Pakatsisoqartoq aamma suli neriuuteqartoqartoq

Nunatsinni arsaatillammassuit pingasut, Patrick O. Frederiksen, Søren Kreutzmann aamma Niels-Erik Eriksen Sermitsiamiit tusarniaaffiginikuuagut angutit nunarsuarmi isikkamik arsaallutik unammersuarnerat aallartimmat kikkut illersussaneraat.

Portugal unammersuarnermiit angerlartitaammat pakatsisoqarpoq, Tuluit tupaallaatigineqarput kiisalu Argentina pissartanngorsinnaasoq suli upperineqarpoq.

Patrick O. Frederiksen

Illersukkatit Portugalikkut VM-imi ilaajunnaarput, qanoq misigisimavit?

- Asuki, tassa timersorneq taamaattarpoq, allatut ajornaqaaq. Pikkunaatsoornarpoq soorunami, kisianni tassa arsarneq taamaappoq, Patrick O. Frederiksen oqarpoq.

Ronaldo immaqa VM-ertoq takoqqinnavianngilarput, illit qanoq qujaffigissagaluarpiuk imaluunniit oqarfigissagaluarpiuk?

- Tassami, immaqa ukua arsaaffiup iluani takutinnikuusai angunikuusaalu, taakkua nuannertut aamma isumassarsiorfigineqarsinnaasut pillugit, arsarnerup iluani aqutsisinnaanera, piumassusaa sukataartarneralu, taakkua nuannertorujussuusut isiginnaarlugit oqarfigissagaluarpara, Patrick O. Frederiksen oqarpoq.

Massakkumut kikkut ilimagivigit pissartanngorsinnaassasut?

- Suli franskit ilimagisinnaavakka. Franskit taakkua aamma pitsaanermut sukkanermullu, ilimagisinnaavakka taakkua ajugaasinnaassasut, Patrick O. Frederiksen oqarpoq.

Taava massakkut franskit illersugarilerpigit?

- Asuki, naamik eqqarsaatiginngilaraluunniit suli, kisianni taakkua ilimagipajaarsinnaavakka ajugaassasut, Patrick O. Frederiksen oqarpoq.

VM-rtoqarnerani suna tupaallannarnerpaatut maluginiarpiuk?

- Ukua iligiit mikinerit VM-imi peqataaqqaartut amerlasuut, taakkua angusarissaarnerat tupaallaatigaara. Immaqa oqaraanni unammisaat pappialatigut pitsaanerugaluarlutik unammineq naligiittut iserfigisarlugu ingerlapput, taava arsaaffiup iluani takutitaat qiviaannaraanni, sinnattoqaraanni tassa angusaqartoqarsinnaasoq takutippaat, Patrick O. Frederiksen oqarpoq.

Niels-Erik Eriksen

Nunarsuarmi Isikkamik Arsaallutik pissartanngorniuttut aallartimmata tusarparput Niels-Erik Eriksennip illersugarigai Argentinakkut.

Marlunngornermi kvart-finalimi Argentinap Egyptini unammimmatigit isiginnaartut pingaartumik Argentinamik illersuisut pissangasimassapput, unamminermimi Argentina isertitsinernik marlunnik kinguarsimaleraluarmata. Niels-Erik Eriksen pissangasunut ilaasimavoq.

- Tassa pissangaleraluarpunga, kisianni Argentinakkut ajugaassasut ilimagereerpara. Niels-Erik Eriksen oqarpoq.

Argentinakkut nunarsuarmi pissartanngoqqinnissaat neriuutigineraa Sermitsiamiit aperivarput.

- Tassa taamaattariaqarpoq, Niels-Erik Eriksen naggasiivoq.

Søren Kreutzmann

VM massakkumut ingerlanera qanoq nalilersinnaaviuk?

- Maannakkumut nalilissagukku ilimagisakka ingerlalluarput. Kisianni franskit ilimagineruakka, Portugalikkut ilimagisattut ingerlalluanngillat, Søren Kreutzmann oqarpoq.

- Soorunami neriuutigaara illersukkakka tuluit ajugaassasut. Tupaallaatigaakka, tupaallannartorujussuuvoq massakkumut angusaat, isumalluarfigilerpakka, Søren Kreutzmann akivoq.

Kikkut VM-imi massakkumut finalertussatut ilimagivigit?

- Argentina ingerlalluaqaaq, eqqoriarsinnaavara Frankrig aamma Argentina finaalissasut.

Massakkumut VM-ip ingerlanerani kikkut tupaallaatiginerpaavigit?

- Cape Verde, afrikap avataani qeqertaneersut isiginnaartarnerini, eqimattaniit ingerlaqqillutik unammineri tupaallaatigaakka. Pikkorinnerpaanut unammigaluarlutik takutitsilluarnerat, apersorneqarnerminnilu uummatigissoorpasissumik oqaluttarnerat nuannaraakka. Taamatuttaarlu Japan kusanartumik uummateqarlutik saqqummertarmata nuannareqaakka, Søren Kreutzmann naggaasivoq.