- Nunani allani politikkikkut pissutsit ilungersuutigissavatit

- Ajunngilaq, misiliineruvoq, videomi nipi oqarpoq.

Gudrun Havsteen-Mikkelsenip, ilusilersuisartup assiliallu atorlugit tusagassiortup, mingutsitsinnginnerulernissaq, Europami sakkussiorneq teknologiikkullu suliffissuaqarneq Kalaallit Nunaata ataaniittunut qanoq attuumassuteqarnersut paasiniarniarlugu Kalaallit Nunaanni aatsitassarsiorneq ukiuni qulini malinnaaffigisimavaa.

- Tamarmik siunertaqarluartutut isiginissaat ilaannikkut isumaqanngilluinnarsinnaavoq, Gudrun Havsteen-Mikkelsen oqarpoq nangillunilu:

- Nunat assigiinngitsut akornanni politikki ilungersuutigissavat.

Misissuinerata inernerigallagaa, Københavnimi eqqumiitsulianik ilusilersuinermillu saqqummersitsivimmi Officinet-imi saqqummersinneqartoq, maanna takusinnaavarput. Saqqummersitsineq ' If in a hole, keep digging'-imik (itersamiikkuit assaannarit, aaqq.) Gudrun Havsteen-Mikkelsenip nammineq suliaata ingerlarnganut naapertuuttumik qulequtserneqarsimavoq.

Saqqummersitsinermi videoliaq qitiuvoq, tassanilu Gudrun Havsteen-Mikkelsenip aatsitassalerinermik eqqumiitsuliornerminik misigisassarsiornera nalunaaquttap akunnerini pingasuni isiginnaarutini arfineq-marluusuni isiginnaagassiarineqarpoq.

Tamanna pissutigalugu sumiiffinnut kikkunnut tamanut ammanngitsunut isersinnaasimavoq. PETG-milli sanaaq atortorillualersimasani, plastikkisut manngersutut ittoq, iluaqutigalugu isertarpoq.

Hestitut Trojameersutut taasani: Karsi pingasunik niululik nammineq ilusilersukkani saqqummersitsivimmi illuatungaaniittoq.

Taanna avatangiisinut sunniutinut uuttuinermut atortorissaarutaavoq. Avatangiisiniulli tunngasortaa Gudrun Havsteen-Mikkelsenip soqutigisorsuunngilaa.

- Aatsitassarsiornerup inuiaqatigiinnut nunanullu allanut sunniutai soqutigineruakka, taanna oqarpoq.

Avatangiisinik illersuisutut uuttortaasartullu pissusilersornermigut sumiiffinnut tamanut matoqqasunut isersinnaalerpoq.

- Avatangiisinut tunngatillugu aatsitassarsiorfiit inatsisit atuuttut maleruartaramikkit isertugassaqanngillat, Gudrun Havsteen-Mikkelsen oqarpoq.

- Misissuissutit malussarissut atorlugit politikkikkut maleruaqqusat aningaasaliisullu oqariartuutaat avaqqunneqarsinnaapput, aatsitassarsiornermilu unammineq iluaniit malinnaaffigineqarsinnaavoq, taanna videomi oqarpoq.

Kuultisiornermik soqutigisaqartoq

Gudrun Havsteen-Mikkelsenip hestimik Trojameersumik taagukkani videoliuutinilu atorlugit Sisimiuni Aatsitassalerinermik Ilinniarfimmi ujarassiuut Kuannersuarni Narsap eqqaani misissuisut malinnaaffigalugit Amaroq Mineralsip Nalunami kuultisiorfia aamma Greenrocs-ip Amitsumi aqerluusassamik piiaaffia iserfiginnaasimavai. Saffiugassat nammineq tigummisinnaasimallugillu, ataatsimeersuarnernit assiliiffigisinnaallugillu ilaatigut suliffeqarfinni ilisimatusartunillu apersuisinnaasimavoq.

Saffiugassat sivisuumik soqutigisimavai.

- Qillalaartut, ujaqqat assigisaallu soqutigiuarsimavakka, Gudrun Havsteen-Mikkelsen oqarpoq.

Ukiulli qulit matuma siorna kuultisiornermik soqutigisaqalersimavoq.

Ilusilersuinermi bachelorinngorniarluni Islandimi eqqumiitsuliornermik ilinniarfimmi (Listaháskóli Íslands) ilinniarnermini naggataarutaasumik suliaminut atatillugu siullerpaamik 2017-imi Kalaallit Nunaannut tikeraarpoq.

Marsiuvoq nittaallunilu. Tusarsimavaali Nuup ilaani Qinngorpumi qaqqap eqqaani kuulteqartoq, taamaammat ujaasiniarluni bussit 1-it ilaaffigalugit tassungarpoq.

- Oqaluttuaq sianiilliornerorpalaarpoq, aputeqangaarmammi ingerlaffigisinnaanngilara, qeqqiinnarsuanilu taseqartoq naluara. Kuultimillu nassaarsimagaluaruma piiarnissaanut akuersissuteqanngilanga, taanna oqarpoq.

Kuultimik nassanngikkaluarluni allamik paasisaqarpoq.

Aataqqiia issittumi paasisassarsiortuusimasoq

Taanna nunatsinnukalermat ilaqutariittut oqaluttuassartaata ilaa angutaata oqaluttuaraa:

Aataqqiia Ejnar Mikkelsen danskit issittumi paasisassarsiortut Tunumut nunasisullu Ittoqqortoormiinnillu tunngaviliisut ilagaat. Ejnar Mikkelsenilu Gudrun Havsteen-Mikkelsenip aataavata qitornavissiarimmagu naak aakkut ilaqutariinngikkaluarlutik, kingornussani suliniutini allani misissorsimavaa.

- Tamanna eqqumiinnginnerpa?, taamani imminut aperivoq. Tassami nunasiaanerup oqaluttuarisaaneranut tunngatillugu ullumikkut Danmarkimi ilisimatinneqarpallaarneq ajorput.

- Nunap naqqani pisuussuteqartoq Ejnar Mikkelsenip nalunngilaa, piffissamilu aalajangersimasumi Kalaallit Nunaanni aamma aatsitassarsiortoqarsimavoq, Gudrun Havsteen-Mikkelsen oqaluttuarpoq.

Oqaluttuarisaanermik isornartorsiuilluni eqqarsaatiginneqqissaartarnermi saniatigut aataqqiimi misigisalikkersaarutinik ilisimasanillu ujartuisarnera atuakkiaani atuarsimasani imminermini ilisarisinnaavaa.

- Aamma uanga nunarsuarmi soqarnersoq paaserusuppara, Gudrun Havsteen-Mikkelsen oqarpoq.

Assersuutigalugu Nalunami kuultisiorfik isumaqatigiissuteqarfiginagu Nanortalimmut bilitsisivoq. Nalaatsornerli malillugu Amarup kuultisiorfimmut takuniaanissaq Nanortalimmiunut aaqqissuuppaa.

- Bussi qaqortoq takkuppoq, tassungalu ikivunga, Gudrun Havsteen-Mikkelsen kingusinnerusukkut imminut ilisaritillunilu illoqarfimmik takornariartinneqarsimasoq oqarpoq.

- Tamannali tamatigut pilersaarusiorsinnaannginnermut assersuutaannaavoq. Ilaannikkut suna angusinnaanerlugu paasiniarlugu aallaannartoqarsinnaasariaqarpoq, Gudrun Havsteen-Mikkelsen oqarpoq.

Ilisimasanik allatut ingerlatitseqqiisoq

- Paasissutissanik katersineq taakkuninngalu allatut atuineq pissanganartutut isigiuaannarnikuuara, Gudrun Havsteen-Mikkelsen oqaluttuarpoq.

Nunap assingi qalipaatigissaartut igalaajusamut mattusuumut qullilerlugit qaammaqqusersukkat saqqummersitsivimmi iikkani nivingapput, saagullu takisuut dollarinik angisuunik allallit igalaavini nivingapput. Qarasaasiakkut pinnguaatit ilaannit assilialigaasutut isikkoqarpoq. Piuviusuuvorli:

Nunap assinga ilisimatuussutsikkut misissuinernit paasissutissanik tamanut ammasunik tunngaveqarpoq, Gudrun Havsteen-Mikkelsenillu sumiiffinni suleqatigisimasamini nammineq maluginiagaanik tunngaveqarluni. Taakku atorlugit Kalaallit Nunaanni ujarassiorneq qanoq soqutigisaqartiginersoq takutikkusuppaa. Ilisimatusarfiit, sakkutooqarfiit, nunaminertat akuersissuteqarfiusimasut maannalu akuersissuteqarfiusut, saffiugassaqarfiit, raatioqarfiit, paasissutissanut toqqorsiviit kiisalu eqqissisimatitaasut pinngortitamiluunniit nalinginnaanngitsut nunap assingani ilaatigut takuneqarsinnaapput.

Nunap assinga assigiinngitsorpassuarnik titartagaqarpoq.

- Ilisimatusarfiit ilisimatusartullu ilisimasaminnik avitseqatigisartakkakka tapersersortigaakka, taakkulu ingerlateqqikkusuppakka, Gudrun Havsteen-Mikkelsen suliani pillugu oqarpoq.

Periaatsit tusagassiornermut ilisimatusarnermullu assingusut atortarpai, taakkunanngali allaanerulluinnarluni: Pisimasut tulleriiaarnerini allanngortitsisarpoq, immikkoortunik allannguisarluni, ilaatigullu ilanngussaqartarlunilu minitaqartarpoq.

- Ilusilersuinikkut assilillu atorlugit tusagassiornikkut ilisimatuussutsimi piviusunillu tunngaveqartumik paasissutissat naapertorlugit tusagassiornermi oqaatigineqarsinnaanngitsut oqaatigisinnaalerlugillu takutissinnaavakka, Gudrun Havsteen-Mikkelsen oqarpoq.

Saqqummersitsinermini inerniliinianngilaq. Saffiugassarsiorneq ajunngitsuunersoq ajortuunersorlu nammineq isumaannaat atorlugu taamaallaat inernilerneqarsinnaavoq. Nunarsuarmi politikkimut pilersuinerullu isumannaatsuuneranut attuumassuteqarnera taarsiullugu erseqqissarpaa.

Videoliaa misissoqqissaartillugu nunap iluani qillaalasut kisiisa pineqaratik allanik aamma pisoqartoq erseqqippoq. Gudrun Havsteen-Mikkelsenilu? Assaalluni aatsaat aallartippoq.