Ujakkaartartut aasaanerani Sisimiuni sungiusarnerat

Sisorartartut Kattuffiata ataani Ujakkaarnermut Ataatsimiititaliaq Sisimiuni ujakkaartarfimmi iluatsilluartumik sungiusarnermi katersuunnermik sapaatip-akunnerani ingerlanneqartumi aaqqissuussivoq. Sungiusaanermut peqataasut amerlanerulernissaat, ujakkaartartullu ineriartortinneqarnissaat, aamma sungiusarnerup nuannernerulernissaa siunertaavoq.

Peqataasut ullormut marloriarlutik sungiusartarput, nunakkut arpanneq, rulleski, sivisuumik sungiusarnissaq, qaqqakkut pisunneq rulleskimillu unamminermi misiliineq matumani sammineqarput.

Taamatut tusagassiutitigut Kalaallit Nunaanni Sisorartartut Kattuffiat, nalunaaruteqarpoq.

- Pitsaanerit kisiisa pinnagit, siammasissumik ukkatarinninnissaq pingaaruteqarluinnarpoq. Ujakkaarneq inerisarusupparput, tamanullu assigiimmik periarfisseerusulluta. Katerinneq manna iluatsilluarpoq, tamannalu timersornerup tamarmiusup suliniuteqarnitsinni eqqarsaatiginissaa qanoq pingaaruteqartigineranut ersiutaavoq, AU-mi siulittaasoq Flemming Enequist oqarpoq.

Nuna tamakkerlugu sungiusaasoq Martin Møller siuttoralugu Majaq Heilmann aamma Nivika Lange Lyberth sungiusaasumut ikiorsiullugit sungiusarneq ingerlanneqarpoq.

Martin Møllerip kalaallit ujakkaartartut aasaanerani sungiusartarnerisa pitsaasumik ineriartorsimanera erseqqissarpaa:

- Katersuunneq pitsaalluinnarpoq, sungiusarnerpassuillu amerlasuut piumassuseqarluartunik peqataaffigineqarput. Aasaanerani sungiusarnerit siornatigut taama ukkatarineqartiginngillat, ujakkaartartullu ukioq kaajallallugu sungiusartarnerat maannakkut malugisinnaavarput. Taamatut kultoreqarnerput pilersinneqaleruttorpoq, tamannalu timersuummut ineriartortitsinissamut pitsaasumik iluaqutaavoq, oqarpoq.