Danmarki, Norgi, Tysklandi, Poleni, Canada USA-lu.
Tusagassiortut nunanit taakkunanngaanneersut piffissami kingullermi kalaallinut qatanngutigiinnut Ukaleq aamma Sondre Slettemarkimik Italiap avannaanni ukiuunerani OL-ernissami, Danmarki sinnerlugu unamminissaat sioqqullugu saaffiginnittarput.
Danmarki, Norgi, Tysklandi, Poleni, Canada USA-lu.
Tusagassiortut nunanit taakkunanngaanneersut piffissami kingullermi kalaallinut qatanngutigiinnut Ukaleq aamma Sondre Slettemarkimik Italiap avannaanni ukiuunerani OL-ernissami, Danmarki sinnerlugu unamminissaat sioqqullugu saaffiginnittarput.
Sisoraaserlutik ooqattaartarnermi piginnaaneri pinnagit, Kalaallilli Nunaannit, piffissami matumani USA-p præsidentiata Donald Trumpip nunamik pisinissamik kissaateqarnerminik oqaatiginniffigisartagaaneersuunerat pillugu.
- Tusagassiorfinnit ullormut sisamat missaannik saaffigineqartarpugut, ullullu arlallit ullormut pingasut-sisamariarluta apersorneqartarpugut, Ukaleq Slettemark oqaluttuarpoq.
- Nukinik atuinartarpoq. Trumpi nunarsuarmilu politiki oqaluuserisimaqaarput, maannakkullu oqaatigineqartariaqartut oqaatigereerlutigit misigisimavugut. Angusagut OL-imilu ilimagisavut oqaloqatigiissutigiumaneruvagut. Taakku maanna sammisariaqarpagut.
Kalaallit Nunaata illersornissaa pingaaruteqartoq
Taakku oqaatigereerlugit, Trumpi USA-lu pillugit isummamik anitsinissaq, naalagaaffeqatigiinnullu ilaaginnarnissamik kissaatip oqaatiginissaa, timersortartutut periarfissaqarnerminni oqaasertalernissaa qatanngutigiinnut pingaaruteqarsimavoq.
- Kalaallit Nunaata illersornissaa, isummattalu ersarissuutinnissaat uatsinnut pingaaruteqarpoq. Amerikamiunut oqaatigissallugu tamanna pisariaqarsimavoq, Ukaleq Slettemark Trumpimut naaggaarluinnarnerminik oqarnini innersuussutigalugu oqarpoq.
- Periarfissaqartilluta nipitta anninnissaa pisussaaffigalugu misigisimavugut, Sondre Slettemark ilassusiivoq.
Ukiuunerani unammersuarnissamut piareersarnermut akornusiivallaaqqunagu, maanna apersorneqartarnerit tamaasa unitsippaat, taamaalilluni tamakku sungiusarnissamut akornuseeqqunagit.
- Timitsinnut sunniuteqanngilaq. Pisulli tamaasa eqqarsaatiginaveersaarnissaat ajornakusoorsimavoq, taamaammallu tarnikkut sunnerneqarpugut, maannakkulli ajunngilaq. Maanna OL sammineqassaaq, taanna erseqqissaavoq.
"Silaqanngissuaq”
Taamaalilluni qatanngutigiit unammersuarnerit nalaanni Kalaallit Nunaat USA-lu pillugit oqaaseqarnissaat ilimagineqassanngilaq.
- Tusagassiortut oqaloqatigisassavagut, tupaallannartuunngitsunilli, Sondre Slettemark oqarpoq.
Marluullutik naammattumik iliuuseqareerlutik misigisimapput. Assersuutigalugu Ukaleq Slettemarkip DR-imik apersorneqarnermini Trumpi “silaqanngitsorsuartut” taavaa.
Ilanngulluguli tusagassiortunik oqaloqateqartarnermik sungisarneqarsimanini oqaluttuaraa.
- Oqaatigisimasakka tamaasa aalajangiusimavakka. Qulequtanngortinneqarlutillu oqaaseqarfigineqartarput, taanna maanna OL-p pineqarnera innersuussutigalugu oqarpoq.
Taamaammallu qatanngutigiit OL-ertoqarnerani tusagassiorfinnut allanut oqaaseqarnermikkut ammaassimasaraluaminnik isummaminnik anitsinissaat naatsorsuutigineqassanngilaq.
Ataataminnit ingerlatitseqqinnertik tulluusimaarutigigaat
- Taamaaliussanngilagut, Ukaleq Slettemark erseqqissaavoq, Sondrelu ima ilassusiivoq:
- Arlaannik malunnartitsissalluta arlarput piffissap ilaani oqarpoq, malunnartitsinissarpulli anneq tassaassaaq Danmarkimik illersuinerput naalagaaffeqatigiillu sinnerlugit unammeqataanissarput.
Danmarks Idrætsforbundipt (DIF) unammersuarnerit nalaani qanorluunniit oqarsinnaaneranik kiffaanngissuseqartippai. Malitassiat naapertorlugit ammaanersiornerup ujamminillu agguaanerup nalaani qanoq oqaaseqarneq mianerineqassaaq, taakkulu avataani qanorluunniit oqaaseqarnissamut kiffaanngissusiliisoqarpoq, Ukaleq Slettemark nassuiaavoq.
Maannakkumiilli ukiuunerani OL-ernermi sammisaq, tassalu timersorneq, oqaaseqarfigerusunneruaat.
Pingaarnerpaatut ataataminnit Øystein Slettemarkimit, naalagaaffeqatigiit sinnerlugit 2010-mi unammisumit, ingerlatitseqqiinertik tulluusimaarutigaat, peqatigisaanillu timersornikkut anguniagaqarput, naak ujaminnanniunnermut akuusinnaannginnertik nalunngikkaluarlugu.
Sungisarluarsimajartortut
OL-eqqaartoq Sondre Slettemark nammineq oqarnermisut siornatulli sungiusarluarsimaneq suli angunngilaa, pitsanngoriartorporli.
- Sungiusarfimmiinnitsinni sungiusarsimanera pitsanngoriartorpoq, taamaammallu pitsaanerpaamiinnera takutissinnaallugu neriuppunga, naak unammisut affaanni kingullerniittuniinnissara ilimanaraluartoq.
Ukaleq Slettemark aallaavittut ukiut sisamat matuma siorna OL-eqqaarnerminut sanilliullugu pitsaanerusumik angusaqarnissamik anguniagaqarpoq.
- Angusariumaakkani unammisut sinneri aamma apeqqutaassapput, anguniaanissamullu aallaqataanissara immannguaq anguniarpara, tassungalu anngunnissami oqilaniunnermi siulliit 60-t akornanniinnissaq pisariaqarpoq.
- Ulloq eqqorluarutsigu uniornatalu quleriarluta aallaariarutta tamatsinnut tamanna pisinnaalluarpoq, Ukaleq Slettemark oqarpoq.
