Seqineq Tunumi pulassaaq: - Neriuutigaarput amerlasuut isiginnaarumaartut

Pinngortitalerinermik ilinniartitsisup Casper Hagn-Meinckep, Tasiilami seqernup pulanera kingullermik misigimmagu ukiualuit qaangiussimalerput.

Seqineq ilaannakuusumik taamanikkut pulavoq, atuartitaminut seqerngup pulanera taamanikkut isiginnaartillugu, taassuma eqqaamasaqarfigaa.

- Avataarsuani assigiinngitsorpassuarnik annertuunik pisoqartarpoq, avataarsuani pisut qanoq annertutigineri nunarsuarmiuusugut mikivallaarnerput pissutigalugu takorlooruminaatsissinnaavarput, oqarpoq.

Seqernup pulanerani Seqineq Qaammallu qimerloornerisigut avataarsuani nukiit paasisaqarfinginerusinnaagigut, taanna isumaqarpoq.

- Avataarsua qanoq angitigisoq paasigaanni, nunarsuup qanoq mikitiginera aamma paasineqarsinnaavoq. Nunarsuup qanoq mikitiginera, qanorlu erianartiginera paasigukku, takusinnaalissavat uagut inuttut qanoq annertutigisumik sunniuteqarfigisinnaagipput, Casper Hagn-Meincke AG-p tusagassiortua oqarasuaatikkut oqaluunnerani taama oqarpoq.

Seqernup pulalluinnarnissaa aggustip 12-ani malunnartinniarlugu, Islandimi erinarsortartoq Björk ‘rave’-ertitsissaaq Spaniamilu illoqarfiit ilaanni Castilla y Leónimi inuit tusindillit ‘Iberia Eclipse Festival 2026’-mi nalliuttorsiutigissallugu, Tasiilamili seqernup pulaneranik aaqqissuussami, avataarsuata paasiuminaassusaanut paasinninnissaminnut innuttaasut tamarmik periarfissaqassapput.

Pinngortitami pisartut malunnartinnissaat nalliuttorsiutiginissaallu Casper Hagn-Meinckep, Tasiilami Alivarpip kommuunilu aamma qallunaat seqernup pulaneranik suliniutaat ‘Sol26’ peqatigalugu aaqqissuussipput.

- Seqernup pulaneranut seqinersiutit 2000-it missaat nassiuppavut, oqaatigilluaannarlugu Tasiilarmiunut tamanut, Casper Hagn-Meincke oqaluttuarpoq.

Seqernup pulanera Tunumi malunnarnerpaassaaq. Ittoqqortoormiit eqqaanni Kangersuttuup naqqani seqernup pulanera malunnarnerpaassaaq, Tasiilamilu seqernup 93,56 procentia qaammammit asserneqassaaq.

Seqinermik misissuinermut tunngatillugu toqqaannartumik aallakaatitsineq

'Sol26'-mik isumassarsisoq Tina Ibsenimik ateqarpoq. Astrofysikeritut ilinniarsimavoq, aamma podcastini Rumsnak aqqutigalugu assigiinngitsunillu suliniuteqarnermigut ulloriarsiorneq avataarsualiartarnerlu pillugit paasissutissiisarpoq, ilaatigut seqernup pulaneranut suliniummi ukiut marluk matuma siorna aallartissimasamigut.

- Seqernup pulanera manna Danmarkimi ukiup 2048-p tungaanut sakkortunerpaassasoq takusinnaavara, taamaattumillu taamatut isumassarsivunga, taanna oqaluttuarpoq.

Tina Ibsen Amagerip eqqaani Tårnbymi atuarfiani 6. klassimi atuartilluni, seqernup tamakkiisumik pulanera perngaammik misigaa.

Taamaattumik kinguaariinni meeqqat inuusuttullu tamanna aggustip 12-iani misigissagaat, taassuma qularutiginngilaa.

- Pisussaq immikkuullarilluinnartuuvoq, qaqutiguinnaq taama annertutigisumik pisoqartarpoq, taanna oqarpoq.

- Seqinermik ilisimatusarnermi ilisimatuussutsikkut suliat nuannersut aammattaaq seqernup inuiaqatigiinnut, nunarsuarmi uumassusilinnut kulturimullu qanoq sunniuteqarsimanera pillugu oqaluttuassartaa aallartissutigerusupparput.

Seqernup pulaneranut suliniut Kalaallit Nunaanni ingerlanneqarnissaa, pilersaarutaanngikkaluartoq, Tasiilarmiut peqataanerat Tina Ibsenip nuannaarutigaa.

- Kalaallit Nunaannimi seqernup pulanera Danmarkimiit kusanarnerussaaq, taanna oqarpoq.

Aammattaaq sooq seqineq pulasarnersoq aamma qanoq pitsaanerpaamik isumannaatsumillu tamanna misigineqarsinnaanersoq 'Sol26'-p YouTube-mi aallakaatitsiviani toqqaannartumik aallakaatitsinermi, meeqqat inersimasullu paasisaqarfigissavaat.

- Aallakaatitassiami Danmarkimi sumiiffinni assigiinngitsuni sisamani immiussissaagut. Neriuppugullu Tasiilami Caspermut aamma toqqaannartitsinermi attavinissinnaassalluta, Tina Ibsen oqarpoq.

Aallakaatitsineq nalunaaqutaq 15.30 aallartissaaq.

Kaffi, kaagi qilallu aallaaqqittoq

Tasiilami illoqarfiup orpiani aaqqissuussaq ualikkut ingerlanneqassaaq.

Kaffillertoqarlunilu kaagillertoqassaaq, seqernup qanoq pulasarneranik nassuiaatissartalinnik allagartaqarluni, takussutissiaqarlunilu sammisaqartitsisoqassaaq.

- Neriuppunga inuit takkukkumaartut, pisullu immikkuullarilluinnarnera pissaaneqassusaalu tassami sapinngisamik annertunerpaamik misigisinnaagatsigu.

- Piffinni arlariinni tamanna misigineqarsinnaavoq. Taamaattumik sumiluunniit najugaqaraluaruit meeraqaruit, ernutartaaruit ikinnguteqaruilluunniit, qanortoq seqineq qimerloorisiuk.

Aammattaaq eqqaamasariaqarparput seqinermut illersuutaasunik seqinersiutinik atuinissaq.

Tamanna pingaaruteqarluinnarpoq, taamaanngippat isinnut annernarsinnaavoq.

Silaginnissaa neriuutigiinnarsinnaavarput.

- Immaqa nuissat pissutigalugit suut tamarmik piviusunngortinneqarsinnaanngillat, pitsaanerpaamilli pisoqarnissaa neriuutigaarput, Casper Hagn-Meincke oqarpoq.