Aputaasannera ACR-imut allaannguuteqartitseriaannaasoq
Nunatta kitaani ukioq manna kiannerunera aputaasanneruneralu Sisimiuni Arctic Circle Racertoqarnissaanut arlalitsigut kinguneqalereerpoq. Nunatsinneersut nalunaartut pisarnermit ikinnerupput, aqqutigineqartussaq allanngorneqarataannaavoq piareersartussallu assartuilerunik ilungersornerussapput.
Arctic Circle Race ukioritsillugu aputissaaleqiffiuneq ajorpoq.
Assi: ACR
Sisimiuni marsip 27-aniit 29-ata tungaanut Arctic Circle Racertoqarnissaani aaqqisuisut silassamik naalarulupput. Killiffissiorlutillu pingasunngornermi februaarip 19-iani ataatsimiikkamik killiffissiuinnanngillat.
- Apummik inniminniivugut, Arctic Circle Racemi ukiuni 20-ngajanni siulittaasoq Jens Klaus Lennert quiasaarluni taama oqarpoq.
Quiasaarnerali sivisungaanngilaq. Naak pilersaarutit suli maannamut attanneqaraluartut, nunatta kitaani ukiorpassuarni aatsaat taama kiatsiginera ujakkaarluni nunarsuarmi unamminerit sakkortunersaannut peqataasut kisimik malugissanngilaat. Aaqqissuisummi kajumissutsiminnillu suleqataasut immaqa aatsaat taama assoroortigisariaqassapput.
- Qaqutigoorpoq, una pissutaanerulluni Arctic Circle Racemi arpaffiusartoq qutsinnerusumiittarami nunap timaani. Taamaalilluni illoqarfimmut qanittumi ilaatigut aputaasakkaluartoq nunap timaa ajorneq ajorami. Kisianni ukioq manna malunnartumik nunap timaani aamma aputikinneroqaaq. Taassuma kingunerivaa oqimaatsunik assartuinerup unammillernarnerunissaa, Jens Klaus Lennert oqarpoq.
ARCTIC CIRCLE RACE PILLUGU PAASISSUTISSAT
- Siullermeerluni 1998-imi pisortatigoortumik aaqqissuunneqarpoq.
- Taamanimiilli ukiut tamaasa aaqqissuunneqartarpoq, coronalli nalaani killilersuutit peqqutigalugit 2020-mi, 2021-mi 2023-milu taamaatiinnarneqarnikuuvoq
- Nunarsuarmi ujakkaarluni unamminerit sakkortunersaraat.
- Isorartussutsit marluupput: 100 km aamma 160 km.
- Meeqqanut Miki Arctic Circle Race aaqqissuunneqartarpoq.
Aallarfissaq aqqutissarlu allanngoriaannaapput
Containerimmi illuaqqallu nalinginnaasumik aputeqartillugu qamussuarnik assartorneqarsinnaasaraluarput. Illoqarfimmulli qaninnerusoq aputaasammat ATV-t snescooterillu, qamussuarnit usinikinnerusut, atorneqartariaqarnerannik kinguneqarataannaavoq.
Aputaasannerali Arctic Circle Racertut aqqutigisartagaannut aamma allannguuteqarataannavoq.
Jens Klaus Lennertip, aamma ulluinnarni Kasimmik taaneqartartup, Arctic Circle Race ukiuni 20-ngajanni siulittaasuuffigigamiuk kaasarfimmiorigaa oqaatigineqarsinnaavoq.
Assi: Sermitsiaq
Arctic Circle Racertut Sisimiuni Taseraliup saani aallakaagaangata tikileraangataluunniit takuniarneqarluartarput. Aputaasannerali peqqutigalugu aallarfik nunap timaanut ilorpaallanneqarataannaavoq. Taannaannaanngilarli.
- Takissusaa ilusaaluunniit allaaneroratarsinnaavoq, apeqqutaalluni taamanikkussamut aputeqassusaa.
Aqqutaasartummi ilaat massakkutut iinnassappata aqqutigineqarsinnaanngillat.
- Kangerluarsup Tulliup ullup aappassaani atortaraluaratsigu, taanna aamma massakut sikuunngilaq. Nillertinnerani sikuaraluarpoq, pissanganarpoq taamanikkussamut qanoq isikkoqassanersoq.
Nalunaartut ikinnerusut
ACR-ertoqartillugu ujakkaartartut 230-t tungaanut peqataasarput. Maannamut peqataaniarlutik nalunaartut 120-130-llu akornanni nunatsinneersut pisarnermit ikinnerusut aaqqissuisut maluginiagaannut ilaavoq.
- Nunatsinninngaanniit piffissap taamaasinerani nalunaartut malunnartumik ikinnerupput. Sungiusarfissaqanginnerat, taanna peqqutaasut ilaginerpaassavaat, taavalu aamma piffissaq qanillitsiigaat, apissanersoq, taanna aamma ilimanarpoq peqqutaasinnaasoq, Jens Klaus Lennert oqarpoq.
Nunatta aputaasannera kianneruneralu ACR-ertussanut kisimi nalornisitsinngilaq. Silami ukiuunerani unammineq alla, Avannaata Qimussersua, aamma allannguiffiorataannaasoq siusinnerusukkut allaaseraarput.
Avannaata Qimussersuartussat assigalugit Arctic Circle Racemik aaqqissuisut neriuuteqarput.
Aput inniminnigarsi piffissaatillugu apuutissagunarpa?
- Nassiussat arriillinikuunermik. Nagu, Jens Klaus Lennert Sisimiormiuppallattumik ikasarluni taama naggasiivoq.
