Arfininngornermi januaarip 24-anni unnukkut qulingiluat qiteqqunneranni Nuummi innaallagiaaruppoq. Qujanartumik ajoqutaasoq paasineqapallapoq, taamaalillutillu Nukissiorfiit oqartussallu allat erngerlutik Facebookikkut nalunaaruteqarput.
Facebook aqqutigalugu innuttaasunut attaveqarneq tamatuma kingorna Tusagassiivik Sermitsiap aaqqissuisuuneranit pisortaanillu Masaana Egedemit isornartorsiorneqarpoq.
Arfininngornermi januaarip 24-anni unnukkut qulingiluat qiteqqunneranni Nuummi innaallagiaaruppoq. Qujanartumik ajoqutaasoq paasineqapallapoq, taamaalillutillu Nukissiorfiit oqartussallu allat erngerlutik Facebookikkut nalunaaruteqarput.
Facebook aqqutigalugu innuttaasunut attaveqarneq tamatuma kingorna Tusagassiivik Sermitsiap aaqqissuisuuneranit pisortaanillu Masaana Egedemit isornartorsiorneqarpoq.
- Ajutoortoqartillugu oqartussaasut amerlasuut Facebooki kisiat aqqutigalugu attaveqarniartarnerat isornartoq isumaqarpunga. Paasissutissanik siammarterisoqapallassinnaanera atorneqarneralu apeqqusinngilara, taannaliuna kisiat aqqutigalugu paasissutissiisoqartarnera pigiga, taanna oqarpoq.
Kalaallit Nunaanni Upalungaarsimanermut Ataatsimiititaliami siulittaasoq, Natuk Lund Meire, aamma Pinngortitamut Avatangiisinullu Naalakkersuisoqarfimmi pisortaasoq, pitsanngorsaanissamut periarfissaqartoq isumaqataavoq, upalungaarsimanerli ajalusoorsimanngitsoq isumaqarpoq.
Natuk Lund Meire taamatut Sermitsiamut allakkatigut akissuteqarluni ilisimatitsivoq.
- Facebook ullumikkut sukkasuumik sunniuteqarluartumillu attaveqaataavoq innuttaasorpassuarnit atorneqartartoq. Taamaammat oqartussaasut pisoq pillugu paasissutissiinerminni Facebook atorluarpaat. Taamaakkaluartoq Facebook kisimi atorneqassanngilaq. Tamanna pimoorullugu eqqumaffigisariaqarparput, tamannalu suliamik naliliinermut ilaavoq, taanna oqarpoq.
Facebookip KNR taarsersinnaanngikkaa
Upalungaarsimanermut Ataatsimiititaliap Facebook innaallagiaaruttoqartillugu paasissutissiinermut ilumut tutsuiginartuunersoq qulakkeersinnaaneraa aperisoqarmat inuit attaveqaqatigiittarfii paasissutissiinermut atortunik qajannaatsunik nalinginnaasunillu, soorlu KNR Radiomik oqartussallu nittartagaannik, taarserneqarsinnaanngitsut Natuk Lund Meire akivoq.
- Sukkassutsip angusinnaasallu illuatungaanilu qajannaassutsip tikinneqarsinnaassutsillu pitsaanerusumik oqimaaqatigiisinnissaasa qulakkeernissaat pisariaqarpoq. Suliaq tamanna aallartereerpoq – aamma sarfaarunneq sioqqullugu.
- KNR-ip innuttaasut internetikkut attaveqaqatigiittarfinnik atuinngitsut tusarlerniarlugit unnuaq naallugu radiokkut qallunaatut kalaallisullu pisoq pillugu nutaarsiassaqartitsivoq.
KNR-ip nalunaaqutaq 01.32-miit, tassa innaallagiaarutereernerup kingorna akunnerit pingasut qaangiuttut, aallakaatitsilersimallutik Sermitsiamut ilisimatitsissutigaa.
Upalungaarsimaneq annertuumik ajutoortoqartillugu ajunaarnersuaqartillugulu aallartinneqartartoq
Tusagassiorfik aatsaat ajunaarnersuaqartillugu kalerrisaarinissamut pisussaaffeqarluni akissummi allami aamma allappoq - maannakkullu taamaaliunngilaq.
Soormiuna taamaanngitsoq?
Sarfaaruttoqarnerani teknikkikkut ajoqutaasoq paasineqarpallattoq anorersuarneranillu attaveerunnermik pissuteqartoq Natuk Lund Meire oqarpoq.
- Upalungaarsimaneq ajutoortoqartillugu ajunaarnersuaqartilluguluunniit atuutilersinneqartarpoq. Sarfaarunneq ilungersunaraluartoq ajutoortoqartillugu upalungaarsimanermik atuinissamut pisariaqartitsisoqanngitsoq erniinnaq paasinarsivoq. Pisut suussusaat ineriartornerilu tungnavigalugit ilisimasallit naliliinerat naapertorlugu tamanna aalajangerneqarpoq.
- Aallartitsisoqannginnera soqutiginninnginnermut pimoorussinnginnermulluunniit tunnganngitsoq erseqqissassallugu pingaaruteqarluinnarpoq. Kisiannili pissutsit pisariaqanngitsumik ingasatsikkiartortinnagit eqqortumik qaffasissusilimmi pitsaasumik iliuuseqarfigineqarnerannut takussutissaavoq, taanna oqarpoq.
Eqqissisimatiserusullunilu toqqissisimatitserusuttoq
Sarfaarunneq Naalakkersuisut innuttaasunut ulluni tallimani – assersuutigalugu sivisuumik sarfaaruttoqartillugu – imminut napatissinnaanissamik siunnersuutaat nutaaq saqqummiummassuk ullut pingasut qaangiuttut pivoq.
Piffissamittaaq USA-p Kalaallit Nunaannik tiguaaniarluni sioorasaariffiani sarfaarunerup kingunerisaanik toqqissisimajunnaartoqarnera pissusissamisoorpoq, Natuk Lund Meire oqarpoq.
- Innuttaasut ilaasa pissutsit toqqissisimananngitsutut misigisimagaat ajornerpaamillu pisoqarnissaa ernumagisimagaat nassuerutigissavara. Tamanna paasilluarsinnaavara - ingammik piffissami isumannaallisaanermut politikkip sammineqangaatsiareernerani.
Taamaammat qanoq ililluta erseqqinnerusumik – aamma siusinaartumik – pisup suuneranik paasissutissiisinnaanerluta paasiniartassavarput, taamaalillutalu paasisitsipallallutalu eqqissisaapallassinnaassaagut, aamma teknikkikkut ajornartorsiuteqaraluarutta taamatuttaarlu avataaneersumiit isumannaallisaanermilluunniit aarlerinartoqartinnagu, taanna oqarpoq.
Upalungaarsimanermut ataatsimiititaliami siulittaasup aallakaatitsivinnik toqqaanissamut maleruagassat erseqqinnerunissaat sulissutiginiarlugu oqarpoq.
- Paasissutissat erseqqissut, pissarsiarineqarsinnaasut assigiinngitsullu atorlugit pissutsit pisariaqanngitsumik pissanganartinniarnagit eqqissimatitsiniarnerli toqqissisimatitsiniarnerlu siunertaavoq. Oqimaaqatigiisitsineq taanna upalungaarsimasut ingerlalluartut eqqortussaavaat - pisullu matuma aaqqiissuteqaqqinnissatsinnik periarfissippaatigut.
