UKIOQ NAAGUJOQ
Aqqalu Jerimiassen 2025 pillugu: Politikkikkut oqaluttuarisaanermi allannguineq
Politikkikkut tupaallatsitsineq, inuussutissalerinermut oqartussaaffik pillugu ilungersuuteqarneq kissaammersimallunilu oqallinnerit. Atassutip siulittaasuata Aqqalu Jerimiassenip ukioq 2025 taama ilaatigut oqaasertalerpaa. Aappaaguli 2026-mi suna pingaarnertut suliniutigerusuppaa? Sermitsiamit aperaarput.
Aqqalu Jerimiassen Inatsisartuni allaffimmini.
Assiliisoq: Oscar Scott Carl
Nunatsinni ukioq manna pisorpassuaqarmat suut eqqaamanerpaanerlugit aperineqaraanni akissutissaq immaqa ilaannut nalorninakujussinnaavoq. Aqqalu Jerimiassenilli apeqqut naatsukullammik ima akivaa.
UKIOQ NAAGUJOQ
Partiit siuttuinut tamanut apeqqutit nassiussagut aallaavigalugit allaaserisanik juullip nalaani saqqummiussisassaagut.
Partiit siuttui politikkikkut pisut pillugit kingumut qiviartissavagut, ukiumi unammillernartuutaat tusagaqarfigalugit, aammali siunissamut pilersaarutaat paasisaqarfigilaassallugit.
- Ukioq 2025 eqqaamajumaarpara Nunatsinni qinersisartut aalajangiinikuusut Naalakkersuinikkut annertuumik allannguisoqassasoq, tamanna tupaallaataanikuuvoq inuppassuarnut malunnaatilimmik. Nunatta politikkikkut oqaluttuarisaanerani allannguineq tamanna eqqaamaneqartussaassajunnarsivoq siunissami, Aqqalu Jerimiassen oqarpoq.
Ukioq sorpassuarnik pisoqarfiuvoq, spiralilersuisimanermi eqqugaasut utoqqatserfigineqarput nunarpullu nunanit tamalaanit ukkatarineqaqaaq. Taakkua saniatigut arlaleriarluni qinersisoqarpoq, Inatsisartunummi kommunalbestyrelsemullu upernaaq qinersivugut. Pisorpassuit tunngavigalugit inuiaqatigiinni oqallittoqartaqaaq, ilaannilu kissaammersimasut takussaasarput.
- Ilungersunarnerpaanikuuvoq naapertuilluanngitsuliorsimanerit suliat pisimasulluunniit puttallartut suliarineqartillugit oqallinnermi ilusilersorneqartarnerat kamak atorlugu, eqqunngitsunik naqissusersuilluni inuttarsiuillunilu saassutarinnittoqartarmat. Inuttut tamanna tujorminarsinnaasarpoq, unammillernarnerpaasarporli kamak misigissutsillu oqallinnermi tinguaasartillugit akisussaaffik pissutsillu piviusut aallaavigineqarunnaartarmata, Aqqalu Jerimiassen nassuiaavoq.
Iluatsitat angumerinngitsuukkallu
Ukioq manna suliniutigisarni suna naammassinngitsoorpiuk?
- Suliniutigisanni naammassinngitsuukkama ilagaat ukioq manna inuussutissalerinermut oqartussaaffiup tigunissaanut qulakkeerinninnermut tunngasoq. Tamanna sorpassuarnik imaqarpoq, isumaqatiginninniassutissaavoq peqqissaartumik piareersarluakkamillu, taamaattumillu ukioq manna naammasseriaannaasimanngilaq, Aqqalu Jerimiassen oqarpoq.
Suliarni suna iluatsilluarnerpaasoriviuk?
- Iluatsilluarnerpaasorisimavara sulianni Atassut qineqqusaartoqarnerani siuariaateqartissimanera, minnerunngitsumik inuusuttorpaaluit sassartissimaneri. Saniatigut iluatsilluartutut isigaara Inatsisartutigut aalajagiiffigineqarmat pilersaarusiortoqassasoq oqaluffeqarfinni iluarsartuussisoqarnissaanut, piorsarsimassutsikkut kingornussatsinnut tamanna pingaarutilittut aalajagiineq isigingakku.
2026-mi ukkatariumasat
Ukioq ornitarput qiviaruniuk Aqqalu Jerimiassen suliassat eqqarsaatigalugit aalajangersimasumik anguniagaqarusuppoq: Angajoqqaat, ingammillu angajoqqaat kisimiittut ulluinnaasa oqilisarnissaanut aqqutissiueqataarusukkami.
- Aappaagumut suliniutissanni pingaarnerpaat ilaattut taarusussinnaavara angajoqqaat akilersinnaanerusumik inuuniarnermikkut oqilisaassiffigineqarsinnaanissaannut qulakkeerinninniarnissaq, minnerunngitsumik angajoqqaat kisimiittut aamma eqqarsaatigalugit. Amerlasuut inuuniarnerminni akilingassaminnut malinnaaniapiloorsinnaasarmata, taamaammallu aaqqissuusseqqinnissamik suliniuteqarusuppunga anigaasatigut oqilisaassinermik malitseqartitsiffiusinnaasumik, assersuutigalugu akileraartarnikkut inuttut ilanngaat aqqutigalugu, Aqqalu Jerimiassen naggasiivoq.
