VM-imut anngunniunnissamut piareersarnerit aallartipput

VM-imut peqataanissamik kingumut takorluugaqaraanni, piviusunngornissaa anguniarlugu qaammatini tulliuttuni sungiusartariaqarpoq, sungiusartuartariaqarpoq sungiusaqattaartuartariaqarlunilu.

Fynimi Tommerup Hallernemi ukiakkut sungiusarneq siulleq marlunngornermi ullaap tungaani aallartippoq. Kalaallit unammisartut unnuaammat Københavnimut tikipput. Unammisartut 18-iupput, holdleder Aviaaja Rosing Petersen, fysioterapeut Ninna Haarbo aamma sungiusaasut marluk Jakob Larsen aamma Kim O. Petersen. Målmandinik sungiusaasoq Ulrik Winther sisamanngorpat peqataassaaq.

Pilersaarut pitsaasoq

Nunanut allanut unammisartunut sungiusaasup ikiortaata Kim O. Petersenip uatsinnit oqaloqatigineqarnermini isertuutinngilaa maannamiit Canadami anngunniunnissamut piareersarnerit pitsaanerpaajusut.

- Qujanartumik ukiut siuliiniit amerlanerusunik katerittarpugut, tamannalu soorunami pitsaasorujussuuvoq, minnerunngitsumik kajumilersitsissutaammat.

- Tommerup Hallerne-mi sapaatip akunnera naallugu sungiusartassaagut. Tassani nukkassarnermik sungiusaasoqarpoq naluttarfiullunilu. Eqimattanut unammisartunut nukittuunut marlunnut sungiusaammik unammissaagut. Gudenåcenteret-imi Tørringimiittumi HH Elite Håndboldligaen-imeersoq tallimanngorneq nalunaaqutaq 18.00 unammissavarput, GOG Arena-mi Gudmemiittumi GOG Dame Elite 1. division-imi sapaammi nalunaaqutaq 10.30 unammisussaapput, taakku Danmarkimi pitsaanerpaat tulleraat.

Nuummi sungiusarluni sapaatip akunnerani 39-mi unammisoqassaaq. Neriuutitsitut pisoqassappat sapaatip akunnerani 43-mi Parisimi USA-mut Canadamullu unammisoqassaaq.

Akeqqat pitsaasut

Canadami anngunniunnermi unammisussat kikkuussanersut suli ilisimaneqanngilaq. Sungiusaasut unammisartullu unammisartut taakku ilisimalluarpaat. USA aamma Canada eqqaaneqarput, aammali Puerto Rico, Mexico, Cuba aamma Dominikanske Republik peqataanissaat naatsorsuutigineqarsinnaapput.

- Unammineq ilungersunarluinnartoq nalunngikkaluarlugu, soorunami neriulluarpugut, unammiuaarnermilu ajugaanissarput anguniagaraarput, Kim O Petersen oqarpoq.

Takorluugaq suli piviusuuvoq

34-nik ukiullip Najaaja Lyberth Heilmannip VM-imi unammeqataanissaq annertuumi takorluugaraa.

Najajap ernini marluk sungiusarnermut ilagai.

- Soorunami peqataanerat nuanneqaaq, aamma nunarsuarmi pissartanngorniunnissamut anngunniunnermi peqataanissannut ukiorpassuarni takorluukkama piviusunngortinnissaa nuannaarutigeqaara, Najaaja qiimmattartilluni oqarpoq.

- Kalaallit Nunaat 2023-mi kingullermik peqataammat, peqataasussaagaluarpunga, ernisussaagamali peqataasinnaanngilanga.

- Unammisartuvut nuannareqaakka, unammisartuuvugut pikkorissut, qujanartumik suulluunniit allat assigalugit sungiusartarnivut amerliartortillugit pitsaaneruleriartorpugut.

Nunanut allanut unammisartut aqqaneq-marluk Kalaallit Nunaanni unammisarput, tallimat Danmarkimi ataaserlu Islandimi.

Arsaattartut arlallit Danmarkimi Savalimmiunilu klubbinit neqeroorfigineqarsimapput.