Mette ph.d.-nngortoq

Nakorsaq Dronning Ingridillu Napparsimmavissuani nakorsaasimasoq Mette Motzfeldt Jensen ataasinngornermi ualikkut Nuummi Ilisimatusarfimmi ph.d.-nngorpoq.

Ph.d-nngorniarluni allaaserisaani Issittoq timip inuussutissanik suliarinninneranut qanoq sunniuteqartarnersoq misissorneqarpoq, pingaartumik danskit kalaallillu orsuisa qaqortortaat kajortortaallu sammineqarlutik. Orsut kajortortaat orsumik glukosemillu iltilersuinikkut kiassaasarpoq – tamannalu pualavallaarnissamut aamma timikkut atortutigut nappaatinut soorlu diabeteseqarnermut illersuutaassasoq isumaqartoqarpoq.

Misissuinermi inernerit naapertorlugit kalaallit kajortumik orsoqarnerugamik danskinit allaanerussuteqarput, tamannalu kalaallini sukkanerusumik ingerlatitseqqittarpoq. Misissuinermi inernerit inuit misissuiffigineqartut akunnerni marlunni nillorserneqarnerisigut immikkuullarilluinnartumik misissuinikkut pissarsiarineqarput.

Apersoqqissaarneqarneq

Mette Motzfeldt Jensenip ph.d-nngorniarluni allaaserisani illersorniarlugu aallartikkami minutsini 45-ni misissuinermi inerneri tunngaviusullu saqqummiuppai. Kingorna naliliisartunit, tassa professor Anne Merrildimit Aalborg Universitetimeersumit, professor Dagmar Führer-Sakelimit Tysklandimi Duisburg-Essenimi universitetimeersumit kiisalu professor Jens Melgaard Bruunimit Aarhus Universitetimeersumit, apersoqqissaarneqarpoq.

Apersueqqissaarneraaneq immaqa ingasaginarsinnaagaluarpoq, naliliisartulli suliniut pillugu annikitsualuppassuarnik paasisaqarumallutik alapernaapput. Mette Motzfeldt apeqquterpassuarnut naammaginartumik kajumillunilu akivoq — nalorninngisaannarlunilu.

Jens Melgaard aallaqqaasiinermini ilaatigut ima oqarpoq:

- Suliaq una suliat maannamut 50-it nalilersueqatigiiffigisamma akornanni pitsaanerpaat qulit akornanniippoq. Ukiuni pingasuni suliassaq tamanna suliaritillugu sininnissannut piffissaqartarsimasutit upperiuminaatsippara, Jens Melgaard Bruun oqarpoq, taannalu Aarhus Universitetimi professoriunermi saniatigut Aarhusimi Steno Diabetes Centerimi nakorsaanerullunilu Nationalt Center for Overvægtigemi pisortaavoq.

Meeraanermiilli ikinngutigiit

Naliliisartut sivikitsumik ataatsimeereersut Mette Motzfeldt Jensen ph.d-nngorsimasoq Anna Merrild nalunaarpoq.

- Qaqortumi peroriartornitsinniilli ukiorpassuarni ilisarisimagakkit immikkut nuannaarutigalugu taamaaliorpunga, Anne Merrild oqarpoq.

Mette Motzfeldt Jensen ph.d-nngorniarluni allaaserisaqarnermini Aalborg Universitetshospitalimi atorfeqarsimavoq. Professor Stig Andersen, lektor Charlotte Almasi, professor Christina Ellervik aamma professor Marit Eika Jørgensen allaaserisami siunnersortaasimapput.

Stig Andersenip siulliulluni Mette Motzfeldt Jensen eqitaarlugu pilluaqquaa.

- Kujataani inunngorlunilu peroriartorpoq, Dronning Ingridip Napparsimmavissuani nakorsatut sulivoq maannalu Ilisimatusarfimmi ph.d-nngorpoq. Taanna Kalaallit Nunaanni tulluusimaarutigisinnaavarput. Suliani naammassilluarpaa. Isummanik itinerusumik paasinnissimallunilu, ilisimatuussutsikkut tunngavilersuillunilu minnerunngitsumik kalaallit pissusiinik paasisimasaqarluarpoq, Stig Andersen oqarpoq.

Ilisimatuut akornanni nalinginnaasoq malillugu ph.d-nngorniarluni allaatigisaq tuluttut illersorneqarpoq, Lektor Charlotte Almasi oqaaseqartussanik aqutsisuuvoq.