Timmisartut mittalermata atornerluinera annikillisoq

Biilip suliffeqarfiup pigisaani usisarfia matuvoq, Bjarne Hjortborg-lu aquttarfiup tungaanut ingerlanneqarpoq issiallunilu.

Ullaakkut akunnerit aqqaneq marluk qaangilaartut. Qilak tungujortoq seqinnarippoq, Tuukkaq-lu siusissukkut apuuffissaminut qanilliartulerpoq. Akunnerit sisamat sinnerlugit matuma siorna timmisartoq Københavnimit tingissimavoq.

Bjarne Hjortborg-ip oqarasuaatini qimerloorpaa app-inillu sisamaasunit timmisartuussinerit malinnaavigisartagaasa ilaat takullugu.

Suliffiup biiliata nassataasivia matuneqarpoq, Bjarne Hjortborgilu aquttussatut ingippoq.

Ullaap tungaani nalunaaqutaq aqqarnup qaangilaarpaa. Allaaqqissumi seqinnerpoq, Tuukkarlu siusinaartussaavoq. Timmisartormi akunnerit sisamat matuma siorna Københavnimiit qangattarpoq.

Bjarne Hjortborgip oqarasuaatini angallattagaq amullugu app-it timmisartut ingerlaarnerannik malinnaaffigisinnaasami sisamat ilaat takuaa.

- Assersuutigalugu sakkutuut timmisartui Flight Radarimi takuneqarsinnaanngillat. Taamaammat app-eq alla atortarpara, oqarpoq biilillu aallartillugit.

Bjarne Hjortborg Nuummi mittarfimmiit toqqaannartumik aallakaatitsisarnini pissutigalugu YouTubemi taaguut ’@bhj76’ atorlugu tusaamaneqarpoq. Taassuma quppernini 'Greenland Aviation - Bjarne Hjortborg'-imik atsersimavaa.

Ulluinnarni Nuummi eqqiaanermik ingerlatsivimmi Arctic Cleaning Servicemi sulisarlunilu tassani ajoqusernerit pillugit sullissinermut immikkoortortaqarfimmi aqutsisuuvoq.

Eqqiaasut nalinginnaasumik suliarisanngisaat tamaasa nammineq sulisunilu 20-t missaanniittut suliarisarpaat. Soorlu oquiaaneq ikuallattoqarsimatillugulu iluarsaassinerit.

Ullumikkulli eqqiaanermut tunngasut pillugit mittarfiliarneq ajorpoq.

Bjarne Hjortborgip Atlantiku qulaallugu timmisartoq mippat assiliivigisassaa biilit nassataasivianniippoq.

- Ullumikkut ulloqeqqasiorninni timmisartoqarfimmukarsinnaavunga. Pisortarali paasinnilluinnartarpoq, Bjarne Hjortborg biilernermini oqaluttuarpoq.

Aammattaaq nalinginnaasumik toqqaannartumik aallakaatitsisinnaaniassagami atortut allat nassartaramigit taskeqarpoq.

- Minutsit 45-t missaat atorlugit toqqaannartumik aallakaatitsinissara piareersartarpara. Taamaammat amerlanertigut sapaatip-akunnerata naanerani timmisartullu angisuut mikkaangata taamaaliortarpunga.

Suliffimminit aallareerluni minutsialunnguit qaangiuttut mittarfiup aqquserngani unillunilu biilimit niuvoq.

Assiliiviutini Lumix S5 Mark II X biilip nassataasivianiittoq tigoriarlugu qanillisaassuaq ikkuppaa. Aqqusinikkut ikaannginnermini biileqarnersoq marseriarluni aqquserngup sinaakkutaata tungaanut ingerlavoq.

Anaanap naalanngitsuutaa

Bjarne Hjortborg 1976-imi januaarip 9-ani Maniitsumi inunngorlunilu qatanngutigiinni tallimaasuni nukarlersaavoq.

Maniitsumi heliportip illuatungaani inissiami peroriartorpoq. Angerlarsimatilluni qulimiguullit aallaraangata mikkaangatalu piffissarujussuaq atorlugu malinnaasarpoq. Inissiaat qulaallugu qangattakulasarmat igalaat sajuppalunnerat tusaaneqarsinnaasarpoq.

Bjarne Hjortsborg ilaatigut timmisartortartunngorniarluni takorluuisarsimavoqq, kisianni atuarnerup tungaatigut piginnaasatigut kinngussaagami tamanna unitsippaa.

Aqqanilinnik ukioqartoq angajoqqaavi avipput. Arnaat meeqqat nukarliit nassarlugit Danmarkimut nuunniarluni aalajangerpoq.

Bjarne Hjortborgip najaa nooqatigaa, Bjarne Hjortborgilli nooqataassanerluni nammineq aalajangigassaraa.

Angajui namminneerlutik  angerlarsimaffeqalereersimapput, Bjarne Hjortborgillu angunni kisimiilissappat annaanissaa annilaangagaa. Ataataami baajatorpallaaluatsiartarpoq.

Bjarne Hjortborg taamaammat Maniitsumiiginnarpoq.

Ullormi tassanngaanniit arnaata inuuissiornerani sianerfigissaarpaa, naak angajui sianerfigisaraluarlugit. Tamanna artornarpoq, anaanaqanngitsutullu pissusilersorniarluni aalajangerpoq.

Bjarne Hjortborgip angutaatalu naak ataatagiikkaluarlutik attaveqatigiinnerat ikinngutigiinnermut assingusorujussuuvoq. Qanimut attaveqatigiipput.

Ataataa imeraangami tujormisitsisarnanilu nakuuserneq ajorpoq, kisianni amerlanertigut kingusissukkut angerlartarpoq. Bjarne Hjortborgip angunni akuttunngitsumik illoqarfimmut saniliminnulluunniit aasariaqartarpaa.

Bjarne Hjortborgip ulluinnarni nerisassiorneq angerlarsimaffimmilu suliassat amerlasuut akisussaaffigisarai. Meeraanermini namminersorluarpoq.

Meeqqat atuarfiat naammassereerlugu ikinngutinilu sakkortuumik avatangiiseqalerput, ilaatigullu hashimik pujortarneq nalinginnaasuuvoq. Bjarne Hjortborgilli ikitsoriaannarluni usserpaa, atugarinagulu.

Ilinniarnertuunngorniassasoq angutaata kissaatigaa, taamaaliorporlu – Bjarne Hjortborgili 1.g-mi naammassigami Nuummi GU-mi atuarnini unitsillugu Hotel Maniitsumi igasutut ilinniartunngorpoq.

18-inik ukioqarluni Hotel Hvidefalkimi igasutut sulilerami Ilulissanut nuuppoq. Kingusinnerusukkut Nuummut nuukkami taamanikkut Hotel Godthåbimik taaguutilimmiilerami hashimik pujortartalerpoq.

Nuummi hashi pissarsiariuminarmat pujortartarnera ileqqunngorpoq.

Igasutut sulinera sivikitsuinnaavoq. 2001-imili ilinniarnerminut uppernarsaat tigugamiuk eqqiaanermik ingerlatsivimmi ISS-imi akunnittarfinni eqqiaasarnermi aqutsisutut sulilerpoq.

Taamanimiilli eqqiaasartutut sulivoq.

Bjarne Hjortborgip angutaa ukiut qulingiluat qaangiummata tartumi tingummilu suliunnaarnerisa kingunerisaanik 68-inik ukioqarluni toquvoq. Tamatuma kingorna hashimik atornerluinerungaatsialerpoq.

KNR attaveerummat

- Bjarne!

Biilit Greenland Airportsip ilisarnaataanik allagartalerneqarsimasut Bjarne Hjortborg mittarfiup eqqaani ’aqqusergnup eqqaani’ inissisimaffigisartakkaminiittoq sanioqquppaat. Tunuppoq illarlunilu.

- Taama pisoqarajuppoq, taanna oqarpoq.

Mittarfimmiut amerlanersaasa Bjarne Hjortborg mittarfiup aqquserngani takussaasutut ilisimalersimavaat.

Ukiut ingerlaneranni timmisartoqarfiimmut aqquserngup sinaakkutaani nikorfalluni assiliisarnermini attaveqarlualersimavoq. Mittarfimmi timmisartunillu alapernaarsuisartut akornanni. Timmisartorpassuarnik soqutiginartunik mittoqassatillugu tamanna iluaqutaavoq.

Bjarne Hjortborgip telefonini tigoriarlugu Dicord serveri ammarpaa, taannalu atorlugu silarsuarmi tamarmi timmisartunik alapernaarsuisunik allanik attaveqartarpoq.

- Assersuutigalugu timmisartoq immikkut ittoq Indiamiunik pisuunik ilaasulik aqagu tikissasoq inuit ilaat paasitinneqarsimapput. Timmisartoq taanna Flight Radarimi malinnaavigineqarsinnaanngilaq, Bjarne Hjortborg oqarpoq.

- Taanna aqagu nalunaaqutaq 17.50 missaaq.

Bjarne Hjortborg timmisartoq immikkut ittoq missagaangat ullut marluk pingasulluunniit sioqqullugu ilisimatinneqartarpoq.

Nuummi mittarfik nutaaq 2024-mi ammarneqarmat timmisartunik assiliisartutut alapernaarsuisartutulli ilisimaneqarnera aallartippoq.

Taamanikkut Bjarne Hjortborg ukiuni 25-ni hashimik pinngitsuuisinnaanngilluinnarsimavoq. Soraaraangami angerlarluni imuseriarluni pujortaataa nalunaaquttap-akunnerpassui videonik isiginnaartarlunilu internetertarpoq.

Ulloq naallugu sulisimareerluni taama qasuersaartarpoq.

2022-lli missaani Nuummi mittarfissap sananeqarneranut, ukiut pingasut tamatuma siorna aallartissimasumut, malinnaalerpoq. Kisimiinngilluinnarlunilu paasivaa.

Sivitsunngitsoq nittartakkatigut attaveqatigiittarfimmut peqataalerpoq, tassani inuit Nuup avataanit sanaartorneq malinnaaffigilluartarpaat. Nuummi najugaqartut ikittunnguit ilaattut sivitsunngitsoq assinik nassiussisartunngorlunilu nutaarsiassanik ilanngussisarami sanaartorneq pillugu apeqqutinik akissuteqartarpoq.

Inuit Canadameersut, Tysklandimeersut Frankrigimeersullu qanoq pisoqarnersoq assiliisinnaaneraat filmiliorsinnaanerluniluunniit aperisarpaat.

Qaartitsisaqattaartoqarnerani timmisartoqarfiullu sananeqarnerani iPhone atorlugu filmiliorlunilu assiliisarpoq.

Aallaqqaammut ikinngutini timmisartunik soqutiginnittut videoliaminik chatikkut nassiinnartarpai - 2023-mili toqqaannartumik aallakaatitsisalerlunilu YouTubemut ikkussuisalerpoq.

Mittarfiliorneq naammassimmat suut filmiliarisalissanerlugit aalajangertariaqalerpoq.

Mittarfik ammaanersiorneqarpat Tuukkaq mippat toqqaannartumik aallakaatitsisinnaavit?, Chattimi aperipput.

Taamaaliorsinnaavoq.

2024-mi novembarip 28-ani timmisartoqarfiliarluni iPhone 11-ni atorlugu toqqaannartumik aallakaatitsivoq.

KNR aamma toqqaannartumik aallakaatitsivoq, Tuukkalli minissaa minutsialunnik sioqqullugu attaveeruteriataarput.

Bjarne Hjortborg, aallakaatitsigaangami nalinginnaasumik 25-t 50-illu akornanni isiginnaartoqartartoq, tassanngaannaq tusindilikkuutaanik isiginnaartoqaleriataarpoq.

Atornerluiunnaartoq

Nalunaaqutaq 11.25 missaaniittoq Tuukkaq kujataanit ingerlaarluni mittarfimmut qanilliartulerpoq.

Air Greenlandip timmisartuutai aappaluttut Bjarne Hjortborgip malinnaaviginerusarpai.

- Tuukkaq timmisartut Boeing Airbus 330-800-it nunarsuarmi arfineq-marluiinnaasut ilagaat, taanna nassuiaavoq.

Nammineq timmisartuaqqat inuinnarnit pigineqartut soqutigineruai.

- Taakkumi siornatigut Nuummi takusarsimanngilagut.

Oqalukkunnaarluni Tuukkaq maliinnaavigilerpaa. Assiliivik isimi nalaanut tutsillugu assiliisaqattaalerpoq.

Timmisartup motoori nipiliorpoq assakaasuisalu mittarfik nalunaaqutaq 11.28 attorpaat.

Timmisartoq mittarfiup isuanut ingerlaartilluni unikaallallunilu arriillivoq. Sangullunilu uterami Bjarne Hjortborgip assiliiviullu saavanni unippoq.

Tuukkaq Nuup mittarfianut meqqaarmat Bjarne Hjortborgip hashi atorunnaarpaa.

Aqaguani YouTubemit allagarsigami aalajangiuppaa. Quppernera nuannarineqangaarmat videoliaminik ikkussuinermigut aningaasarsiorsinnaalerpoq.

Bjarne Hjortborgip soqutigisani aningaasarsiutigilaarsinnaasutuinnaq isiginngilaa - hashimilli atornerluiffiunngitsumik aallartinnissani takorloorpaa.

Timmisartut assilillugit filmiliaralugillu pimoorussilerpoq, ikinngutinilu arlalitsigut hashimik atornerluinermini arlalitsigut noqitsisuusimasut arriitsunnguamik taarserarusaalerpai.

Hashimut atuiunnaarami videoliornermilu aningaasarsiarisartakkani atorlugit assiliivimmik pitsaanerusumik pisinissamut akissaqalerpoq.

Ullumikkut 200.000 koruunit sinnerlugit nalilinnik atortuuteqarpoq. YouTubemi quppernera inunnik 7000-init amerlanerusunik malinnaasoqarlunilu videoliai 1,3 millioninit amerlanerusunit isiginnaarneqarsimapput.

Maanna Nuummi mittarfiup ammarneqarneranit ukiup aappaa avillugu qaangiuttoq timmisartunik alapernaarsuisarneq Bjarne Hjortborgip qasuersaarfigisalerpaa.

- Maanga filmilioriartortarneq assiliiartortarnerlu sianiuteqarfimmut iluaqutaavoq. Nunarsuarmi allarujussuarmiinnarpoq, timmisartoq Dash8 Qaqortumeersoq minnialersoq taanna oqaluttuarpoq.

Ingerlaannaq assiliivik tigoriarlugu assiliilerpoq.

Timmisartunut aappaluttunut asanninneq

Bjarne Hjortborgip anaanani ukiut tallimat matuma siorna attaveqarfigeqqilerpaa.

Uini avissimagamiuk Danmarkimiit Paamiunut, Bjarne Hjortborgip angajuata nukarlersaata najugaqarfianut, nuussimavoq.

Siorna sivikitsumik napparsimareerluni toqummat Bjarne Hjortborgip inuulluaqqulluarnissaa angumeraa, maannalu Nuummi iliveqarfimmiippoq.

Biilit marluk Bjarne Hjortborg utaqqisoq sanioqquppaat, taannalu aqqusineq ikaarlugu biiliminukarpoq.

Suliartoqqilerpoq, ullumikkut ulapputeqaqaaq, aqaguli timmisartoq inuinnarmit pigineqartoq Indiameersoq milerpat mittarfiliaqqissaaq.

Bjarne Hjortborgip assiliivilerluni mittarfimmiittuarnera YouTube aqqutigalugu tusaamasaanerulerneranut pissutaaginnarnani aamma allamik kinguneqarpoq.

Air Greenlandimit aamma attaveqarfigineqartarpoq. Ilaatigut Qaqortumi ammaanersiorluni nalliuttorsiornissamut filmilioriartortinneqarsimavoq.

Ilulissani mittarfittaaq ukiaru ammarpat aamma peqataajumaarpoq.

Tamannali sioqqullugu takornariaqartoqarlunilu timmisartorpassuit Nuummut mittarneri uppernarsarneqartariaqarput.

Korsbåndia alianaatsumik ajoqusermat Arina Kleist timersornerup silarsuaanit filminut saappoq

- Aasaanerani ullut tamaasa maaniittarpunga, taanna oqarpoq.

Bjarne Hjortborgip assiliivik poortoriarlugu biiliminut ikivoq. Biilit aallarteriarlugit aqqusinikkuulertinnani sulinerminut atatillugu sianertut marlussuit oqaluuteqqaarpai.

Bjarne Hjortborgip timmisartut aappaluttut nuannaringaarpai. Taakkulu inuunerminik nutaarluinnarmik hashimillu atornerluivallaarunnaarnerminik tulluusimaarutigeqisaminik aallartitsissutigai.

Aningaasat katersukkani tulliuttut Danmarkimi kigutimi iluarsaatsinnissaannut atorniarlugit kigutini equngasut takutiitigalugit oqaluttuarpoq.

- Taava cigarettinik pujortartarunnaarnissara tulliullugu anguniagarisariaqarpara, qungujulluni oqarpoq..