Nikorfaarfissani ujartorlugu, allat inissaqartittarpai

Liv Mejer Larsenip atuartitani eqqarsaatigalugit assammini qullernik ilusilinnik kakiortippoq.

Taanna kialaarnermik nukissamillu nittarsaasserusuppoq, inissaqartitserusullunilu.

Ilisimatusarfimmi naapikkatsigut taama oqaluttuarpoq. Ilisimatusarfimmi studieadjunktitut ulluinnarni sulisarpoq, biologimik ilinniakkami SILA-mi ilinniartitsisuullunilu ataqatigiissaarisuulluni. Ilinniagaq Kalaallit Nunaanni pinngortitamik ilisimatusarnermik ilinniarfiit siullersaraat, kalaallillu pinngortitaat, kulturiat suliffissaqarfiillu sammineqartarlutik.

Liv Mejer Larsen ilinniakkamik ilusilersueqataavoq, pingaartumik ilinniartut atugarissaarnissaat eqqarsaatigalugu. Ilinniartut kulturertik eqqarsaatiginagu ilinniartitsinermut naleqqussarniartarnerat siusinnerusukkut atorfeqartarnermini, maluginiarsimavaa.

Tassannga ilinniartut taamaallaat ilikkagaqarfigineq ajorpaat. Ilinniartulli annerusumik taanna aamma paasisaqarnerulersittarpaat. qallunaatut oqaasilittut kulturini nammineq suli ilinniarpaa, aamma taakkunanngarnit.

Frederiksværkimi Upernavimmilu meeraaneq

Liv Larsen Frederikssundimi Danmarkimiittumi apriilip 29-ani 1985-imi inunngorpoq. Frederiksværkimi Sjællandip avannaaniittumi peroriartorpoq, namminerlu oqarneratut “qallunaatut nalinginnaasumik” nuannersunik eqqaamasaqarfiusumik peroriartorluni.

- Aasat tamaasa umiatsiaasaaqqamik angalasarpugut, sumiiffiit assigiinngitsut tikittarlugit tupernilu sinittarluta, oqaluttuarpoq.

Ataataa Hans Larsen qallunaajuvoq anaanaalu kalaaleq affarmik qallunaaq Danmarkimi peroriartorsimasoq Susanne Mejer.

Liv Mejer Larsen ilaqutariinni nukarlersaavoq, aniata angajuatalu ulluinnarni pissutsit aqukkajuppaat, malinnaaginnartarporlu. Aqqaneq-marlunnik ukioqartillugu, ataataa Upernavimmi atorfininnerani nuupput.

- Avannamukarnerput sapaatip-akunneranik ataatsimik sivisussuseqapajaarpoq, Liv Mejer Larsen oqaluttuarpoq.

Qulimiguulimmik timmisartoq teknikkikkut ajornartorsiorpoq. Taava sila unerisimajunnaarpoq, Kangerlussuarmi Ilulissani Uummannamilu Upernavimmut apuutinnginnerminni ullualunni unnueqqaartariaqarsimapput.

- Suut tamarmik pissanganarput, Liv Mejer Larsen oqaluttuarpoq. Illut qalipaatigissaartut, qimmit kalussartut — atuaqatinillu nutaanik naapitsineq — tamaasa eqqaamavai.

Ukiassarnerani Upernavimmut nuupput. Ujaqqat kissarsuutit ukiukkut qaaniisinneqartarput, aneersimatillutik ujaqqat kissarsuummiit nerriviup qaavanut ilisarpaat, assatillu taamaasillutik kissassertarlugit.

Ilaqutariit Tasiilamut ukiup ataatsip missaa qaangiummat nuupput.

Nunasiaanermi ullorsiutinik allakkat

Liv Mejer Larsenip aanaa Tunumiuuvoq, oqaatigilluaannarlugu Sermiligaap eqqaani nunaqarfiusimasumi. Marlunnik ukioqarluni ajami ilaqutai ilagalugit Ittoqqortoormiinut nuutinneqarpoq tassanilu peroriartorpoq.

Liv Mejer Larsenip aanaata peroriartornini pillugu annerusumik oqaluttuarneq ajorpoq.

- Isumaqarpunga imatut oqaatigineqarsinnaasoq, sooq qimattussaasarput oqaluuserissavara? oqarpoq Liv Mejer Larsen.

17-inik ukioqarluni Liv Mejer Larsenip aataa, qallunaaq sanasoq ”nunasiap illoqarfissaanik” pilersitsiartorluni Ittoqqortoormiiniittoq, kunngip allagaanik katiffigaa. Danmarkimut kingorna nuupput, Liv Mejer Larsenillu aanaa angerlarsimaffimmi ningiunngorpoq.

Ittoqqortoormiini aasaanerani taamaallaat marloriarluni allakkisartunik umiarsuaqartarpoq. Liv Mejer Larsenillu aataa ullorsiutit allakkiat angajoqqaaminut najaminullu nassiuttarpai.

- Anaanaga uangalu taakkuninnga misissuinikuuvugut, siullermillu soorunami nunasiffik oqaluttuaraa: Siullermik naalagaq, taava palasi kalaaleq, taavalu nunasiffimmi najugallit allat, Liv Mejer Larsen oqarpoq.

Ullorsiutinili allassimanngilaq anaanami naapinnera.

- Immikkoortitaarsimaqaat, tamannalu soqutiginarpoq, nalunnginnatsigu kalaallimik nuliartoq, Liv Mejer Larsen taamanikkut qanoq pisoqarsimaneranik eqqarsaatiginneqqissaartartoq oqarpoq:

- Aanama qanoq misigisimanera assut eqqarsaatigisarpara.Naapinnerit assigiinngitsorpassuit taakku qanoq misigisimavai?

Kalaallit Nunaanni iluatsitsilluartoq

Tasiilami atuarfimmi Liv Mejer Larsen, Mikael Frankimik atilimmik immikkuullarissumik matematikkimik, fysikkimik kemiimillu ilinniartitsisoqarpoq.

- Ilinniartitsisoq taanna assut ingerlalluartuuvoq, immaqa isumannaallisaanikkut illersorneqarsinnaasumit annerusumik, Liv Larsen oqarpoq illarlunilu.

Apeqqutinik amerlasuunik apersuisarpoq, atuartut kajumissaartarpai, ilinniartitsinermilu timitaliilluarsinnaaneratigut Liv Mejer Larseni soqutiginnilersittarpaa. Meeqqat atuarfianni naammassigamiuk Danmarkimi efterskolerlunilu ilinniarnertuunngorniarpoq, biologi qaffasinnerusi sammisaralugu.

Allanut teorilerineq pikkunaannerpaat ilaanniittarpoq, naammassiniarneqapallattarlunilu. Taamaattorli Liv Mejer Larsenip assinik isiginnaarneq, teoriimik ilinniarneq kingornalu misileraasarnerit nuannarai.

- Pinngortitami uumassusillillu iluani pisartut imminnut atassuteqarnerat assut soqutiginartippara, Liv Mejer Larsen oqarpoq.

Ilinniarnertuunngorniarfik naammassiguniuk universitet aallartissavaa. Biologi immaqaluunniit spaniamiusut ilinniassallugit taakku aarlaat toqqagassarai, tamaasami ilinniarnertuunngorniarfimmi qaffasinnerusumik sammisarai angusarissaarfigalugillu. Pinngortitaq kulturili.

- Ilisimasaqalerniarnermut periaatsit taakku assigiinngillat, Liv Mejer Larsen oqarpoq.

Københavnip Universitetiani biologimik bioteknologimillu ilinnialerpoq. Kulturimilli soqutiginninneq Liv Mejer Larsenip bakterianut, cellenut enzyminulli isiginnittaasianut sunniuteqalerpoq. Kandidatinngorniarnermini ’Kalaallit Nunaata naatsiiassartai iluatsitsiffiusut’-nik qulequtalimmik, 2011-mi ilisimatusarnermut nersornaasiuttagaanik Academicus Arcticusimik aamma 10.000 koruuninik akissarsisinneqartumi, ilisimasat Kalaallit Nunaannut iluaqutaasinnaasut pissarsiarinissaat pingaartippaa. Ilinniartitsisuminit isumassarsisitaalluni kalaallit bakteriaat pesticidinut avatangiisinut pitsaanerusutut taartaasinnaasut misissorpai.

Kalaallit Nunaata ilaanik ilisimasaqarfiginngisaminik mikroskopi atorlugu misissueqqissaarpoq, taamatullu aamma Kalaallit Nunaannit kingoqqisuunini pillugu paasisaqarnerorusuppoq.

- Kalaaliunera oqaatigissallugu taamani merserisarpara, takuneqarsinnaannginnami kalaaliusunga kalaallisullu oqalussinnaananga, Liv Mejer Larsen oqarpoq.

Nalunngilaali Kalaallit Nunaannut uterusulluni.

Ilinniartitsineq siunertalik

Liv Mejer Larsen ilinniarnermini ilisimasani allanut paasinartunngorlugit nassuiarsinnaagai ilinniartitsisuisa maluginiarsimavaat. Aasianni GUX-imi biologimik ilinniartitsisutut atorfinitsinneqarnermini ilinniartitsisutut misilittagaqanngilaq. Suliffilli nuannarilerpaa, pingaartumik suleqatiminut atuartuminulli attaveqarneq.

- Danmarkimi ilinniarfinni sungiusimasannit allaanerusumit toqqaannarnerusumik attaveqatigiipput, Liv Mejer Larsen oqaluttuarpoq.

Nuummut ukiut marluk qaangiummata nuuppoq, GU-milu atorfinilluni.

Ilinniarnertuunngorniarfik anginerummat Liv Mejer Larsenip suleqatini amerlanerusut oqaloqatigisinnaavai.

- Nuannerluinnarpoq. Taamaattorli ilinniartitsinerup inerisarnissaa suli ujartorpara ilinniartitsisutullu sulininni ukioq kingulleq iikkamut aportaartutut misigisimavunga oqaluttuarpoq.

Ilinniartitseriaaseq atorneqartoq danskit ileqqui atorlugit annertuumik ingerlanneqartarnera ukiut ingerlaneranni paasivaa. Ilinniartullu naqisimaneqartut taassuma misigaa. Atuartitsinermi periasaallaqqissuunerup annertuumik pingaartinneqarnera, nappaaqqaarniunneq oqassagaannilu nipituumik oqartariaqarneq.

- Atuartuutikka kisimik taamaanngillat, Liv Mejer Larsen oqarpoq.

Taamatuttaaq allatut ilinniartitsisinnaaneq ilisimasaqarfiginngilaa. Tamanna aallaavigalugu kalaallisut ilinniartitsinermik kultureqalernissaq misissuiffigalugu aallartippoq, kalaallinut ilinniartunut annerusumik tapersersuisinnaasumik.

- Immaqa allatut ilinniartitsisoqarsinnaagaluarpoq, aalajangersimasumik angusaqartuaannarnissaq piumasarineqarani, atuartuulluartutut nalilerneqarumalluni allanngortariaqarnani, Liv Mejer Larsen imminut aperaaq. Periarfissat atuuttut iluanni aaqqiissutissarsinngitsoorami soraarniarluni aalajangerpoq. Amerlavallaanimmi suliffimminit angerlartarpoq naammaginanngilluinnartutut misigaluni.

Ilinniarnertuunngorniarfimmi ilinniartitsisutut ukiuni qulingiluani sulivoq. Ilinniartitsilluarneq — ilinniartut ilikkagaqarnissaat kisiat pinnagu aammali toqqissisimanissaat —eqqarsaatiginerpaasarsimavaa.

Biologimi bacheloritut ilinniagaqarfiusumi SILA-mi, Kalaallit Nunaanni pinngortitamik ilisimatusarnermik ilinniarfiit siullersaanni, studieadjunktitut ullumikkut atorfeqarpoq. Ilinniartut ilaatigut biokemiimik, issittumi ikiueqqaarnermik ilinniartittarpai aamma pikkorissaanissanik aaqqissuussisarnissaanillu pilersaarusiortarluni.

Tuttunniartarneq ilinniartitsissutigineqarpoq

Ilinniarnertuunngorniarfimmi ilinniartitsisuulluni sulinermini Ilisimatusarfimmi Oqaatsit, Atuakkiornerit Tusagassiuutillu ilinnialerpai. Nunatsinnut uterami kalaallisut ilinniartitaanini ingerlateqqippaa, aamma kalaallisut aallartitanut ilinniartitsisuunissaq kissaatigalugu. Ilinniarnermini aamma atuakkiorneq tusagassiuutillu ilinnialerpaa.

- Pissanganaqaaq!

Allassimaffiit assigiinngitsutigut misissorneqarput, tamannalu Liv Mejer Larsenip pinngortitamik ilisimatusarnermit ilisimasaanit allaaneruvoq.

- Tamanna biologimik ilinniartitsinerup allaanerusumik ingerlanneqarsinnaaneranik isumaqalersitsivoq, Liv Mejer Larsen oqarpoq. Pinngortitalerinermik ilinniartitsineq pillugu eqqarsaatigisarsimasani killeqarpallaartutut misigilersimavaa. Inuit pinngortitalerinermik ilinniartitsinerup allatut ingerlanneqarsinnaaneranik aamma isumaqartut ujartorpai. Ilinniartitsisutut unamminiarnartunut isiginnittaasia allanngortippaa periarfissanillu takunnissinnaalerluni.

- Paasigakku nuannarilluinnarpara, Liv Mejer Larsen oqarpoq.

Liv Mejer Larsenip kandidatinngorniarluni allaaserisami Aviâja Lyberth Hauptmann, aamma biologiusoq ullumikkullu SILA-p biologimik bacheloritut ilinniarfiani pisortaasoq, naapippaa. Taamanikkut quiasaarlutik, ilumoorpasinngillalli, eqqartorsimavaat tuttunniartarneq biologiini ilinniartitsissutigineqartalerpat qanoq nuannertigissagaluartoq.

- Tuttut piniarneranni uumassusillit pillugit ilisimasarpassuaqartarpoq, tuttunniarnermilu iluatsitsissagaanni taama ilisimasaqartigisoqartariaqarpoq, Liv Mejer Larsen oqarpoq.

Taakkua isumaat naapertorlugu ilisimatusarneq laboratoriami atuarfimmilu piinnarnani ulluinnarni pisarpoq, ilinniartitsinerminnullu tunngatillugu tamanna qanilliniarlugu sulissutigaat.

Liv Mejer Larsen SILA-mi programmimik ataqatigiissaarisutut 2022-mi atorfinitsinneqarpoq, kingornalu studieadjunktinngorpoq. Ilinniartut siulliit januaari 2025-mi tikilluaqquneqarput. ”Tuttu“ ingerlareersimasaminnut ilaavoq.

Napparsimmavimmi nuersaasartoq

Liv Mejer Larsen nuersaakulasuuvoq. Qilattaatit inuuneranut marlunnik sunniuteqartarput. Allamik suliaqarnermit allamut saasaniarluni atortarpai, imaluunniit assani atortillugit malugilertarpaa eqqarsaatini eqqissisut.

Aasaanerani ataataa toquvoq, tamatumalu siorna Danmarkimi napparsimmavimmi pulaarpaa. Sinitsillugu alersersuarnik nuersaavoq. Nuersarneq tassaammat assammik suliaqarfiusoq ilagisartakkanillu peqateqartuarsinnaasoq, nassuiaavoq.

Taamaattumik ikinngutini pulaaraangamigit allaalluunniit atuartut angalaqatigigaangamigit qilattaatit nassartarpai.

Suliffimmi ilinniartut kisimik ilinniarneq ajorput. Aamma Liv Mejer Larsen nammineq ilinniagaqarpoq. Ilinniartut kalaallisut oqalukkaangata, assersuutigalugulu uumasuusiorneq pillugu oqaluttuatoqqat nassaarigaangamigit, ilumigut arlaannik pisoqartarpoq. Ilusilersorneqartarpoq. Ulluinnarni kulturiminik ilisimasaqarnani itisiliisinnaanini immikkut pisinnaatitaaffittut isigaa.

- Ajunngilaq, inersimasutut tamakkuninnga ilinniarnissamut periarfissaqarpasippoq, oqarpoq.