Angallannermut Aqutsisoqarfik: Mittarfik aatsaat imeqarluarpat ammassavarput
Ilulissani mittarfissaq silaannakkut angallannermut malittarisassanut naapertuutissappat imeq naammattoq pisariaqartoq Angallannermut Aqutsisoqarfik naqissusiivoq. Tamanna mittarfiup ammannginnerani paasinarsisinneqartariaqarpoq. Kommunimiit maanna akerliusoqarnera Naalakkersuisut suli oqaaseqarfiginngilaat.
Ilulissani mittarfissaq nutaaq 2026-mi oktobarimi piareersinnaassasoq Greenland Airportsip naatsorsuutigaa.
Assi: Arne Mølgaard
Qanittukkut ikuallattup qaminnissaa ajornakusoormat Ilulissani mittarfiup eqqaani imeqarfik politikkimut tunngasunngorpoq.
Avannaata Kommuniani borgmesteri Lars Erik Gabrielsen (S) imermik pilersuinermik sapaatip-akunnerani kingullermi isornartorsiuivoq, taanna naapertorlugu mittarfittaarnissamut imeq naammanngilluinnarpoq.
Tamatumunnga atatillugu Sermitsiap Angallannermik nakkutilliisoqarfik, isumannaallisaanermut tunngatillugu naalgaaffiup oqartussaqarfia, Ilulissani ikuallattoqassagaluarpat isumannaallisaaneq pillugu saaffigisimavaa.
Kommunip imermik pilersuinerup maannakkutut akisussaassuseqanngitsumik annikitsigineranik oqaasii ilumoornersut Angallannermut Aqutsisoqarfimmit isummerfigineqanngitsoq akissutigineqarpoq.
Ilulissanili timmisartunut anginerusunut mittarfissaq atulersinnagu imermik pilersuineq iluarsineqareersimassasoq Angallannermut Aqutsisoqarfimmit uppernarsarneqarusuppoq.
– Ilulissani mittarfissap ammarnissaa sioqqullugu Greenland Airports timmisartoq ajutoorpat mittarfimmi ikuallattoq qanoq sukkatigisumik qaminneqarsinnaanersoq pillugu silaannakkut angallannermi malittarisassat naapertorlugit upalungaarsimasoq Angallannermut Aqutsisoqarfiup akuerisariaqarpaa, allaffimmi pisortaq Doris Tranberg Jørgensen ilisimatitsivoq.
- Assersuutigalugu imermik qapuliamillu qanoq annertutigisumik peqarsinnaanerput aamma mittarfimmi qanoq sukkatigisumik immerneqarsinnaanerat pillugit piumasaqaateqartarpugut, taanna oqarpoq.
Qatserisartut biilii mittarfinni atorneqartussatut naatsorsuutaapput.
- Qatserisartut biiliisa piffissap sivikitsup ingerlanerani marloriarlutik immerneqarsinnaanissaannut imermik naammattumik pilersuisoqarnissaa piumasaqaatigaarput, Doris Tranberg Jørgensen nassuiaavoq.
Politikkikkut akisussaaffik isumaqatigiinngissutigineqartoq
Borgmesterip Lars Erik Gabrielsenip kommunimilu aqutsisup ikuallattoqassagaluarpat illoqarfimmit imeq assartortariaqassanngikkaluarmat Naalakkersuisut Greenland Airportsillu imermik pilersuinermik pitsanngorsaaniarlutik iliuuseqaqqullugit kajumissaarpaat.
Greenland Airports-illi Sermitsiamut akissummini imeqarfiit avataatungaaniittut pinnagit mittarfiup eqqaa namminneq akisussaaffigigitsik erseqqissarpaa.
- Mittarfiit avataanni upalungaarsimaneq – ilaatigut imermik pilersuineq attaveqaasersuutillu – kommunip akisussaaffigigai erseqqissartariaqarparput, Greenland Airports allappoq.
Mittarfinnut nutaanut tunngaviusumik inatsit Greenland Airportsimut akiligassanngortitsisuusoq Avannaata Kommunia isumaqarpoq.
Apeqqut taanna sapaatip-akunnerani kingullermi naalakkersuisoqarfinnut assigiinngitsunut sisamanut apeqqutigineqaraluartoq Naalakkersuisunit suli akineqarsimanngilaq.
Angallannermut Aqutsisoqarfik Ilulissat Mittarfiata eqqaani imeqarnerup pitsaanerulersinnissaanut Kalaallit Nunaanni suliffeqarfiit sorliit akisussaanersut pillugu politikkikkut oqallinnermi peqataaniarnani erseqqissaavoq.
- Mittarfiit imermik pilersorneqarnerat ikuallattoqartillugulu qanoq upalungaarsimaneq pillugu nassuiaanissaq uagut oqartussaaffiginngilarput, Doris Tranberg Jørgensen oqarpoq.
