissatut innersuussutaanni pisummik aqqutissat ilungersunassusii 1-imit 5-imut nalilerneqartarput, Mittivakkallu kaajallallugu pisunneq unammillernarnerpaanut ilaalluni.

_ Qularutissaanngitsumik 5-imiippoq.

Inuilaarsuarmi kisimiinneq

Bo Normanderip aqqut 85 kilometerisut isorartutigisoq nammineq pilersaarusiorsimavaa. Pisuinnarnut aqqutitut nalunaarsorneqarsimanngilaq, taamaallaallu ilitsersuutitoqqami 1995-imeersumi allaaserineqarluni.

Taamaattumik GPS nutaaliaq nunallu assingi digitaliusut mobilimittut nunallu assinginik pappiaqqanik ilaqartut nassataannut ilaapput. Mobilikkut attaveqarnissaq naatsorsuutigisinnaanngilaat.

Aamma aqqutip annersaani aqqutinik malitassaqanngilaq.

- Angallavigineqartup annersaani inunnit angallavigineqarsimaneranut takussutissaqanngilaq. 

Tamatumunnga taarsiullugu nuna aqqutissartik misissortariaqartarpaat: qaqqat, tasersuit nunallu iluserisai. Ataasiaannarlutik ajorluinnartumik aqqusaagaqarput, inuit tumaat aqqutigitillugit aqqummut ajortumut pigamik. Qunneqqamut itisuumut killikkamik ingerlariaqqissinnaanatillu.

Utertariaqarput aqqutimikkullu allakkoorlutik aqqutissarsillutik.

Bo Normanderimut ernini marluk ilagalugit angalanermut pissutaasoq tassaavoq inuilaarsuarmiinnissaq. 

- Qitornannut inuilaarsuarmi kisimiinneq qanoq innersoq takutikkusukkakku. Pinngortitami attorneqarsimanngitsumi nammineerlunilu isumaginiarfiusussami.

Taamaattumik suut tamaasa nassarneqartariaqarput. Tupeq, nerisassat, atisat isumannaallisaanermullu atortorissaarutit nammattakkamiipput. Nammineq 16-17 kiilunik nammappoq, ernerisalu nammagaat oqinnerullutik.

Aamma aallaaseqarput. Nanoqarnissaa ilimanaateqarpallaanngikkaluartoq ilaqutariit Tasiilami aallaammik attartorput. Qujanartumik nannumik takkuttoqanngilaq.

Tamatuma akerlianik allanik misilinneqaatigisaminnik misigisaqarput.

Soorlu qaammammi pisulluni

Ullut ilaanni nuiaqanngilluinnartumi seqinnarittaqaaq, ippernanit niviukkanillu mikisunit qaninniarfigineqartarlutik. Aqqutigisamik ilaanni qaarsut portusuut  majuartariaqartarpaat orlunaveersaarlutillu.

Aqqutaasali ilaat ataaseq Bo Normanderimut immikkut puigunaappoq.

Sermeqarfiup tiffariartornermini nunap ilaa naggorluttoq uumassuseqanngingajattorlu saqqummersissimavaa. Qaarsut angisuut akornanni sermip nassatai sioqqat ujaraaqqallu annertuunngorlutik tamaaniipput, sermimit qallerneqarsimagaluartuni nunap qaava naasoqanngingajattoq pilersissimallugu.

- Qaammammi pisuttuarnertut ippoq.

Nunakkut meqqoqanngitsukkut nalunaaquttap akunnerpassuini pisupput. Ujaraaqqat, sioqqat ujaqqallu sermip aanneraneersut avatangiiseraat. Mittivakkat sermeqarfiat sermillu aanneranit pilersimasoq taseq, nunap ilaanut qasertumut uumassuseqanngitsumullu tulluanngitsumik takussaapput.  

- Immikkorluinnaq ittuuvoq. Siornatigut taama misigisaqarsimanngilanga.

Tunu sammineqarnerulersinniaraa

Bo Normanderimut pisummik angalaarneq namminermut misigisassarsiornerinnaanngilaq.

Atuakkat angalanermillu oqaluttuat inuit amerlanerusut Nunatta ilaanik, ikittuinnarnit ilisimaneqartutut  isumaqarfigisaminut, paasisaqarnerorulersitsisinnaassasut neriuutigaa.

- Tasiilap Tunullu pitsaasumik sammineqarnissaannut taperseerusukkama peqataarusuppunga, Tunu taamaalilluni puigorneqannginniassammat.

Ilisimasassarsiorluni pisunnissamut tamatta 85 kilometerit ingerlavigisariaqanngilavut. Aammali ajornannginnerujussuarnik ulloq ataaseq pisuffigineqarsinnaasunik tamaani angalaarfissaqarpoq.

Ungasinnerusumulli angalaarniartunut pinngortitaq Bo Normanderimut sunniuteqarnerpaasimasoq takuneqarsinnaavoq: qaqqat portusuut inngigissut, sermeqarfiit, kangerluit sikorasaartut – nunalu meqqoqanngitsoq sermip aakkiartornermini pinngortitap nukinginit annertuunit takussutissaqarluartunik qimanneqarsimasoq.

- Tamanna Issittumi pinngortitaavoq attorneqarsimanngitsoq peqqarniitsorlu. Sermersuup nunarsuaq ukiuni tusindilinni qanoq ilusilersorsimaneraa takuneqarsinnaavoq.