Sara Marie ileqqutoqqanik ataavartitsivoq

Iqaluit 2024.

Sara Maire Canadami Nunavummiippoq. Suliffini mersortarfik Kittat aallaavigalugu maanna periarfissaqalerpoq naggueqatimi naapinnissai. Misigissuseq ilisarnarsinnaavoq. Soorlulusooq ilisisarisimariikkamut arlaannut angerlaannarluni. Naggueqatitta eqqissisimasumik inooriaaseqarnerat maluginiarpaa: Piffissalersuisoqarpallaanngilaq, aalajangersimasumillu isumaqatigiissuteqanngikkaluarluni takkutiinnartoqarsinnaavoq. Tamanna Sara Mariep eqqarsartaasianut tulluartorujussuuvoq, tassanimi pissusissamisoortumi ilumoorsaarfiunngitsumilu inuuneq nuannaraa.

Angalaneq sunniuteqarsimavoq. Takusinnaalersimavaami qangaaniilli inooriaasitoqaq, pingaartitagullu qanoq tamaani katassimatiginerigut. Taamanna nikalluallaatigaa. Taamaammallu arnat saviannik ulumik pisisimavoq. Maluginiarsimavaami inimi ulu nivingatinneqartartoq, soorlu kalaallisuut aamma ulluni pingaartuni aatsaat atorneqartalersimasut.

Sara Marialli ulua iikkami pinnersaatitut nivingatinneqaannassanngilaq. Mersortarnerminimi, sulinermini, ileqqutoqqanillu attassiinnarnissamini atussavaa. Soorluuna mattak ulu atorlugu aggoraanni mamarnerulissasoq, qungujulaarluni isumaliuutersuutigaa.

Sara Mariep angerlarsimaffimminut Nuummut uternermi kingorna Iqalunnut angalanini mersortartutut namminersulernissaminut aqqutissiuisut ilaanniilissasoq eqqarsaatigisimanngilaa.

Misigisat taakkua, nammineq mersortarnermigut kalaallit kulturiata assassornermikkullu ileqqutoqaasa utertinnissaanut iliuuseqarusulersitsipput.

Sara Marie L. Berthelsen novemberip aallartilaarnerani mersortartutut namminersortunngorpoq, suliffeqarfeeraalu ”Qilertilik”-mik ateqarpoq. Arnaq ulumik atuisuusoq pillugu maanna paasisaqarneruleriarta. 

Qapiarfissuarmi meeraaneq

Sara Marie L. Berthelsen 1982-imi juulip qulingani Nuummi inunngorpoq. Tassani peroriartorpoq. Perorsaasoq Naja Qujaukitsoq aamma tusagassiortoq Søren Petersen Lyberth angajoqqaarai. -Aqqaluaqarlungalu nukaqarpunga. Angajullequtaavunga, taamaammallu nukittunerpaallunga, pinnernerpaallungalu pitsaanerpaavunga, Sara Marie Lyberth Berthelsen illarluni oqarpoq.

Inunngornerata nalaani Nuuk sukkasuumik ineriartorpoq. Illoqarfik sukkasuumik alliartorpoq, inissiallu qaqqat sinaanni sananeqarput. Tamatuma nalaani Inuit Circumpolar Council pilersinneqaqqammerpoq, kalaallillu oqaatsitik, kulturertik kinaassusertillu ilisimalluarpaat. Sara Marie sukkasuumik inereriartornerup nalaani illoqarfiup qeqqani Qapiusarfissuarmi toqqissisimalluni peroriartorpoq.

- Sutsera oqummiarlugu iggavimmi illunnguusarlunga qaatoqqaarpunga. Sutsitugara kimmarlugu putoorniarsaraara. Tamanna qanoq uteriitsigininnut takussutissaaginnarunarpoq, qungujulaarluni eqqaasaqarpoq.

Niviarsiaraq atuaqatigiinni nipaatsortaasoq

Sara Mariep atuartuunini Atuarfik Samuel Kleinchmidtimi, ulluinnarni ASK-imik taaneqartartumi, aallartippaa.

Atuaqatimi akornanni tunuarsimaartuullunilu nipaattortaasimavoq.

- Nipaatsuunera tunuarsimaartuuneralu peroriartorninni uannut akornutaanikuuvoq, Sara Marie Lyberth Berthelsen oqarpoq.

Sunngiffimmi meeqqat allat peqatigalugit silamiittarpoq.

- Silami pinnguartaqaagut, arpattagiarlutalu, attortaattarlutalu toqqortaattarpugut. Taamanikkut nuanneqisoq, taanna oqaluttuarpoq.

Sara Mariep meeqqat atuarfiat naammassigamiuk Qallunaat Nunaannut efterskoleriarluni aallarpoq. Anguniagaq: qallunaatut oqallorissinissaq.

- Kalaalertatuaassallunga neriuutigisimavara, oqarpoq. Sara Mariep nuannaarlunilu qilanaartup angajoqqaani qimallugit nammineersinnaaneq ilinniassavaa.

- Aallarnera uannut iluaqutaasimaqaaq. Nutaanik ikinngutitaartorlungalu nutaanik misigisaqarpunga, Sara Marie eqqaamasalersaarpoq.

Efterskole naammassigamiuk inuunerup nutaap alloriarfigeqqinnginnerani anaanani qatanngutinilu peqatigalugit Kretamut seqinnarissumut, imaanullu isikkivilimmut feriarput.

- Eqqaamaniarpara anaanaga isumalulaartoq, immaqa aamma uisakajaarnermik ilallugu. Naggataatigut qatsussiummernerup ilutigisaanik oqaasinnguiffigaara.

Taama oqaasinnguiffiginera uangassaqqinngikkaluarpoq, naliginnaasumimmi inuk tunuarsimasuuvunga. ”Kiisami!” anaanaga nuannaajummerluni oqarpoq. Pisimasorlu suli ulloq manna tikillugu eqqaasarpaa, Sara Marie illarluni oqarpoq.

Asanninnersaarsuaq

Nuummut uterpoq. Sara Marie qallunaatut oqqarinnerulernerup imminullu tatiginerulernerup kingorna Nuummi ilinniarnertuunngornialerpoq.

Ukioq 2001.

- Ilinniarnertuunngorniarninni atisanik ilusilersuisartutut ilinniarsinnaaneq pillugu tusagaqarama ima eqqarsarpunga: ”Wow, atisanik ilusilersuisinnaalluni torrassaqaaq” Tamannali annerusumik eqqarsaatiginngilara, Sara Marie eqqaamasalersaarpoq.

Ilinniarnertuunngorniareerluni Nuummi Brugsennimi sulilerpoq, sunaaffalumi inuuneranik allannguisussaqartoq.

- Brugsenimi suleqatigaara. Asannittuuvoq, inuttut ammasoq, oqaluinnaavissorlu. Sunaaffa uissara, illarluni taama oqarpoq.

Sara Mariep uissani ukioq 2005-mimi naapippaa. Maannamut ukiuni 20-ni aappariipput, marlunnillu 2014-mi aammalu 2016 inunngorsimasunik erneqarlutik.

Ukioq 2008 atisanik ilusilersuisartutut ilinniarnissani isumaliuutigilerpaa. Karakterini qaffassarniarlugit Odensemi VUC gymnasiami ilinniartunngorpoq.

- Beklædningshåndværkeritut, taamani mersortartutut taaneqartartutut ilinniarnissara uannut tulluarnersoq atisanik ilusilersuisartutut ilinniarnerma nalaani paasinarsivoq, Sara Marie oqarpoq.

Sara Marielu 2014-nimi mersortartutut ilinniarsimasutut imminut taasinnaalerpoq.

Sara Marie mersortartutut allagartaqarluni Nuummut uterpoq.

- Taamanikkut naggussakkut anniartalerpunga. Anniartangaarama naggataatigut nakorsiarpunga, Sara Marie eqqaamasalikkersaarpoq.

Sara Marielu naggussamigut avallunnermik nappaateqalersimasoq paasinarsivoq.

- Nakorsap avalluttunngorsimanera pillugu ulloq taanna paasitimmanga naartulersimallunga ullormi tassani aamma paasivara. Sara Marie oqaluttuarpoq.

Ajunngilaq, iliutatsissaqqaarpoq. Naak timikkut nappaateqalerneq tusarlugu artornaraluartoq, ulloq taanna Sara Mariemut nuannernerpaajusimavoq. Tassami meerartaartussanngorpoq.

- Meerartaarusuttuarsimavungami, Sara Marie qungujulalluni oqarpoq

Mersortarfik Kittat

Nuuk Couturemi mersornermik ilinniarsimasutut siullermeerluni atorfinippoq.

- Atorfittaara tulluusimaarutigeqaara, qitornartaarninnullu atatillugu sulinngiffeqalernissama tungaanut tassani sulivunga. Atorfia aningaasatigut unammillernartoqarnerata nalaanni atuukkunnaarsinneqarpoq. - Pakatsinaraluarpoq, paasinarlunili, Sara Marie Lyberth Berthelsen oqaluttuarpoq.

Taavami? Meeqqat atuarfianni atuarfigisimasamini ASK-imi paarlatsitut sulilerpoq.

- Uannuunngilluaasarpoq. Meeqqanut asannittuuvunga, ilinniartitsisuussanngilangali, taanna oqarpoq.

Sara Mariep illortaavata Nahomep Kittat kalaallisuut pillugit aaqqissuussamik saqqummiussiniartoq ullut ilaanni paasitippaa.

- Kalaallisuut soqutiginartittuarsimavakka. Isumaqarpunga aananniit tamanna aallaaveqartoq, aanamami kalaallisuugut assut pingaartitarai, Sara Marie oqaluttuarpoq.

Tiguartilluinnarpoq Kalaallillu kulturiannik assassortariaasiannillu qanoq pigaartitsitiginerluni malugisinnaavaa.

Ukioq ataaseq qaangiummat Kittat mersortartumik suleqatissarsiorlutik allagarsiisimapput. Torrak. Sara Marie atorfimmut qinnuteqarami sulilerpoq.

- Kittani sulinera uannut isumalerujussuuvoq. Suliffimmi taanna atorfilittut inuttullumi assut ineriartuutigeqaara, Sara Marie oqarpoq.

Ukiuni qulingiluani qaammatinilu arfineq-marlunni Kittani atorfeqarpoq. Sara Marie Kalaallit kulturiannik ileqqutoqqallu malillugit assassortariaatsinik ilisimasaqarluarluni mersortartutut namminersortutut nalorninartumut – aqqummulli pissaganartumut –ingerlaarpoq. Sara Mariep - sungiusimasaminik persuarsiorpalaanngitsumillu iluarisaqartup - namminersortunngornera tulluarluinnarpoq.

Kalallit kultooriat ileqqutoqqallu malillugit assassortariaaseq, uummateqarfigilluarlugu sulinini aqqutigalugu uterteqqikkusuppaa.