- Suliap kinguartinneqaqattaarnera ajorluinnarpoq. Inuit pisinnaatitaaffiinik unioqqutitsinerusoq apeqquserneqarsinnaangilaq.
Inger Platou, 1970-ikkunni arnat akuersiteqqaarnagit spiralilerneqartut ilaat, oqarpoq.
- Suliap kinguartinneqaqattaarnera ajorluinnarpoq. Inuit pisinnaatitaaffiinik unioqqutitsinerusoq apeqquserneqarsinnaangilaq.
Inger Platou, 1970-ikkunni arnat akuersiteqqaarnagit spiralilerneqartut ilaat, oqarpoq.
Donald Trumpip nunarsuarmi politikkikkut pissutsinik ukiup aallartinnerani aaqqiagiinngisitsinerata nalaani arnat oqaaseqarnissaminnut mianersornerusimasut oqarpoq.
Nalunaarusiarli inuit pisinnaatitaaffiinik unioqqutitsisoqarsimaneranik qulaajaaffiusup kinguaattoornera pillugu qisuariaatini pillugit oqaaseqarusuppoq.
Misissuineq Naalakkersuisuit siorna aggustimi suliakkiunneqarpoq, Muté B. Egedep spiralilersuinikuuneq inuiannik toqoraanertut taareeraalu qaammatit arfineq-pingasut qaangiuttut. Qallunaallu ministeriunerata Mette Frederiksenip eqqugaasunut utoqqatsernissaanut qaammat ataaseq sioqqullugu.
Apeqquserneqartariaqanngikkaluarpoq
70-inik ukiulik Inger Platou Katuami Nuummiittumi septembarip naanerani utoqqatserfigineqaramik peqataavoq.
20-nik ukioqarluni annikitsumik suliarineqarnermini spiralilerneqarpoq. Suliaritereerluni iterami naartunaveersaaserneqarsimanini aatsaat paasivaa.
- Taamani inuusunnermik eqqarsaatigeqqinngilara, oqaluttuarpoq.
Inger Platou danskit naalakkersuisuinit utoqqatserfigineqarnini pingaartingaaraluarlugu suliap inaarutaasumik naammassineqarnissaa qilanaaraa.
- Arnat tamatta taamaakkunarpugut. Misigissutsigummi pineqarput, oqarpoq.
Inger Platou inuit pisinnaatitaaffiinik unioqqutitsisoqarsimanersoq unioqqutitsisoqarsimannginnersorluunniit apeqquserneqartariaqanngitsoq isumaqarpoq, taamaattumillu nalunaarusiap utaqqisariaqarnera pakatsinarluinnarpoq.
- Inuit taamatut pineqarpata, soorlu arnat apereqqaarnagit akuersiteqqaarnagilluunniit taamaaliorneqarnerattut, inuit pisinnaatitaaffiinik unioqqutitsinertut isigaara, oqarpoq.
- Maanna danskit naalakkersuisui utoqqatsereerput. Taava nalunaarusiaq naammassineqassaaq. Arnat qamuuna eqqissiniassammata oqallisigineqaqqinnanilu kinguartinneqaqqissanngitsoq neriuppunga.
