Pinngortitaq inuusuttortatsinnut qiimmassaataassasoq

Anna Uzelac Nørgaard, atuarfimmi pisortaagallartoq, Tasiilami misiliummik nutaamik suleqataavoq, tassani pinngortitaq, timigissartarneq ataatsimoornerlu atuartut atuarfimmi inuunerannut ilaatinneqartassapput. Kommuneqarfik Sermersooq nittartakkamini taama allappoq.

- Ataatsimoornermut uunga nuannersumut qilanaarpugut, meeqqat tapersersussavagut aamma siunissami takorluugaannut ingiaqatigissavagut. Atuaqatigiiaat naapeqqaarneranni kiinnat qungujulasut takullugit nuannerput, alapernaapput aperalutillu qajartorsinnaanerlutik, nalullutik aamma aalisarsinnaanerlutik niviugattalimmik aappaagu upernaakkut Skotlandiliarutta. Tasiilattaaq timaani pinngortitamiinnissaq pillugu eqqarsaasersorneq assut qiimmatsaatigineqarpoq. Ataatsimoorluarnermik aallartilluarneq. Assigiinngitsut akornitsinni suleqatigiilluarnissatsinnut qilanaarpugut, Anna Uzelac Nørgaard oqarpoq.

Kommuneqarfik Sermersooq suliniummut ukiut marluk ingerlaneranni ingerlasussamut, peqatigiiffik iluanaarniuteqanngitsoq Sustainable Now suleqatigalugu ingerlanneqartussami Folketingimi Kalaallit Nunaat pillugu ataatsimiititaliamit 3 millionit koruuninik aningaasaliiffigineqarpoq.

Ilinniartut The Polar Academy Greenland aqqutigalugu silami sammisaqartarnermikkut ukiup ingerlanerani ilinniarnissamut periarfissaqarput. Ilinniartut imminut tatiginerulernissaat, akisussaaffeqalernissaat piginnaaneqarnerunissaallu siunertaavoq.

Suliniut Skotlandimi peqatigiiffimmit The Polar Academymit, inuusuttunik timikkut sungiusaanermik, silami inuunermik issittumilu ilisimasassarsiornermik suliaqartumit, isumassarsiarititaavoq. Skotlandimi peqatigiiffik Tasiilami misileraalluni suliniuteqarnissamut misilittakkanik avitseqatigiinnermillu tunniussaqassaaq.