Interneti sorpassuaqarpoq – neqeroorutillu pitsaasut nakkaannarfigigaanni peqquserluffigineqarnissaq ajornanngitsuararsuuvoq.
Sermitsiap nittartagaq sostreneniviogaja.dk, nuersakkanik kalaallisuut atisaannik isumassarsianik tuniniaasartoq, sapaatip-akunnerani kingullermi oqaluttuaraa. Nittartagarli silassorissuusiaq atorlugu sanaajugami assinik internetimi tusagassiuutiniit tillitanik atuivoq – suliffeqarfimmit pimoorussamit suliarineqangilaq.
Interneti sorpassuaqarpoq – neqeroorutillu pitsaasut nakkaannarfigigaanni peqquserluffigineqarnissaq ajornanngitsuararsuuvoq.
Sermitsiap nittartagaq sostreneniviogaja.dk, nuersakkanik kalaallisuut atisaannik isumassarsianik tuniniaasartoq, sapaatip-akunnerani kingullermi oqaluttuaraa. Nittartagarli silassorissuusiaq atorlugu sanaajugami assinik internetimi tusagassiuutiniit tillitanik atuivoq – suliffeqarfimmit pimoorussamit suliarineqangilaq.
Pisisartunik nioqqutissanik pineqarsinnaanngitsunik pisititsiniaannarluni aningaasallu peqquserluttut kaasarfiinut ingerlateqqinniaannalugit peqqusersusaarneruvoq.
- Sianiinaarneqarsimagaanni qujanartumik annaasaqarfiusariaqanngilaq, aningaasammi utertinnissaannut periarfissaqarluarpoq – ingammik kortimik akiliisimallunilu qisuariapallakkaanni, Malene Christensen Grønlandsbankenimi atuisunut sullissivimmi pisortaq oqaluttuarpoq.
Aningaaserivik ikiuisinnaasoq
- Akiliinermut uppernarsaatit eqqunngitsuuppata, soorlu akiliisimanngikkaanni imaluunniit akiligassat kukkusumik annertussuseqarpata. Nittartakkamut peqquserluffiusumut akiliisoqarpat imaluunniit nioqqutissaq isumaqatigiissutigineqartutut pineqartumut tunniunneqarsimanngippat ikiuisoqarsinnaavoq.
- Akiliummik akiliilluni peqquserluffigineqaraanni aningaaserivimmi ikiorneqarnissamut periarfissaqarluarpoq, Grønlandsbankenimi atuisunut sullissivimmi pisortaq Malene Christensen oqarpoq.
Assi: Nammineq pigisaq
- Iliuuseqarnissamut ajornannginnerpaaq tassaavoq Grønlandsbankenip nittartagaanut iserneq. Nittartakkami quppernerup siulianiittoq ”Kortimik akiliinermut maalaarutit” tooruk nassuiaallu malillugu iliorlutit. Aallartitsinnak kortivit normua, CPR-normu aamma MitID piareersimasatissavatit, Malene Christensen nassuiaavoq.
- Taava Netsimut, tassa Grønlandsbankenimi akiliuteqarfitsinni kortinik aqutsisumut, ingerlateqqinneqartarput tassanilu kukkusumik akiliisimanerput pillugu apeqqutit arlallit akineqassapput.
- Uukapaasinneqarneq politiinut nalunaarutigisariaqarpat. Nittartakkami assilisat, pisinermut uppernarsaatit e-mailillu uppernarsaatitut toqqorsimagaanni iluaqutaassaaq.
- Maalaarut nassiunneqareerpat Nets-ip suliaq isummerfigissavaa – tamatumalu kingorna akissutissarsiumaarputit. Akiliummik akiliisimagaanni nittartagarlu Sermitsiami allaaserineqartutut uukapaasissutaappat maalaaruteqarneq tunngavimmigut ajornaatsuuvoq.
Nuussineq pisariusoq
Aningaasat tigusisut kontuannut toqqaannartumik nuussimagaanni tamanna ajornakusoornerusarpoq.
– Aningaasat suli tigusisup kontoaniinnersut ilimanarunnaassaaq. Taamaammat inunnut nittartakkanullu nalusatsinnut akiliiniaraanni tamatigut korti atorlugu akiliisoqartarnissaa siunnersuutigaara. Taamaalilluni aningaasat isumannaatsumik tiguneqarsinnaapput, Malene Christensen oqarpoq.
- Aammattaaq siunnersuutigineqartartoq una atorneqarsinnaavoq. Akiliinermut kortit isumannaatsumiitittuaannaruk, koditillu allanut tunniutinngisaannakkit.
- Aamma maleruagassatoqaq una, torrangaarami ilumoorpasinngippat ilumoorsimanaviannginnera eqqaamassallugu pitsaassaaq. Isornartorsiuiuartariaqarpugut, pisariaqarpallu nittartagaq Trustpilotimi misissortariaqarparput, atuisunut sullissivimmi pisortaq taama siunnersuivoq.
Aviisip nittartakkakkut pisiniarfik eqqunngitsoq nuersakkanik tuniniaasartoq sapaatip-akunnerani kingullermi qulaareerlugu allaaserisaq naalagaaffiup politiivini internettimut tunngasunik misissuisartunut saqqummiupparput. Naalagaaffimmi immikkut ittumik pinerlussimasunik misissuisartunut ilaavoq, pingaarnertut nittartakkani tusagassiivinni pinnguarfinnilu pinerlunnermik misissuisartoq.
Politiit pisimasoq tamanna oqaaseqarfigerusunngilaat.
- Aviisimi allaaserisaq pillugu itisiliilluta akissuteqassanngilagit, Politiit nittartakkatigut pinerlunnernik misissuisartut ilisimatitsipput, taakkulu innuttaasunut ima siunnersuipput.
- Aningaasatigut annaasaqarsimagaanni pisianillu tigusaqarsimanani, taava Danmarkimi 114-imut imaluunniit Kalaallit Nunaanni 701448-mut pisoq nalunaarutiginiarlugu saaffiginnittoqarsinnaavoq. Aningaasat utertinneqarnissaannut politiit ajoraluartumik ikiuussinnaanngillat.
Aamma Politiit nittartakkatigut pinerlunnernik misissuisartui, tassa Politiets Onlinepatrulje, Facebookimi malinnaaffigineqarsinnaapput.
