Isumasiuineq: Kalaallit USA pinnagu Europa qinerpaat
USA-mik suleqateqarnerunissaq aalajangiisartut eqqartorpaat. Innuttaasut EU qineraat, tusagassiorfiup The Copenhagen Postenip isumasiuititsinini tunnavigalugu allappoq.
Isumasiuinermi nutaami EU USA-mut ajugaalluinnartoq erserpoq, aviisi The Copenhagen Post allappoq.
Toqqorsivimmi assi: Dado Ruvic/Reuters/Ritzau Scanpix
Kalaallit EU-mik USA-milluunniit qaninnerusumik suleqateqarnissartik toqqartariaqassagaluarpassuk, toqqarusutaat paatsoormeqarsinnaanngilaq: EU.
Kalaallit Nunaat EU-mik suleqaneruleruni pitsaanerusoq isumasiuinermi nutaami 65 procentit isumaqarput, aperineqartullu 5 procentiinnaasa USA-mik suleqateqarnerunissaq toqqarlugu. Tassa inuit pingasuugaangata marluk missaat erseqqissumik EU-mut tapersersuipput. 29 procentit isummerusunngillat.
Isumasiuineq misissuisartumit immikkut ilisimasalimmit Sune Steffen Hansenimit, The Copenhagen Post sinnerlugu, januaarip 22-aniit 29-anut ingerlanneqarpoq. Misissuineq 610-nik apersuinernik tunngaveqarpoq, Kalaallit Nunaannilu ukiut kommuuninilu suminngaanneerneri assigiinngitsut apeqqutaatinnagit misissuinermi apersuisoqarpoq.
Kalaallit Nunaat innuttaasut 1982-imi taasititsinerata kingorna EF-imit 1985-imi anivoq, tassani aalisarnermut politikki ataatsimoorussap akerlerineranik tunngaveqarpoq.
Tamatuma saniatigut kalaallit inuussutissarsiortut politikkikkullu aalajangiisartut ilaasa USA-mik suleqateqarnerup annertusarnissaa oqaluuserisarpaat. Tamannali assiliaq innuttaasuni piunngilaq.
Ukioqatigiiaani tamani tapersersorneqarneq
– Misissuinerup innuttaasut qanoq isumaqarnersut takutippaa. Kalaallit amerlanersaat EU-mik suleqateqarusuppput, Sune Steffen Hansen oqarpoq.
- Siornatigut taamatut misissuisoqarsimanngilaq, naak aalajangiisartut USA-mik suleqateqarnerunissaq eqqartortaraluaraat tamanna innuttaasunit allatut isigineqarpoq.
"Suleqatigiinnerunissaq“ assigiinngitsorpassuartigut paasineqarsinnaammat tamanna maluginiarnertoq, Hansen oqarpoq.
- Suleqatigiinneruneq qanoq nassuiarneqarsinnaanera assigiinngitsunik isumaqartinneqarsinnaavoq, taamaattumik 5 procentiinnaat USA-mik qanimut suleqateqarnissaq kissaatigigaat tupaallannarpoq, oqarpoq.
Ukioqatigiiaat tamarmik EU-mik tapersersuipput. Utoqqaat apersorneqartut quliugaangata arfineq-pingasut missaasa EU-p qaninnerusumik suleqatiginissaq kissaatigaat, inuusunnerusunilu agguaqatigiissillugu utoqqarnut assiguvoq.
– Amerlanngitsut qassinik ukioqarnertik oqaatigiumanngilaat, tamannalu pissutigalugu kisitsisit appasinnerulaarput. Ukioqatigiiaalli tamarmik isumaat ersarippoq, Sune Steffen Hansen oqarpoq.
