Nuummi majuartaat mikineq ammartoq

Ukioq aputissaaleqiffioreersoq, utaqqinermik pakatsinermillu atuiffioreersorlu utaqqisaq kiisami nalliuppoq. Qaqqami sisorartoqarsinnanngorpoq.

Nuummiorpassuarnut Sisorarfiit sisorarfiinnaanngilaq – ilaqutariit, ikinngutit silamiullu naapiuffiusarpoq. Taamaattumik ingerlatsinermut pisortap Qulu Heilmannip kiisami sisorarianik tikilluaqqusisinnaalernernini nuannaarutiginninnera paasiuminarpoq.

– Kiisami majuartaat 25/26-mi ammassaaq. Aatsaat taama kingusitsigisumik ammarpoq. Naluneqanngitsutut ukioq manna aputissaaleqivugut, tamannalu Sisorarfinni sisorarnermut ukiukkullu inuunermut sunniuteqarsimammat, ilaqutariit, sisorartartut pisuttuartartullu ukiukkut naapeqatigiittarfiannut sunniuteqarpoq, taanna oqarpoq.

Ammarnissaanut ulappussimasut

Majuartaat soorunami ukioq manna aamma ammarpoq. Majuartaatipp ukioq manna ammarnissaa ulapputaasimaqaaq.

– Nuannaarutigeqaarput kiisami majuartaat ammarneqarsinnaammat. Kisianni majuartaatip mikisup kisimi ingerlanissaa pilersaarutaavoq. Aputilersorneqarpoq – akunnerpassuarni maskiina atorlugu suliarisimavarput. Maannakkut illiniliuut atorsinnaanngorpoq, kisianni aqqut amilluni, Qulu Heilmann nassuiaavoq.

Taamaattumik sisorariat eqqumaffiginnittariaqarput. Ukiut ilaanni sila pitsaanerpaajunngikkaluartoq, periarfissaqarpoq – tamannalu pingaaruteqarpoq.

Sisorarfiinnaanngitsoq

Naak majuartaat mikisoq 400 meteriinnarnik takissuseqaraluartoq ammarnera aamma allamik pissuteqarpoq: Uumassuseqaqqilersitsisarpoq. Sapaatit akunnerisa naanerini kingullerni sisorarneq killeqartorujussuuvoq, cafeteria ammavoq, kisianni sisorartoqarsinnaanngimmat nuannisarneq killeqarpoq.

– Sapaatit-akunnerisa naanerini sisamani kingullerni cafeteria ammatinnikuuaarput ulluinnarnilu matoqqasarluni. Maanna kiisami ulluinnarni majuartaat ingerlatillugu ammatissinnaanngorparput. Sisorartartut ukioq naallugu maqaasisimasavut naapinnissaat qilanaaraarput. Aamma nuannaarutigaarput maani sammisassaqaqqilermat. Taamaammat ilassiartortigut, qungujulalluni oqarpoq.

Inuppassuimmi qaqqakkut pisuttuarneq ataatsimoorfigisarpaat — kissartutorneq, illaqattaarneq ukiumilu sivisuumik ataatsimoorsimanani takormaaneq.

Ukiumi issittumi alloriarnerit annikitsut

Quassussuup aputeqannginnera silarluttarsimaneralu pissutigalugit majuartaat angisooq ammarneqarsinnaanersoq suli nalornissutigineqarpoq. Taamaakkaluartoq ullumikkut ammaanersiorneq immikkut ittuuvoq. Naak majuartaat mikisuaraagaluarluni sisorarfillu takinngikkaluartoq, tamanna ukiumi unammillernartuusimagaluartumi allannguutaavoq.

Ukioq manna immaqa inuppassuit neriuutigisimasaattut issinngilaq, aallartinneruvorli. Nuummilu naammappoq.