Nunatsinni pissartanngorniunnermi semifinalit tamarmik naligiingajattumik unammiffiusut

Maniitsumi tallimanngornermi unnukkut isikkamik arsaannermik soqutiginnittunut aliikkutassaqartitsilluartoqarpoq. Semifinalertullu tamarmik sivitsuiffigineqarmata ajugaasussaq nassaariumallugu sivisunerusumik arsarnissaq pisariaqarpoq.

Pissartaanerminnik illersuisut, B-67 Nuummerssut unammersuarnermik aaqqissuisunik Aqissiamik unammipput. Rene Eriksen Petersenip strafferluni B-67 siuartippaa. Muminnerullu kingunitsianngua Henning Wind isiginnaartunut qimmaallaataaqisumik arsaq niaqummillugu isertitsinermigut akisivoq.

Nuummiillu unammiat arsarluarnerunerat arsaannerup sivitsorneqarnerani paasinarsivoq. Arsaannerup naammassilernerani Rene Eriksen Petersen marloriarluni isertitsinermigut unammineq 3-1-mik inerneqarpoq.

Unammineq pikkunartoq

IT-79 Nuummeersut G-44 Qeqertarsuarmeersut semifinalernerat suli naligiinnerusumik unammiffiuvoq. G-44 siuaqqaartuuvoq, unammisamik immikkoortuanni arsamik arsaarinnillutik isertitsinerminni, Gustav Kroghllu målmandip niui akulloqqullugit arsaq isertippaa.

Kingornalu IT-79 kukkunermik iluaqutserneqarput. G-44-p målmandiata Peter Berthelsenip arsaq isimmippaa, akeqqaminullu Qulutannguaq Tittusenimut tunniullugu. IT-79-mi siuttup tunissutisiani atorluarpaa målmandilu qulaallugu 1-1-mut isertitsilluni.

Arsaannerup nalinginnaasup minutsiini kingullerni marloriarluni isertitsisoqaqqippoq. Gustav Krog G-44-meersoq siulliulluni isertitsivoq. Kingornalu Rene Poulsenip teknikigissaarnini frisparkerluni toqqaannartumik isertitsinermigut takutippaa, taamaalillunilu unammineq sivitsorneqarpoq.

Minutsini 120-ni unammereernermi suli 2-2-qqapput, taamaammallu uammineq straffeqattaarnikkut aalajangerneqartussanngorpoq. Tamannalu målmandimut Peter Berthelsenimut siusinnerusukkut kukkunerminik aaqqiinissamut periarfissiivoq. Marloriarluni annaassineratigut G-44 ajugaavoq, unamminerullu kingorna arsaqatiminit kivittarneqarpoq.

Finalimut piareertut

Arfininngorpallu finalertoqassaaq, unamminerlu KNR-p aallakaatissavaa. Siullermik Aqissiaq IT-79-lu nalunaaqutaq marlunut bronzenanniutissapput, kingornalu B-67-p G-44-llu akornanni nal. 16.00 pissartanngorniunneq aalajangerneqassaaq.