Erninissamut piareersarnermut periarfissaq nutaaq arnat timaannut piareersaataallunilu ilisimasaqarnerulersitsivoq

Nuuk Osteopati og Fysioterapimut iserama natermi nallaviit sungiusarfiusut qituttut siaarneqarsimasut takuakka. Arnat naavi assigiinngitsorpassuarnik angissusillit takussaapput. Ilai aatsaat naartulerlaajupput, allallu erninissaminnut qalliartulereerlutik. Qungujulasut amerlaqaat oqaloqatigiinnerillu aallartereerput. Immaqa naartunermi misigisat pillugit, immaqa sinik pillugu – imaluunniit naalungiarsuk inunngoreerpat amaat sorleq pisariaqartinneqarnerpaanersoq pillugu.

Naartunermi iliuuseqarneq – toqqissisimasumik

Matu ammarpoq, Natasjalu iserpoq. Oqalioqatigiinnerit ingerlaannaq unipput isillu Natasjamut akkittutullusooq ipput. Isernera qanoq pinerpoq inimut eqqissititsivoq, soorlulusooq ini pissusissamisut ilersoq – sooq maaniinnerlutik eqqaavaat. Sapaatit akunnerisa 23-ssaanni naartuvunga, aappassaanik meerartaassallunga. Kuutsera allaanngilaq nateq qanganitsersimalluni neeqqulernikoq, mikisuuteqarlunga ulluinnakka angerlarsimaffimmi ulapaarfiupput, soorlulusooq oqaaseq timi peqqissoq tusarneqarsimanngitsoq. Taamaattumik iliuuseqarniarlunga aalajangerpunga, neriuutigalugulu timimut ernisunnissamullu iluaqutaasinnaasumik iliuuseqassallunga.vErninissamut piareersarnermut sungiusarneq nutaaq misilinniarlugu maaniippunga, taannalu gyn-obs fysioterapeutimit Natasja Hagemannimit pilersinneqarpoq.

Paasisat timitalerneqaraangata

Sungiusarneq nalinginnaasumit allaanerusoq paasinarsivoq. Nassuiaasoqaqqaartinnagu toqqaannartumik sungiusarneq aallartinneq ajorpoq. Sungiusarnerit tamarmik minutsit 20-t missaanni ilitsersuinermik aallartittarput, tassani niaqoq ilisimasanik immerneqaqqaartarpoq, tamatumalu kingorna timi minutsini 50-ini sungiusartinneqartarluni. Tamanna oqiliallannarpoq – soorlulusooq arlaata naartusut ilisimasanik pisariaqartitsinerat kiangunnermillu atuisariaqarnerat paasilersimagaa.

- Arnat timiminnik ilisimasaqarnissaat pingaaruteqarpoq, periaatsit misilittagaqarfigisaat sungiusarsimasaallu pillugit ilinniartinnissaat, ernilerunik iluaqutisiginnaasaminnik, Natasja sungiusareernerup kingorna oqarpoq.

Natasjap nammineq aaqqissuussaq naqqaniit suliaraa. Sammisat arfineq-pingasut toqqarpai, taakkulu tunngaviusumik ilinniartitsissutigineqarput, arnallu anersaartornermik hormonillu sunniutaannik paasinninnissamut aamma erninermi ingerlaarnissamut - ernineq sioqqullugu erninerullu nalaani sakkussaqalersittarpai. Taamatut ilisimasaqarnerup ernineq paasiuminarnerulersillugulu aqunneqarsinnaanerulersippaa.

Ballonit, naalungiarsuit kuutserlu pillugu paasissutissat

Sungiusarnerit arfineq-pingasuusut, tallimassaat peqataaffigaara, ullormullu sammisaq toqqaannartumik iserfigalugu: Ernisunneq. Ernisunnissaq sioqqullugu timimik aalatitsineq aamma ernisunnerup nalaani aalanissaq sammineqarput. Paasisat aallarniutigaavut, Natasjalu pisarnertut piareersarluarsimavoq. Taassuma kuutseq paaraa malinnaavigeqqissaarneqarlunilu, taassumalu iluaniippoq ballon aamma arsaaraq. Balloni illissamut assersuutaavoq, arsaaraq naalungiarsummut assersuutaalluni, ballonillu qullua atorlugu illissap aqqutaata qanoq naalisarnera allisarneralu takutinneqarpoq.

Tupigusullunga malinnaavunga. Ernineq misigereernikuugaluarlugu suli tupinnartoqarpoq. Tupinnartuliat tupigusuutigiuartakkamma ilagaat, arnallu nukiinik naassaanngitsumik tupigusuttuassallunga. Taava pivoq. Arsaaraq inimut miloriunneqarami soorlu inoorlaaq sukkasuumik ingerlasoq. Illarpugut, arnat ilaat sikipput, sivitsunngitsorlu ini illarnermik oqiliallannermilu ulikkaarneqarpoq. Ilikkagaqarfiulluarpoq, ingasangajallunilu – erninissamut piareersarnerup ingerlarnga pissusissamisoortutut misinnarpoq.

Minutsit nuannersut sivisuutut misinnartut

Apeqquteqartoqarsinnaareermat timitta aalatinnissaat tullinnguuppoq. Aalatitsinissaq pisariaqartissimavarput. Timi eqeeriartulerpoq, nallavinnullu pinissarput tullinnguuppoq, Natasjallu nipaa eqqissisimasup ilitsersuinera malillugu aalarusaalerpugut.

Nipilersuut "Baby, I Love Your Way" nipilersoqatigiinnit Big Mountainsimit appippoq, appinnera nalaatsornerinnaasoq Natasja oqarpoq, kisiannili sungiusarnermi tulluarluinnarluni. Silaannaq oqiliallappoq, aalanerit oqinnerulerput, ingiuinissaralu pinngitsoorsinnaajunnaarpara "every day, yeah-eeh-yeah“ — sungiusarneq akornuserumanagu nipituallaanngitsumik uannulli tusaasinnaallunga ingiuivunga.

Sungiusarneq sallaatsumik aallartissinnarluni sakkortusiartorpoq, ulussakkalu kissarulleriartortut malugisinnaavakka. Qujanartumik paasivara taama misigininni kisimiinnanga – saninniittoq Barbara aamma taama kiagutsigivoq. Barbara Østergaard, Namminersorlutik Oqartussani inatsisileritooq sapaatip-akunnerisa 33-vissaanni naartuvoq siullermeerlunilu, inimi nuannaarnermik siammarterisuusoq malunnarpoq. Natasja sungiusariutsit assigiinngitsut atorlugit sungiusarneq sukkanerulersikkiartornera unilaartarnermik akullugu ingerlappaa, taamaasisorlu Barbara quiasaarluni oqarpoq:

- Minutsit marluk? Minutsit marluk naliginnaasumit sivisunerusumassapput!, Barbara quiasaarluni oqarpoq.

Tamatta issialluta illalertarpugut, paasisinnaagatsigulu anngaajutigaluta anertikkarluta — tamatumuuna 2 kiilunik oqimaassusillit tigummiarlugit.

- Sungiusarnermi piffissat aalajangersimasut ingerlaneranni aalasaarpugut, tamanna erninermi periaatsimut assinguvoq. Naqitsineq qaffattarpoq, sungiusarneq sakkortuvoq, taamaasisinnarluni eqqissilluni, anersaartornerup aqunnissaa eqqarsaatigalungu taamatullu nukissanik aallerluni, ingerlaaqinnginnatsinni, Natasja nassuiaavoq.

Arnat ataatsimoornerat timimik aalatitsiviusoq

Peqittaareernerup anertikkareernerullu kingorna tasissaarfissanngorpoq. Nallavinnut innakarpugut, uangalu kuutsima nalaa tasitsaarniarlugu aalajangerpunga. Minutsialuit eqqissisimalluta itisuumik anersaartoreerluta nalinginnaasumut uteqqippugut. Sungiusarneq naammassivoq, ingippugut – timitsigullu nakimaallaqqinnerulaarluta, kisianni aamma eqqissilluta anersaartorluta. Barbarap ataatsimoorneq tamanna marlunngornerit tallimat taakku immikkut pingaartillugit oqaluttuarfigaanga.

- Inuunermi manna piffissaq qajannarfiup nalaaniippoq, qularfiungaartoq, kikkullu tamarmik sapinngisartik tamaat pitsaanerpaamik perusunnerat. Arnat peqatigiinneranni sanngiiffiit nukittuffiillu avitseqatigiissutiginissaat nuanneqaaq, nassuiaavoq.

Oqaasiisa imartunerat malugisinnaavara, oqorsaasersortillutalu malugisinnaavara arnaqatimma ajuusaarutigingaat marlunngornerup tulliani kingumut kiangunnermik, illarnermik aap arsaaqqallu samminissaanut peqataasussaannginnera. Qujanartumilli massuma ingerlarnga ataasiaannangassaanngilaq. Peqataasussat tullii marsip 23-ani aallartissapput, Natasjallu qularnaveeqquserpaa erninissamut piareersarlutik timiminnik sianissutsiminnillu paarsilluarusuttunut suli inissaqartoq. Uannut taakku akunnerit sungiusarnerinnaanngillat, taamaattorli ulluinnarni atukkanni anersaartorfittut, timi sianissutsillu eqqissiallassinnaanerannik, takkuttussamullu nukissaqalernissamik tunisisuupput. Maanngaanniillu anivunga misigisimallunga arnat kisimiinngisaannartut - ataatsimooraagattami nukittusaqaagut.