Qanoq atisalersorsimanera ulloq taanna annertunerusumik eqqarsaatigisimanngilara. Natersuarli aappaluttoq pisuffigilerakku kamippakkalu isikkanut naleqquttut atorlugit matut igalaajusut aqqusaarlugit silarsuarmut allaasutut ittumut iserama ingerlaannaq eqqarsaatigilerpara.
Iserfinnimi ujaqqat qillalaartut, qimerissat takisuut kjolillu takisuut natermut killittut atisarineqartut takussaapput.
Tamannami aamma nammineq eqqumaffigisimasariaqaraluarpara, tassami aaqqissuussami najuuffitsinni tamanna siunertaavoq, tassami: Miss Danmark 2026-issarsiornermi najuuppunga.
Miss Danmarkinngorniunnermi ajugaanniutivillutik peqataasut 40-it Københavnimi Cirkusbygningip saavani assilisissallutik nikorfasut.
Assi: Mette Kierstein
Ajugaanniutivinnermut peqataasussaq Anne-Marie Olsvig Lauritzen malinnaaffigiartorlugu maaniippunga, taanna Nuummi inunngorlunilu Ilulissani peroriartorpoq.
Taassuma arnaqatini 39-it peqatigalugit taaguummut ajugaanniuteqatigai, taamaalillunilu nunarsuarmi nuanut tamalaanut pinnerneqqusaalluni angalasinnaanissamut ajugaanniuteqatigai.
Kjolit aappaluartut natersuarmi aappaluttumi Unammineq Københavnimi Cirkusbygningimi pivoq. Illorsuaq ammalortoq qammasissianik aappaluttunik silatimigut qalligaq, sanimukaartumik pinnersaasersugaq isaariaanilu ammalortunik sukalik. Illorsuup isaariaata saavaniippoq natersuaq aappaluttoq pisuffissiaq, taannalu isiginnaartussat ungullugu nikorfaffigaat. Inuit akornanni pissangasoqartoq paatsiveerusimaartoqartorlu malunnarpoq.
Illorsuaq Cirkusbygningi Rådhuspladsip Tivolillu akornanniippoq, takornariallu sanioqquasut qungasertik tasillugu alapernaapput. Sunalu pillugu maaniinnersugut ungasinngitsoq qaangiummat takuneqarsinnaalerpoq.
Ukioq kingulleq unamminermi ajugaanikuusoq Josefine Bøttger Miss Danmark-illu ingerlanneqartarneranut aqutsisuusoq kattuffimmillu ingerlatsisuusoq Lisa Lents tasiorlutik illorsuarmit anillapput.
Unillatsiarnerni aliikkusersuisut Wallmans qitillutik, erinarsorlutik – aamma angakkuarlutik aliikkusersuipput.
Assi: Mette Kierstein
Josefine Bøttger sapangaarartalimmik aappaluartumik kjoleqarlunilu, niaqoruteqarlunilu tasseqarpoq. Lisa Lentsittaaq qalipaatigissaartunik atisaqarpoq, naasullu ruusarpassuit aappaluartut tigummiarpai. Aappaluartumik pinnersaasersukkamik kjoleqarlunilu oqitsumik atisaanut naleqquttumik qalipaatilimmik uliguaqarpoq.
Taakku takkunnerisa kingorna peqataasut saqqummeralerput. Assiliisut assiliisinnaaniassammata V-tut iluseqartumik sanileriiaallutik nikussorput. Peqataasut taliisa aappaat siffiaanniippoq. Aappaalu siaangalluni. Taamatut inissinneq ataasiaannaratik misilereerpaat.
Pisoriaaseq Catwalk ilimagisamiit ajornarnerusoq Miss Danmarkinngorniulluni unammineq unnuk ataasinnaq pineq ajorpoq. Aallarniutaasumi peqataanissamut piukkunnaateqarnerluni misilitsinnermit ingerlaqqissimagaanni kattuffiup bootcampsitut (sungiusarfik, aaqq.) taasagaannut ingerlaqqittoqartarpoq. Sapaatit akunnerisa sisamat naanerini Miss Danmarkinngorniullutik ajugaaniutivittussat assiliissutit filmiliutillu saaviniissinnaaneq, qarasaasiatigut attaveqaqatigiittarfimminnik qanoq atuinissanersut aammalu pisoriaatsimik catwalkimik pisussinnaaneq sungiusartarpaat.
Anne-Marie Olsvig Lauritzen-ip telefonikkut oqaloqatiginerani pingaartumik taaneqartoq kingulleq, ajugaanniutivinnissaq sioqqullugu ullualuit matuma siornatigut taamatut pisoriaaseqarsinnaassagaanni qanoq annertutigisumik sulinertaqarnersoq tupaallaatigisimallugu oqaluttuarpoq. Anne-Marie Olsvig Lauritzen 23-nik ukioqarpoq, Ilisimatusarfimmi UC Syd-imi juumuussatut ilinniartuullunilu Esbjergimi najugaqarpoq.
Marlulissanut Theomut aamma Vincentimut anaanaavoq, taakku siorna apriilimi inunngorput. Unnuk qanoq inerneqarumaarnersoq pillugu neriuutigisai suunersut apeqqutigigakku angusassaq ataaseq nammineq ajugaassalluni neriuuteqarfigigini oqaluttuarpoq: Miss People’s Choice 2026. Taassumanngali suli annertunerusumik kissaateqarsinnaasimagaluartoq kingusinnerusukkut paasinarsivoq.
Kaageeqqat Cupcakes tamussiussassatut - Unillatsiartoqarpoq ilaa?, uanga nammineq anartarfiup issiavianiitillunga arnaq ikinngutiminut errortortillutik apererpallattoq tusaavara.
Miss Danmark 2026 septembarip 13-iani Københavnimi ingerlanneqarpoq. Ajugaanniutivinneq aallartitsinnagu Cirkusbygningip torsuusarsuaniit toqqaannartumik isiginnaarneqarsinnaasumik aallakaatitsisoqarpoq, tassani assit allisitat isiginnaarneqarsinnaallutllu kageeqqanik cupcakenik tamussertoqarsinnaavoq.
Assi: Mette Kierstein
- Nalunara, ikinngutaa, siusinnerusukkut Miss Danmarkinngorniunnermi peqataanikuusoq akivoq.
- Illit siorna ilaanikuugavit nalussanngilat, aappaa akivoq.
- Aap, kisiannimi ajugaaniutivinnermut peqataanikuunngilanga, taanna akivoq.
KALAALLIT NUNAAT SINNERLUGU SASSARSINNAAGAMI TULLUUSIMAARTOQ
Pappiliaaqqat qalipaatigissut konfettit qilaamiit nakkakaareermata, qullersuillu qaminneqareermata, Anne-Marie Olsvig Lauritzen Miss Danmark 2026-imi peqataanera pillugu sukumiinerusumik paasisaqarusulluta AG-mit saaffigaarput.
Kalaallit Nunaat sinnerlugu peqataanissat sooq ilinnut pingaaruteqarpa?
- Nuummi inunngorlungalu Ilulissani peroriartorpunga, Kalaallit Nunaallu uangalu kinaassutsinni initoorujussuuvoq. Taamaammat aamma kulturera sorlaqarfikkalu sapinngisannik annerpaamik unammineq tamakkerlugu nassarniarsimavakka – kalaallisuukka, Tiliumut (inuit innarluutillit atugaannik, periarfissaannik pisinnaatitaaffiinillu oqaaseqartartoqarfik, aaqq.) ajunngitsuliornermik suliaqarnera, piginnaasakka, ilaatigut kinaassusera pillugu taallamik saqqummiinera aammalu ataatsimut isigalugu nuna aggerfiga oqaluttuarisarpara.
- Qitequtaasamik annoraaminermik kusanartumik sanaajusumik skærfimik ”Greenland”-imik allannertalimmik atuinissara uannut kisimi pingaaruteqanngilaq. Attaveqaatilli nutaat pigilikkakka iluaqutigalugit Kalaallit Nunaata nittarsaannissaa, kulturerput, suullu uagutsinnut pingaaruteqartut ilanngullugit ilisimasat siammarternissaat uannuttaaq pingaaruteqarpoq. Kalaaliullungalu danskiuvunga, taakku sorlaqarfikka marluusut assorsuaq tulluusimaarutigaakka. Taamaattorli unamminerup nalaani Kalaallit Nunaannit qanoq annertutigisumik tapersersorneqarsimanera immikkuullarissuuvoq.
Sooq Tilioq tapersersussallugu toqqarpiuk?
- Inuit marluk uanga ilaquttanneersut Sungiusarfik Ikinngummi Ilulissaniittumi najugaqarsimapput, taamaammat inuit innarluutillit ataqqillugit, naleqaqatigalugit allatullu periarfissaqartillugit misigisimatinnissaat qanoq pingaaruteqartiginersoq peroriartorninni aamma paasitinneqarluartarpunga. taakku atugaasa suli pitsanngorsaasoqarnissaat pisariaqartoq oqaloqatigiissutigissallugu sapiissuseqartariaqartugut inuillu pineqartut eqqaamassagipput isumaqarpunga. Ataatsimut isigalugu akuutitsineq, naligiimmik periarfissaqarneq, naleqarluartumillu inuuneqarnissamut pisinnaatitaaffeqarup qulakkeerneqarnissaa uannut pingaaruteqarpoq. Tamannalu Miss Greenlandiutillunga aalluttuassallugulu saqqumilaartissavara.
Taamatut toqqarneqarnerit tupaallaatigaajuk?
- Miss Greenlandimik taaguuteqartoqartoq soorunami nalunngereerpara, taamaattorli ajugaanniutivinnermi taassuma angujumaarnissaa isumalluutiginaveersaarsimavara. Unamminerup nalaani isiginnaartitsisarfimmi ajunnginnerpaamik iliornissara ajugaaniutivinnerullu ilorrisimaarutiginissaa ukkatarivara, tassami tungaanut suliaqarsimaqaagut. Taamaammat niaoruseq uannut atitinneqarmat attortisimaartorujussuuvunga. Taaguullu niaqorummik atisinerinnaananilu kusanartunik assiliinerinnaassanngitsoq uannut pingaaruteqartorujussuuvoq. Periarfissaq naleqarluartumik atorluarsimallugu misigisimallunga ukioq ilivitsoq qaangiuppat kingumut qiviarsinnaarusuppunga.
Ajugaanniutivinnerup kingorna susoqarpa?
- Ajugaanniutivinnerup kingorna Proud Marymi pisut kingorna nuannalluta ataatsimuualaarpugut. Ajugaanniutiveqataasimasut tamatta katersuuppugut, nuannaarpugut, qitittarlutalu unnuk nalliuttorsiutigaarput. Unamminerup nalaani pissanganeq iperalaarsinnaallugu ullormilu tassani nalunaaquttap akunneri kingulliit ataatsimuualaarsinnaagatta assorsuaq ilorrisimaarnarpoq. Qaammatini kingullerni arlalissuarni piffissarujussuaq peqatigiilluta atoreerlugu soorunami aamma suut tamarmik tassanngaannaq naammassimmata tussunngunanngitsuunngilaq.
Illorsuuup Cirkusbygningip iluatungaanut iserpugut, tassani ajugaanniutivinnerup aallartinngitsiarnerani inuit ilassinneqatigiinnermi aaqqissuussatut ittumik pissuseqarput. Nerisassanik sassaallerfimmukarlungalu kaageeqqat cupcakes, peqataasut assiinik pinnersarneqarsimasut arlallit misilippakka, cupcakesit taakku ilai naasutut aaqqissuussaasimallutillu ilaat mikisuaranngorlugit cupcakesiliaapput. Anne-Marie Olsvig Lauritzen-ip arnaa Arnanguak Sarina Olsvig inersuup saniani inimi allami naapippara. Pania pillugu oqaloqatigiippugut.
- Piginnaasarpassuaqarpoq, taanna oqarpoq.
Aaqqissuussinermut atatillugu kjoleliorfimmiit, paniata kjoleanik sanasimasumiit tunniussamik, kjoleqarpoq. Panini ilinniakkanik misilittakkanillu sunik angusaqarsimanersoq tulluusimaarluni oqaluttuarpoq. Anne-Marie Olsvig Lauritzen assammik arsartartoqatigiinni målmandiusimallunilu Nuummi GUX-mi timersornermut sammisaqarluni ilinniartuusimavoq. Ilinniartoqatini sinnerlugit naammassinerminnut atatillugu oqalugiartuusimavoq. Marlunnut anaanaavoq. Maannalu Miss Danmark 2026-mi ajugaanniutivinnermut peqataavoq.
Siorna Miss Danmarkitut ajugaasoq peqatigalugu natersuarmi pisuffissiami aappaluttumi assiliseqatigiittoqarpoq.
Assi: Mette Kierstein
- Taamaallaat imminut tatiginerulaarsinnaavoq, inersuarmut ajugaanniutivinnerup ingerlanneqarfissaanut iseriartortigata oqarpoq.
Taskeeraq clutch puisip amianik sanaajusoq sungaartuullunilu qorsuusoq tigummiarlugulu kalaallit danskillu erfalasuarai pappiliamik sanaat tigummiarpai.
Aaqqissuussinermi peqataasut 70-init ikinnerunngitsut Cirkusbygningimi najuuttut Lisa Lentsip oqalugiarnermini ilanngullugu oqaluttuaraa.
Assi: Mette Kierstein
Aalajangiisussat qeqqani issiasut Ajugaanniutivinnermik aaqqissuussaq nalunaaqutaq 20.00 aallartippoq. Unnuup ingerlanerani aqutsisuusussap Claus Elmingip isilerneranut atatillugu nipilersoqatigiit Beatlesikkut atugaasa ilaannik erinarsorlutillu nipilersorput:
- Ilaa unnuk manna aaqqissuussaq’All You Need Is Love’ nipilersuutitarinngikkutsigu aallartilluarnerusinnaanngilarput, taanna aperalunilu peqataasunut asanninnerput siammassagipput kaammattuivoq.
MISS DANMARKIP AAQQISSUUSSAANERA ISORNARTORSIORNEQARTOQ
Podcastimi 'Skønhedskontrakten ' aammalu allaaserisani tulleriiaartuni DR-imi, P1-mi kiisalu dr.dk-mi Miss Danmark sammineqarmat siusinnerusukkut Miss Danmarkinngorniuttarsimasut aaqqissuussap taarnerusortaa oqaluttuarisarpaat.
Ilaatigut isumaqatigiissummik atsiortitaasarsimanerarput, tassanilu peqartaasut aaqqissuussaq pillugu pitsaanngitsumik oqaluttuaqqusaanngitsut, peqataasimasullu isumaqatigiissut unioqqutissappassuk tamanna akiliisitaanermik nassataqarsinnaasoq allassimavoq.
Miss Danmarkimik aaqqissuussisartut kattuffiat taanna ukioq manna 100-nngortorsiorluni nalliuttorsiorpoq.
- Kisiannimi Miss Danmark ullutsinni pingaaruteqarpa?, aqutsisoq aperivoq.
Pinnerneqqusaanneruinnarunnaarnikuuvoq, taanna oqaluttuarpoq, inersuullu tunorpasinnerusortaani imeruersaammik cocktailimik aalaterisoqarpaluttoq ilutigisaanik tusaasinnaavara. Inuttut qanoq ittuuneq, tangilimmik imaqarneq avammullu attaveqaqatigiissinnaanermik piginnaasaqarneq ilanngullugit nalilersorneqartarput, taanna oqaluttuarpoq.
Qanorpiaq taakku piginnaasarineqarnersut uanga nalileruminaatsippara. Aalajangiisartut tassaapput naliliisussat inersuup qeqqani issiasut. Taakkunanilu Lisa Lents qiterliulluni issiavoq.
Taava unammeqataasut ataasiakkaarlutik saqqummeqattaalerput. Taakku qaqortunik kjoleqarlutik qaquartunillu kimmikkaaqarlutik Rayep qititassiaa ’Where’s My Husband’ qitippaat.
Puiaasanut nillorsimaartitsivik Erfalasutsinnik pinnersaatilik Uanga nerrivimmi anaanaasup Arnanguak Sarina Olsvigip issiaffiani inissinneqarsimavunga.
Catwalkerlutik pisuttut qanittuararsuanni issiavugut. Tassanilu ajugaanniutivittut ataasiakkaarlutik bikinilerlutik (arnat nalunnguffataat, aaqq.) sanioqquapput.
Miss Danmarkinngorniunnermi peqatasutut Anne-Marie Olsvig Lauritzen-ip qarasaasiatigut attaveqatigiittarfimmini aningaasaliisuni tapersersortinilu ussassarutigisimallugillu Miss Danmarkinngorniunnermi sungiusartoqatigiillutik bootcampimiinnerminnit assit siammartersimallugillu inuit namminerminik taasissasut kaammattuisimavoq.
Miss Danmarkinngorniutivinnerup saniatigut unamminerit minnerusut arlallit ingerlanneqartarput. Ilaatigut piginnaasat pillugit unammineq, timersorsinnaaneq pillugu unammineq ikinngutaalluartuunerlu pillugu unammineq ilaapput.
Nalunnguffateeraqarluni unamminermi unammeqataasut ataasiakkaarlutik catwalkerlutik sanioqquaneranni atii, suminngaaneerneri sulerisuunerilu oqaluttuarineqartarput.
Assi: Mette Kierstein
Taavalu Miss People’s Choice-mik taasaq (inuit toqqagaat, aaqq.) unammissutigineqartarpoq, tassanilu inuit avataaniittut taasisinnaatitaasarput. App-imik inuit taasisinnaaffiannik pilersitseqataasimasoq isiginnaartitsivimmi nikorfavoq. Taassuma ajugaasoq suaarutigigamiuk qilernerusamik kuultimik qillalaartumik atorpoq: Anne-Marie Olsvig Lauritzen.
- Kalaallit Nunaat!, Arnanguak Sarina Olsvig nipituumik oqarpoq, nuannaajummernerullu pianik erngertumik nikuippoq.
- Taasisimasut tamaaviisa qutsavigaakka. Pingaartumillu Kalaallit Nunaannut qujavunga. Ingerlalluarnissannik kissaateqarlusi tapersersorluarnikooqaassinga, tamannalu uannut isumalerujussuuvoq, Anne-Marie Olsvig Lauritzen mikrofonilerluni oqarpoq.
Unammeqataasut 40-it unnukkut atorneqartartunik kjolelerlutik catwalkerlutik aalajangiisussat saavanni pisupput, kattuffiullu Miss Danmarkip pisortaa Lisa Lents aamma pisoqataavoq.
Assi: Mette Kierstein
Uagut nerrivigisatsinni hvidvinimik skåleerpugut. Puiaasanullu nillorsimaartitsivik Erfalasutsinnik pinnersarneqarsimavoq.
Pissanganeq annertusiartortoq
Isiginnaartitsisarfiup sinaatungaani isiginnaarutit marluk nivinngarneqarsimapput. Videoliat arlallit aaqqissuusap tunuliaqutaanik, piareersarluni ”bootcamp”-ernermi sisamariarluni ingerlanneqarsimasumi sulerisoqarsimanersoq takussutissiisut Miss Danmark-inngorniarnermilu aqqusaakkat suusimanersut taakkunani isiginnaarneqarsinnaapput.
Assi: Mette Kierstein
Anne-Marie Olsvig Lauritzen ajugaanniutivilluni unamminermi ingerlalluarpoq. Unammisaqattaarnerit aallartinneranniit pinnernerit 15-it akornanniilerlunilu tamatum kingorna pinnernerit arfinillit akornanniilerpoq. Takutitsinerani malinnaaffigalugulu isimigut oqalunnera atuarniarsaraara. Taanna sivisuumik qungujulavoq. Arnaatalu kulluni qummoorlugu ussersorfigisarpaa.
- Maanna pissanganarsivoq, Arnanguak Sarina Olsvig oqarpoq.
Anne-Marie Olsvig Lauritzen Lisa Lentsimit apeqqarissaarfigineqarpoq.
- Miss Danmarkinngussaguit arnanullu inuusuttunut ataatsimik allannguinissamik kissaateqassaguit taava suussava, aamma sooq taannaassava?
Anne-Marie Olsvig Lauritzenip allanngortikkusutaa tassaavoq arnat niviarsiaqqallu imminnut qanoq isigisarnerat, kjolemik unnukkut atortakkamik tuequteqanngitsumik tunguusamik qaamasumik qalipaatilimmik atorluni taama oqaluttuarpoq.
- Qanorluunniit isikkoqaraluaraanni apeqqutaananilu ajortuunngilaq, taanna oqarpoq, oqaaseqarsinnaaninilu qujassutigaa.
Tupaallatsitsissut kingulleq - Miss Danmark toqqarneqartinnagu sinniisutut taaguummik peqarpugut, taannalu tunniukkusupparput, Claus Elming isiginnartitsisarfimmiit oqarlunilu Anne-Marie Olsvig Lauritzen sassaqqullugu qinnuigaa.
Anne-Marie Olsvig Lauritzenip Miss Greenland 2026-itut suaarutigineqarnerata kingorna inuit amerlasuut assiliseqatigalugulu pakkutaarpaat – soorunami aamma anaanaa peqataavoq.
Assi: Mette Kierstein
- Arnat angutillu, Miss Grønland nutaaq ilassilluarsiuk, aqutsisoq suaaruteqarpoq.
Anne-Marie Olsvig Lauritzenip siusinnerusukkut Miss Danmarkimi peqataasimasunit annoraaminermik pinnersakkamik takisuumik ujamiusalerneqarlunilu niaqoruserneqassagami seeqquni peqippai.
- Sajuttuinnaavutit, Claus Elming oqarpoq.
Niaqoruseq niaquaniittoq qillalaartuinnaavoq. Sumimmitaavalu sananeqarsimanersoq eqqarsaatigaara.
Miss Danmarkitut ajugaasoq suaarutigineqareermat arnat unammeqataasut ataatsimoorlutik isaaqqillutillu v-tut inissillutik nikorfapput. Lisa Lents taakku qeqqani nikorfavoq. Miss Danmarkinngorlaaq aamma Miss Greenlandinngorlaaq saamimmini talerpiatungiminilu nikorfaqatigai.
Assiliisunut qungujulallutik isigipput.
