Kuannersuarni aatsitassarsiorfik: Namminersorlutik oqartussat sukkasuumik akissuteqarnissaat ilimagaarput

Australiamiut aatsitassarsiortitseqatigiiffiat Energy Transition Minerals nunatsinni ingerlatseqatigiiffik pigisartik aqqutigalugu, eqqunngitsumik toqqammaveqartumik Kuannersuarmi qalluisinnaanermut akuersissummik itigartinneqarsimanermik isumaqarnertik pissutigalugu Kalaallit Nunaannik suliassanngortitsisut, danskit naalakkersuisuinik suliassanngortitsinertik tunuartinniarpaat. 

Taamaalilluni suliaq taamaallaat Nunatta Eqqartuussiviani ingerlanneqassaaq.

Aatsitassarsiorfik iluarisimaarinnittoq 

Aatsitassarsiorfik naapertorlugu isumaqatigiissitsiniartarnermut eqqartuussivimmi Københavns Byretimilu aalajangiinerit suliap eqqartuussivitsigut qanoq ingerlanissaanik ersarissisitsimmata alloriarneq tamanna tiguneqassaaq. 

"Isumaqatigiissitsiniartarnermi eqqartuussiviup Københavns Byretimilu ersarissaaneq iluarisimaartorujussuuarput, maannalu taakku malitassiaat naapertorlugit iliuuseqarpugut. Ingerlatsinermi aporfinnik kingullernik iliuuseqarasuarluta iliornitsigut, suliap maanna Nunatta Eqqartuussiviani ingerlaqqissinnaaneranut ilapittuuteqarpugut. Alloriarneq tamanna pissusissamisoorpoq,” 

ETM-mi pisortaq Daniel Mamadou tusagassiuutinut nalunaarummi allappoq, tassanilu aamma ”oqartussat ukiuni arlalinni tunngavilersuutissaminnik piareersarnissamut periarfissaqarsimammata” sukkasuumik akissuteqaammik allakkiornissaat aatsitassarsiorfiup oqaatigaa. 

Danskit naalagaaffiat suliamut attuumassuteqanngilaq 

Aatsitassarsiorfiup oqaatigisaanik kingullernik saqqummiivigineqarluni namminersorlutik oqartussat suliap Danmarkimi ingerlanneqarnani Kalaallit Nunaanni ingerlanneqarnissaanik isumaqartuarsimanerat, Inuussutissarsiornermut, Aatsitassanut, Nukissiuutinut, Inatsisit atuutsinneqarnerannut Naligiissitaanermullu Naalakkersuisup Naaja H. Nathanielsenip (IA) oqaatigaa. – Tamanna eqqortumik iliuusissatuaavoq. Danskit naalakkersuisui arlaannaatigulluunniit suliami kalaallit inatsisaannik Inatsisartut oqartussaaffimmi tiguneqarsimasumi akuerisaanni, inatsisillu Naalakkersuisunit attuutsinneqarneranni attuumassuteqartuusinnaanngillat. Naalakkersuisut suliap ingerlanneqarnera tamakkerlugu tunngavilersuutivut aalajangiusimavagut.

Qalluinissamik akuersissummik itigartinneqartut 

Aatsitassarsiorfik naapertorlugu taakku Kuannersuarni suliniutaanni qalluinissamik akuersissut itigartinneqarpoq, 2021-milu uranimik inatsisip akuerineqarnerata malitsigisaanik inatsisit unioqqutillugit unitsinneqarluni.

AAMMA ATUARUK

Naalakkersuisut: Ingerlatseqatigiiffiup Kuannersuarni suliniuteqartup saassussinera isasoorpoq

Aatsitassarsiorfik qalluinissamut akuersissummik tunineqarnissaminik inatsisitigut qulakkiigaasoq, taamatullu urani pillugu inatsit taakku ujarlernissamut akuersissutaannut tunngatillugu atorsinnaanngitsoq, eqqartuussivimmut suliassanngortitsinermi allassimavoq.

Taamattaaq Naalakkersuisut qalluinissamik qinnuteqaammik siusinnerusukkut itigartitsinerat atortussaanngitsoq aatsitassarsiortitseqatigiiffillu qalluinissamut akuerissummik tunineqanngippat taarsiivigineqarsinnaatitaasoq, taakku isumaqarput.

Iliuusissaarulluni sunniiniarneq 

Aatsitassarsiorfiup qalluinissamik akuersissummik tunineqarnissamut inatsisitigut pisinnaatitaaffeqarnera Naalakkersuisut isumaqatiginngilluinnarpaat.

– Greenland Minerals A/S qalluinissamut akuersissummik inatsisitigut pisinnaatitaanngilaq, qalluinissamut akuersissummik qinnuteqaataat eqqortumik suliarineqarpoq, uranilu pillugu inatsit aamma taakkununnga atuuppoq. Ingerlatseqatigiiffik piginnittoq sapaatit akunnerini makkunani oqariartuuterpassuaqarpoq, taakkulu iliuusissaarulluni sunniiniarnertut isigaakka. Isumaqarpunga eqqartuussiviit sulisissagivut, suliarlu ataqqillugu. Suliarmi tusagassiuutini aalajangiivigineqarnani eqqartuussivinni aalajangiivigineqartussaavoq, maannalu piffissami kingullerni aalajangiinerit Naalakkersuisunut iluaqutsiinerat ETM-p paasiartulerpasippaa, Naaja H. Nathanielsen oqarpoq.

ETM tusagassiortunut nalunaarutiminni kingullermi kalaallit danskillu politikeriinik oqartussaasuinillu siunnerfeqarluartumik ”oqimaaqatigiissumik aaqqissuteqarnissaq, illuatungeriinnut tamanut ersarissasoq, Kalaallillu Nunaannut ungasissumut sammisumik nalilinnik pilersitsisumik” oqaloqateqartarnissap nanginneqarnissaa sulissutigalugu allapput. 

Greenland Minerals/Energy Transition Mineralsip Namminersorlutillu oqartussat akunneranni suliami ullut eqqartuussivissat suli aalajangersaavigineqanngillat.