Kalaallit isikkamik arsaattartuini oqaluttuarisaanermi pisoq: 22-nik ukiulik inuussutissarsiutigalugu arsaattartunngortoq

Danskit arsaattartut klubbiata FC Fredericiap 22-nik ukiulik Nemo Thomsen isumaqatigiissuteqarfigaa. Kalaallini siullersaalluni piffissami tamakkiisumi klubbimi arsaattartunngortoq nalunaarutigineqarpoq.

FC Fredericiap nittartakkamini sisamanngormat tamanna paasissutissiissutigaa, Nemo Thomsenillu isumaqatigiissuteqarnini nuannaarutigalugu oqaatigaa:

- Ulloq uannut ilaquttannullu pingaaruteqarpoq. Piffissami tamakkiisumi arsaattartutut isumaqatigiissut atsiorsinnaagakku nuannaarutigalugulu tulluusimaarutigaara, oqaluttuarisaanermilu kalaallini siullersaanera pingaaruteqaqaluni, Nemo Thomsen oqarpoq, nangipporlu:

- FC Fredericiamiilernera nuannaarutigeqaara. Klubbi pitsaalluinnartuuvoq, aaqqissuussaalluartoq avatangiiseqarissaartorlu. Ineriartorluarsinnaanera qularinngivippara.

FC Fredericia Nemo Thomsen Brabrand IF-imit, klubbi ilisimarisimaneqaqqaarfia, pisiarineqarsimasoq nalunaarpoq:

- Nemo sapaatip-akunnerata siuliani misiliilluni sungiusaqataavoq takutitsilluarlunilu. Kalaallit nunanut allanut unammisartuisa siuarsimasuat sæsonimi kingullermi CampoBet 2-mi ingerlalluareerluni Fredericiamukarpoq. Divisionimi Brabrand sinnerlugu aqqaneq-marloraarluni. Ukioq angusarissaarfiusoq, tassami Brabrand normu 10-nngorpoq, Nemo Thomsenilu holdip katillugit isertitaasa pingajorarterutaannik isertitsivoq, klubbi allappoq.

Nunanut allanut unammisartunut sungiusaasoq: Oqaluttuarisaanermi pingaarutilik

Kalaallit angutit arsaattartut nunanut allanut unammisartuisa sungiusaasuata Morten Rutkjærip Nemo Thomsenip piffissami tamakkiisumi inuussutissarsiutigalugu arsaattartunngornera, kalaallit isikkamik arsaannermi oqaluttuarisaanerannut ilannguttussaanerarpaa:

- Inuusuttumut arsaattartumut angusaannaanngilaq - kalaallit arsaattartuisa oqaluttuarisaaneranni pisuuvoq, nunanut allanut unammisartut sungiusaasuat allakkatigut nalunaaruteqarluni oqarpoq.

Nemo Thomsen Kalaallit Nunaanneersumik inuussutissarsiutigalugu unammisartunngortoqarsinnaaneranik timitaliisoq taassuma tikkuarpaa:

- Angusaata nunami inuusuttunut arsaattartunut arsaannermi pikkorinnerpaat akornanniilersinnaaneq takorluugaannanngitsoq takutippaa, tassa piviusumik periarfissaasoq.

Morten Rutkjær oqarneratut Nemo Thomsen kisimiinngilaq, kalaallimmi allat arsaattartut piukkunnartut aamma ingerlalluarput.

Nemo Mathias Mac Christiansen, Adam Ejler Hansen, Malik Jensen allallu peqatigalugit kalaallit arsaannerisa oqaluttuarisaaneranni kapitalimik nutaamik aallartitsipput. Kapitali isumalluarnartiq aatsaat aallartilaartoq, nunanut allanut unammisartunut sungiusaasoq oqarpoq, taassumalu siunissami ineriartortitsinissamut politikkikkut tapersersorneqarnissaq neriuutigalugu aamma oqaatigaa.