Naalakkersuisup erngup nukissiorfianik suliariumannittussarsiuusseqqinnissaq qaqugu pissanersoq oqaatigisinnaanngikkaa 

Utoqqarmiut Kangerluarsunnguanni erngup nukinganik nukissiorfiup allilerneqarnissaanut neqeroortitseqqinnissaq qaqugu pissanersoq, Avatangiisinut, Pinngortitamut, Nukissiutinut, Ilisimatusarnermullu Naalakkersuisup piffissalersuilluni maanna oqaatigisinnaanngilaa. Naalakkersuisoq Sermitsiamit apersorneqarnermini suliniutip killiffianik ilisimatitsinermini taama oqarpoq.

- Suliat maannakkorpiaq ingerlapput. Ullunik taakkartuinngikkaluarlunga. Suliariumannittussarsiuussinerup siulliup iluani ilinniarfigisimasagut taakkua assiganik peqqinnginnissaq soorunami eqqummaariffigaarput, Jørgen Rosbach (D) oqarpoq.

Suliniummut siornatigut neqeroortitsisoqareeraluarpoq, taannali atorunnaarsinneqartoq, sanaartortitsisoq, Namminersorlutik Oqartussanit pigineqartoq, NunaGreen, ukioq manna marsip 24-anni nalunaaruteqarpoq. Tamanna suliassamik naammassinnikumalluni neqeroortup ataasiinnaaneranik akisuallaarneranillu peqquteqarpoq.

AAMMA ATUARUK

Erngup nukinganik nukissiorfiliornissaq ajornartorsiortoq: Suliarinnittussarsiorneq taamaatinneqarpoq

Naalakkersuisup neqeroortitseqqaaraluarnermi suut ilinniarfigisimanerlugit imaluunniit maannakkut suut pikkoriffigineruneritsik itinerusumik itisilinngilai. Neqeroortitseqqittoqarnissaanili neqeroortut amerlanerunissaat neriuutigaa.

Imaarukkiartortoq

Utoqqarmiut Kangerluarsunnguanni suliniummi 16 kilometerisut takitigisumik sullorsualiortoqassaaq. Sullorsuakut tassuuna maanna nukiliorfiup imeq atugaa imermik immerneqassaaq. Maannakkullu nukiliorfiusup imeq atugaa milliartuinnarmat pitsaasuusorineqanngilaq. 

- Ukiumut 80 gigawatt time-nik atuineruvugut, tassa imaarukkiartorpoq, piujuartitsinermillu eqqarsassagutta tamanna pinaveersaartussaagaluarparput, Jørgen Rosbach oqarpoq.

Utoqqarmiut Kangerluarsunnguanni alliliineq 3 milliardit koruunit missaannik akeqassasoq siornatigut tagginneqarpoq. Taamaalilluni Kalaallit Nunaanni sanaartukkani akisunerpaat ilagissavaat. Taamanikkulli naliliinermit sanaartornermi akit maannamut qaffapput. Suliassarlu maanna qanoq akeqarnersoq Naalakkersuisup neqeroortitsisussaaneq innersuussutigalugu oqaaseqarfigiumanngilaa. Suli neqeroortoqannginnerani akinik taakkartuinissani, Naalakkersuisup innimigaa.

Kangersunermi suliniut kingulliussasoq

Aasiaat Qasigiannguillu akornanni, Kangersunermi, erngup nukinganik nutaavimmik sanaartortoqassasoq Inatsisartut 2021-imi Utoqqarmiut Kangerluarsunnguata allilernissaanut atatillugu aalajangernerminni aamma aalajangiuppaat.

Suliniutilli taassuma aallartinnissaa Utoqqarmiut Kangerluarsunnguanni suliassap aallartinneqareernerani aatsaat pisinnaasoq, Naalakkersuisoq ilisimatitsivoq. Taamaattumik suliniutip taassuma qaqugu aallartinnissaa aammalu suliariumannittussarsiuunneqarnissaa suli nalunarpoq.

AAMMA ATUARUK

Erngup nukinganik innaallagissiorfik tusarniaassutigineqartoq: Uuliamik annertuumik atuinermut taartaassaaq

- Ilungersunartumiilaarpoq. Tamanna imatut paasineqassaaq Utoqqarmiut Kangerluarsunnguanni suliariumannikkusuttup ataasiinnanngornerata kingorna akit qaffasippallaat nerriup qaavanut ilineqarnikuupput. Taamaalilluni suliassaq taanna (Kangersunermi suliniut, aaqq.) aallartissinnaajunnaarallarluni, Jørgen Rosbach oqarpoq.

Tassa imaappoq, Utoqqarmiut Kangerluarsunnguanni suliniut suliarineqarluni aallarteqqaassaaq taassumalu kingorna Aasiaat Qasigiannguillu akornanni sanaartorneq aatsaat aallartinneqassaaq.

Suliniummut tassunga nalunaarusiaq, tassa avatangiisinut sunniutissanut tunngasoq, siorna upernaakkut tusarniutaareerpoq. Suliniutip taassuma ukiuni sisamangajanni sanaartorneqarnissaa naatsorsuutaavoq. Erngup nukinganit innaallagissiap Qasigiannguanut anngunnissaanut 38 km-erisut isorartutigisumik, Aasiaallu tungaanut 117 km-erisut isorartutigisumik innaallaagissamut aqqussiortoqassaaq. 

Taassuma saniatigut aamma napparutinik 420-nik napparusersuinissaq pilersaarutaavoq. Kiisalu aamma suliaqarfimmi aqquserniortoqassaaq, sullorsualiortoqassaaq illoqarfinnilu taakkunani marlunni aamma illutanik sanaartortoqassaaq.

800 millionit koruunit angullugit atorniarsinnaarusuttut

Aningaasanut aappaagumut inatsisissap iluani, oqaaseqatigiit misissoraanni, suliniutinut taakkununnga tunngasunut, aningaasanik amerlanerpaamik 800 millionit tungaannut atorniarsinnaanissaq, Naalakkersuisut pisinnaatitsissuteqarfigerusuppaat. Erngulli nukissiorfissaannut taakkununnga toqqaannartumik tunngassuteqanngitsoq, Naalakkersuisoq oqarpoq.

Suliniutimmi taakkua pilersinneqarpata Nuummi, Aasianni Qasigiannguanilu Nukissiorfiit atortulersuutitigut aamma naleqqussartariaqalissasut, tassanilu aningaasanik atorniarnissaq pisariaqalissagaluarpat periarfissaq eqqanaareerneqarusuttoq, Jørgen Rosbach oqarpoq.

- Sanaartortoqalerpat illoqarfimmi atortunik nutarsaanissamut pisariaqartitsisoqalertussaagami taakkulu aningaasat illoqarfiit taakku iluani nutarsaanissamut eqqarsaataasuupput, Naalakkersuisoq oqarpoq.

Illoqarfinni taakkunani assersuutigalugu kabelit taarsersugassat, atortut innaallagissamut tunngasut, teknikkikkulluunniit atortut pisariaqartinneqalissasut, naalakkersuisup naatsorsuutigaa. Aningaasanik atorniartoqassappat tamanna ukiuni 30-ini akilersorneqarsinnaassaaq. Suliariumannittussamik nassaareernermi aatsaat atorniartoqassanersoq paasinarsissasoq Naalakkersuisup erseqqissaatigaa. Suliariumanninniarlutik toqqagaajumaartussat qanoq suliaqartussaanerat tassani apeqqutaassammat.