Piginnaanillit ukioq manna katersuutsinneqarnerat kingulleq

Kalaallit assammik arsartartut Danmarkimi najugallit ukioq manna sungiusarnertik kingulleq, Nyborgimi timersortarfissuarmi ingerlappaat.

Katersuutsinneqartarnerat 2025-mi Vissenbjergimi, Fredericiami, Gudmemi, GOG-mi arfininngornermallu Nyborgimi aaqqissuunneqartarput. Katersuutsinneqartarnerat siorna aallartinneqarpoq.

Nukappissat nivissallu 24-t Nyborgimut peqataajartorsimapput. Sungiusaasullu pingasut tassaasut Kathrine Mikkelsen, Bent Møller aamma Rasmus Larsen sungiusaasooqqipput. Tamatigut pisarnertut angajoqqaanik naammagisimaarinnittunik isiginnaariartoqarpoq. Sungiusarluni katersuunnermi kingullertut nukappiaqqat sungiusaatigalugu, EVN Efterskolemi Nyborgimiittumi holdinut pitsaasunut unammipput. Sungiusaammik unamminermi taamaattumi inernera annerusumik pingaaruteqanngilaq.

Kalaallilli nukappiaqqat unamminerminni aallaqqaammut ajornartorsiuteqaraluarlutik ajugaapput. Efterskolemi unammisartut nunanut allanut unammisartumit GOG-milu arsartartumit Keld Vilhelmsenimit sungiusarneqarput. Kalaallit nukappiaqqat sungiusaatigalugu unammisut, Nyborghallen arfininngormat angerlarsimattut atorpaat, tassanilu kissasserneranni kalaallisut nipilersukkanik tusarnaartoqarluni.

Angisuunik takorluugaqarneq

Niviarsiaqqat nukappiaqqallu amerlasuut angisuunik takorluugaqarput. Timersortarnertik angusaqarfigerusuppaat, sapinngisamillu pitsaanerpaamik sungiusarusuttarlutik. Aamma TAAK-p, Timersoqatigiiffiit Assammik Arsartartut Kattuffiata katersuunnernik taamaattunik aaqqissuussisarnera naammagisimaarneqaqaaq.

Maja Spaanhede 15-inik ukiulik aamma Lars Jeremiassen 18-inik ukiulik oqaloqatigivavut.

Maja Ilulissani inunngorpoq. Arfineq-pingasunik ukioqarluni Nuummut nuuppoq 2022-milu Danmarkimut nuulluni. Sjællandimi U15-ini pitsaanerpaat akornanni TIK Vallensbækimi assammik arsartarpoq. Majap timersoqatigiiffini sungiusaasunilu nuannaarutigeqai.

- Sapaatip akunneranut pingasoriarlunga assammik arsarnermik sungiusartarpunga. Sapaatip akunneranut ataasiarlunga ullaakkut sungiusartarpunga aamma soorunami nukkassartarlunga, Maja oqaluttuarpoq, taannalu assammik arsartarnermi saniatigut aamma isikkamik arsaannissaminut piffissaqartarluni.

Kalaallit unammisartut allat sungiusaqatigisarnerat immikkut ittuuvoq.

- Kalaallinik allanik takusaqartarneq, kalaallisut oqalunneq kalaallinillu Nunatsinni ilisarisimasannik sungiusaqateqarneq nuanneqaaq.

18-inik ukiulik Lars Jeremiassen Nuummeersuuvoq. Qaqortumi inunngorpoq. Nuummi GSS sinnerlugu unammisartuuvoq. Lars aggustimiilli Ikastimi timersornermut højskolimi ilinniartuuvoq, maannalu Ikast FS-imi U19-ini 1. divisionimi unammisartuulluni. Lars siullermeerluni piginnaasalinnik sungiusaanermut peqataavoq.

- Maaniinnerput nuanneqaaq, oqaloqatigiinnerput aallarnerlugu Lars taama aallartippoq:

- Ikastimi sungiusangaatsiartarpunga. Timersoqatigiiffimmi sapaatip akunneranut pingasoriarluta sungiusartarpugut, marloriarluta ilinniarfitsinni aamma soorunami nukkassartarluta.

Ikastimi sungiusartarneq GSS-imilu sungiusartarneq assigiinngissuteqartorujussuusut, Lars isumaqarpoq.

- Danmarkimi ilungersunarnerusarpoq. Timikkut ilungersunarnerullunilu unamminerit sakkortunerusarput, angusaqarumallunilu nukippassuit atortariaqartarlutik. GSS-imi periaatsinik sungiusarnerusarpugut.

Lars neriuppoq ima pikkoritsigilissalluni, timersoqatigiiffiit ilaasa unammisartuminnut ilanngutsikkusussinnaassagaanni.

- Inuussutissarsiutigalugu assammik arsartartunngornissara takorluugaraara. Ajornanngippat Danmarkip avataani, immaqa aallaqqaammut Savalimmiuni, Lars oqaloqatigiinnitsinni naggasiilluni taama oqarpoq.

Ikastimi timersornermut højskolimi kalaallit ilinniartuusut sisamat, Nyborgimi katersuunnermi tamarmik peqataapput.

Suliniut ingerlaannassasoq

Kalaallit assammik arsartartut piukkunnartut, arlaannik pissuteqartumik Danmarkimiittut, sungiusaatigalugu 2026-mi aamma katersuutsinneqassapput.