SARFAARUNNERMI FACEBOOKIKKUT ATTAVEQARNEQ
Kalaallit Nunaanni Politiit: Innuttaasut malinnaaviginerpaasaaniinnissarput pingaarnerpaatipparput
Nuummi sapaatip akunnerata naanerani sarfaaruttoortoqarnerata nalanaani, Kalaallit Nunaanni Politiit KNR-illu Facebook atorlugu innuttaasunik paasissutissiisaarput. Politiit Facebook aqqutigalugu inuit amerlanerpaat paasitinneqarsinnaanerat pissutigaat. KNR sooq Facebooki atorsimanerlugu toqqaannartumik akissuteqarfiginagu, upalungaarsimasut sulitinneqannginnerat innersuussutigaat, aamma KNR-ip sarfaarunneq pillugu paasissutissiinera kiffartuussinermut paasissutissiinermullu tunngasoq akissutigineqarpoq.
Kalaallit Nunaanni Politiit upalungaarsimanermut oqartussaasut allat peqatigalugit nalilersuissallutik ilisimatitsipput.
Assi: Oscar Scott Carl
Nuummi arfininngornermi januaarip 24-ani sarfaarummat oqartussat arlallit Facebooki kisiat atorlugu attaveqarnerat kukkunermik ersersitsivoq.
Tusagassiorfimmi Sermitsiami aaqqissuisuuneq pisortaanerlu Masaana Egede oqarpoq.
Naalakkersuisut siunissami qamittoortoqaqqissagaluarpat paasissutissinerit inuit attaveqaqatigiittarfiisigut taamaallaat saqqummiunneqaratik pisortat nittartagaanni aamma saqqummiunneqartariaqarnerat nassuerutigaat.
Kalaallit Nunaanni Politiit Facebook aqqutigalugu attaveqartut ilagaat. Pinartoqartillugu Nuummi innuttaasut paasissutissanik siammarterigaangamik Facebookikkut armerlanerpaat anguneqartartut misilittagarigitsik, Sermitsiamut allakkatigut akissuteqarnerminni paasissutissiissutigaat. Amerlasuummi Facebook aqqutigalugu paasissutissanik ujartuisarmata.
- Innuttaasunut malinnaavigineqarpaasaa pingaarnersiortarparput, tamaallilluta paasissutissat pisariaqartut sapinngisamik amerlanerpaanut anngussinnaanissaat qulakkeerniartarlugu, Kalaallit Nunaanni Politiit allapput.
Sarfaarunnermut aqqutit ajutoornerannik pissuteqartoq ingerlaanneq paasineqarmat innuttaasunullu sukkaannaq paasissutissiisoqarmat, Kalaallit Nunaanni Upalungaarsimasoqatigiit imaluunniit Kalaallit Nunaanni Upalungaarsimanissamut Ataatsimiisitaliaq sulisinneqassanngitsut oqartussanit aalajangerneqartoq, Naalakkersuisut paasissutissiipput.
Kalaallit Nunaanni Politiit upalungaarsimanermut oqartussaasut allat peqatigalugit pisumi oqartussat iliuuserisimasaat ataatsimut isigalugit nalilersorneqarneqarnerannut peqataassallutik ilisimatitsissutigaat.
KNR-ip kiffartuussineq paasissutissiinerlu isumagai
Facebookikkut paasissutissanik ujartuinermi KNR-i immaqa aamma alakkarneqarsinnaavoq. Taakku unnuami sarfaarunnerup nalaani Facebookimi quppernerminni arlaleriarlutik malinnaatitsillutik paasissutissiisaqattaarput. Aamma minutsit 15-ikkaarlugit radiokkut nalunaaruteqartarput. Sarfaarunnermiit akunnerit pingasut qaangiummata radiokkut paasissutissiisaqattaalerput.
Nittartagaanni nutaarsiassaqanngilaq. Sarfaaruttoqarnera pillugu allaaserisaq siulleq KNR.gl-imi ataasinngornermi nalunaaqutaq 11.30 saqqummerpoq.
Sermitsiap KNR-imi pisortaaneq Hans Peter Poulsen tamanna pillugu apersorniaraluarpaa, allakkatigulli akissutisilluni.
Sarfaaruttoqarnerani upalungaarsimasut sulitinneqarsimanngimmata KNR-ip pisussaaffigisai killeqartut, KNR-imiit paasissutissiissutigineqarpoq:
"KNR-ip upalungaarsimanermut tunngatillugu pisussaaffii Radiukkut tv-kkullu aallakaatitsisarneq pillugu Inatsisartut Inatsisaanni aalajangersarneqarput. Upalungaarsimasut sulitinneqarneranni KNR-ip aamma aallakaatitsinnaanermut akuersissummik piginnittup pisussaaffigaat upalungaarsimanissami pingaaruteqartunik innuttaasunut nalunaarutinik ingerlatitseqqiinissartik.
Taamaattumik pisumi matumani upalungaarsimanermut tunngassuteqartumik pisoqanngilaq, taamaattumillu KNR-ip aallakaatitsinera kiffartuussineruvoq paasissutissiinerullunilu.“
KNR pisoq pillugu allamik eqqaasassaqarani allappoq.
Sermitsiap alaallit Nunaanni Upalungaarsimanissamut Ataatsimiisitaliami siulittaasoq Natuk Lund Meire, pinngortitamut avatangiisinullu naalakkersuisoqarfimmi pisortaq, sooq upalungaarsimasut sulitinneqannginnerat aamma sarfaarunnerata nalaani oqartussat attaveqaqatigiinnermik qanoq ingerlatsisimanerannik oqaaseqartinniarlugu sulissutigaa.
