Kalaallit Nunaanni eqqumiitsulianik saqqummersitsisarfissaq Nuummiittussaq AG-mit maajimi killiffissiorneqarmat suliniutip piviusunngortinneqarnissaa siornamut sanilliullugu qaninnerulersimasoq suliniummi siulersuisut siulittaasuata Kristine Spore Kreutzmann-ip nalilerpaa.
Piffissami tassani aningaasanit pisariaqartinneqartunit 250 millionit koruuninit 100 millionit koruunit qulakkeerneqareersimasut siulittaasoq ilisimatitsinikuuvoq, tamatumalu saniatigut siulersuisut periusissiamik nutaamik suliaqartut, suliniutillu sanaartorneqarnissanut pilersaarutit nutarterineqartut aammalu suliniuteqarnikkut aningaasat suli amigaataasut aningaasaateqarfinnut qinnuteqarnikkut eqqanaarniarneqassasut ilisimatitsinikuuvoq.
Kalaallit Nunaanni eqqumiitsulianik saqqummersitsisarfissaq Nuummiittussaq AG-mit maajimi killiffissiorneqarmat suliniutip piviusunngortinneqarnissaa siornamut sanilliullugu qaninnerulersimasoq suliniummi siulersuisut siulittaasuata Kristine Spore Kreutzmann-ip nalilerpaa.
Piffissami tassani aningaasanit pisariaqartinneqartunit 250 millionit koruuninit 100 millionit koruunit qulakkeerneqareersimasut siulittaasoq ilisimatitsinikuuvoq, tamatumalu saniatigut siulersuisut periusissiamik nutaamik suliaqartut, suliniutillu sanaartorneqarnissanut pilersaarutit nutarterineqartut aammalu suliniuteqarnikkut aningaasat suli amigaataasut aningaasaateqarfinnut qinnuteqarnikkut eqqanaarniarneqassasut ilisimatitsinikuuvoq.
- Neriuutigaarpummi aappaagu pisoqarluni aallartittoqarsinnaassasoq, Kristine Spore Kreutzmann taamanikkut AG-mut oqarpoq.
Maanna taamanimiit maannamut suliniut sumut killinnersoq paasisaqarumalluta siulersuisut AG-mit noqqaaffigeqqippagut.
Suliniut pillugu suli periusissiortoqartoq akissutip ersersippaa. Suliniut pillugu ataatsimut isiginnilluni periusissiorneq ingerlanneqartoq tamatumalu saniatigut aningaasaateqarfinnut qinnuteqaasiornerit pillugit periusissiortoqartoq siulersuisunit ilisimatitsissutigineqarpoq.
Taakkulu ilutigisaannik suliniut qimerlooqqissaarneqarlunilu nutarterneqartoq ilisimatitsissutigineqarpoq.
- Ukiut 14-it suliniutigineqartoq siunertaqarluartorlu teqeqqorpassuaqarpoq, suliniut nutarterneqartussaallunilu pissutsinut ullumikkut atuuttunut piumasaqaatinik naleqqussaasoqartussaavoq, Kristine Spore Kreutzmann AG-mut allakkatigut akissuteqarluni erseqqissaavoq.
Aningaasaliinissaq pillugu tigussaasumik anguniagaqartoqanngitsoq
Suliniummut tunngatillugu apeqqut aalajangiisuulluinnartoq tassaavoq aningaasaliineq.
Sanaartorneq aallartinneqarsinnaassappat aningaasat amigaataasut 150 millionit koruuniusut Kristine Spore Kreutzmann maajimi ilisimatitsinikuuvoq. Tamannalu tunngavigalugu aningaasaateqarfinnut qinnuteqaatit qanoq amerlatigisut siulersuisut naatsorsuutigineraat, aningaasat qanoq amerlatigisut ukiuni tulliuttuni qaninnerni neriorsuutaasussatut neriuutaanersut aammalu periusissiaq nutaaq tunngavigalugu aningaasaateqarfinnut nunani tamalaaniittunut qinnuteqaateqartoqassanersoq kiisalu suleqatissat nunani tamalaaneersut nassaariniarneqassanersut AG-mit apeqqutiginikuuarput.
Siulersuisulli kisitsisitalersuillutik aningaasaliisussarsiornissamulluunniit suliniummut piffissalersuillutik akissuteqanngillat.
Aningaasaliisussarsiorneq pillugu suliniutit isertuussaasumik ingerlanneqartut Kristine Spore Kreutzmann tassunga tunngatillugu ilaatigut innersuussivoq.
- Suliniut qanoq annertutiginersoq sanaartorneqarnissaanullu unammilligassat sorpiaanersut siulersuisut ilisimalluinnarpaat, taamaammallu aamma ersarilluinnartumik tunngaveqassallunilu aningaasaateqarfinnut qinnuteqarnernut atatillugu killiffik nutarterneqartuassaaq, taamaaammat suliat taamaattut amerlasuutigut isertuussaasarmata siulersuisunit aningaasaateqarfinnut qinnuteqaasiornernut tunngatillugu sukumiisumik oqaluttuarsinnaanngilagut.
Aningaasat millionilikkaat sinneruuttut tamanit malinnaaffigineqarsinnaasumik qaqugu inissinneqarnissaannut piffissalersuisoqarsimanngitsoq taamaalilluni aamma paasinarsivoq.
Sanaartornissamut suliniut aalajangiusimaneqartoq
Sanaartornissamut suliniummi pisortaasimasoq Nivi Christensen suliniutip qanoq ingerlanneqarnera pillugu soraarnermi kingorna isornartorsiuivoq. Nammineq isumani naapertorlugu Eqqumiitsulianik saqqummersitsisarfissap imarisassaa atuuffissaalu pillugit erseqqissumik siunnerfeqartoqaqqaartariaqartoq tamannalu inissinneqareerpat aatsaat sanaartukkap ilusissaanut atatillugu pisariaqartitat suunersut qulaarneqarnissaat Isornartorsiuinermi qitiusut ilagaat – tamanna sanaartornissamut pilersaarummik pioreersumik aalajangiusimannittoqaannarani pissusissamisoornerussanerarpaa.
Tamanna tunngavigalugu isornartorsiuinerup taassuma malitsigisaanik siulersuisut pilersaarummik allannguinissamik imaluunniit annikillilerinissamik pilersaaruteqarnersut AG-mit apeqqutigaarput.
Eqqumiitsulianik saqqummersitsisarfissap suliniutigineqalerneraniit ukiuni 20-it sinnerlugit ingerlareersumi saqqummersitsisarfissap ilusissaa piffissap ingerlanerani oqallisigineqartuartarsimasoq siulersuisut ilisimatitsipput. Illuutillu pioreersut atorneqarsinnaanerannut tunngasoq tassunga ilaavoq.
Taamaattorli tamanna siunersuisut tunngaviusumik suliniummik ingerlatsinerannut allannguisuunngilaq.
- Siulersuisut suliniutip titartaasartunut unammisitsissutigineqareersutut ingerlaannarnissaanik kissaateqarnerminnik allannguinngillat, Kristine Spore Kreutzmann allappoq.
Taamaattorli sanaartornissamut suliniut nutarterneqassaaq, tassanilu sanaartorneqarnissaanut siunnersuut aammalu illuutip naammassineqareernerani ilusissaanut tunngasut nutarterneqassapput, tamannalu pereerpat aningaasaateqarfinnut qinnuteqaatinik suliaqarneq ingerlateqqinneqassaaq.
Allaffik nutaaq eqqumiitsuliortunillu isumasioqatigiissitsineq
Aammattaaq siusinnersukkut killiffissiuinerup kingorna tigussaasunik arlalinnik pisoqarsimavoq.
Siulersuisut allaffittaarsimapput, tamatumalu ilutigisaanik aamma eqqumiitsuliortunut sivikitsumik Nuummiittunut unnuigallartarfeqalersimavoq. Tamatumalu saniatigut aningaasaateqarfiup malittarisassai ukiut 20-it sinnerlugit pisoqaassusillit nutarterneqarsimapput.
Taamatuttaaq eqqumiitsuliortut peqatigalugit saqqummersitsisarfissaq pillugu isumasioqatigiittoqassasoq, eqqumiitsuliortullu peqatigiiffii kattuffiilu akuutinneqarnissaat siunertaralugu saqqummersitsisarfiup nuna tamakkerlugu atuutsinneqarnissaanik kissaateqarnerup siammarneqarnissaa siulersuisut sulissutigaat.
Tamanna suliniut Nuummiikkaluartoq sinerissami innuttaasut piginneqataasutut misiginissaanik kissaateqarnermik Kristine Spore Kreutzmann-ip maajimi oqaatigisaanut naapertuuppoq.
Isumasioqatigiinneq qaqugu pissanersoq, taamatuttaaq suliniummut atatillugu qaammatini tulliuttuni pilersaarutit tigussaasut allat suunersut pillugit apeqqutigut siulittaasup akissutaani erseqqissumik akissutissarsinngilagut.
Pisortassamik nutaamik suli ivertitsisoqassamaanngitsoq
Taamatuuttaaq suliniutip ataqatigiissarneqarnera qanoq iluseqassanersoq suli erseqqissinngilaq.
Nivi Christensen-ip soraarnerata kingorna suliniummi pisortaagallartussamik sulilersitsisoqarpoq. Pisortamik ataavartumik atorfeqartitamik pissarsiornissaq sumut killinnersoq taassumunngalu atugassarititaasussat suliassaalu pillugit AG-mit apeqquteqaraluarpugut, erseqqissumilli akineqanngilagut.
Akissarsiassaattaaq sulinerminilu saniatigut suliassai pillugit apeqqummut siulersuisuttaaq tigussaasumik akissuteqanngillat.
Paarlattuanilli sulisussarsiornissaq piffissami qaninnermi pilersaarutigineqanngitsoq erseqqissumik oqaatigineqarpoq.
Siulersuisut naapertorlugit ulluinnarni allaffissornikkut aqutsineq suliassallu tassunga tunngasut siunnersortinit suliniummut attuumassuteqartinneqartussanit ingerlanneqarallassasut pilersaarutaavoq. Periusissiamillu suliaqarneq siuarsimanerulereerpat siulersuisut ataqatigiissaarineq qanoq ittuussanersoq aammalu atorfinitsitsiniarnissaq pillugu siulersuisut isummerumaartut akissummi ersersinneqarpoq.
- Taamaammat suliniutip iluani suliassat assigiinngisitaartut amerlasuujummata, taakkulu periusissiap suliarneqarnerani sukumiinerusumik qulaajarneqarlutillu periusissiamut ilanngullugit ilusilersuereernermi atorfinitsitsinissaq tulleq sulissutigineqassasoq siulersuisut naliliipput, Kristine Spore Kreutzmann allappoq.
”Saqqummersitsisarfissaq ukioq 0-miippoq”
Suliniut siusinnerusumut sanilliullugu piviusorsiorpalaarnerusumik inissisimasoq siulersuisut maajimi erseqqissaanikuupput, taamaattorli maanna Kristine Spore Kreutzmann ullumikkut killiffik pillugu allaanerusumik akissuteqarpoq.
Nunatsinni eqqumiitsulianik saqqummersitsivissaq suli illutaqarluni imaluunniit ingerlatsivittut ingerlanneqartutut inissisimalinngitsoq taassuma erseqqissaatigaa, taannalu allappoq:
- Saqqummersitsisarfissaq ukioq 0-miippoq piviusunngortinneqarnissaalu suli kajumissuseq tunngavigalugu suliniartunit sulissutigineqarpoq.
Taamaammat suliniutip siunissami ingerlanneqalerumaarnissaa pillugu isornartorsiuineq siusippallaartoq siulersuisut isumaqarput. Illutassaa aningaasaliinissarlu siulliullugit qulakkeerinninnissaq maanna pingaarneruvoq.
Tassunga tunngatillugu eqqqumiitsulianik saqqummersitsisarfissaq piviusunngorumaartoq siulersuisut suli upperaat.
Taamaattorli maajimi killiffissiuinermut sanilliullugu apeqqutit pingaarutillit arlallit suli akissutissaqartinneqanngillat: Periusissiaq suli naammassineqanngilaq, anguniakkat tigussaasut suunersut tamanut tusarliunneqanngilaq aamma piffissalersuilluni aningaasaateqarfinnut qinnuteqaatit ingerlanneqarnissaat ersarissinngilaq, suliniummilu pisortassaq nutaaq siulersuisut siunissami aaqqissuussaanermut tunngatillugu pilersaarutaat naammassereerpassuk aatsaat pissarsiariniarneqassaaq.
Paarlattuanilli sanaartornissamut pilersaarut pioreersoq siulersuisut sulinerminni aallaavigilluinnarpaat.
- Suliniutip piviusunngortinneqarnissaanut tunngatillugu siulersuisut isumalluarput, Kristine Spore Kreutzmann allappoq.
