Atassut ataatsimeersualersoq - siulittaasussamik sassartoqartoq

Atassut ileqquusumik ataatsimeersuartussanngorpoq. Tamanna Nuummi arfininngornermi oktobarip 31-ani pissasoq, partiip allattoqarfia ilisimatitsivoq.

Partiip 2019-miilli siulittaasua, Aqqalu C. Jerimiassen, suli siulittaasuunerminik naammatsinngilaq. Tamanna taassuma nammineerluni Facebookkimini ataasinngornermi allaaseraa. 

- Siulittaasumut sassaqqissallunga nalunaarutigereersinnaavara, suli suliassaqartutut misigisimagama naammassisariaqakkannik, Aqqalu C. Jerimiassen allappoq.

AAMMA ATUARUK:

Atassut naalakkersuisoqataaginnassanerluni isummissasoq

Naalakkersuisoqataaneq aalajangiiffigineqassasoq

Atassut naalakkersuisoqatigiinnut maanna peqataavoq. Inatsisartunut ilaasortat marluupput. Aqqalu C. Jerimiassen aamma Bentiaraq Ottosen. Maritha Broberg partii sinnerlugu Isumaginninnermut, Suliffeqarnermut Ilaqutariinnut Nunamullu Namminermut Naalakkersuisuuvoq.

Partiip Inatsisartuni upernaaq manna siunnersuutai arlallit naalakkersuisoqataasa isornartorsiorsinnarlugit itigartittarpaat. Taakkua soorlu Illorsuit inoqaleqqinnissaanut akileraarutillu ilanngaatitaqanngitsumik 30 procentiinnanngornissaanut tunngassuteqarput. 

Partii naalakkersuisoqataaginnassanersoq qaammatit ataatsip missaa qaangiuppat ersarissumik nalunarunnaassaaq. Partiimmi aallartitai, tunuliaqutaasut, naalakkersuisoqataaginnassanerlutik ataatsimeersuarnermi oqaluuserissagaat, Aqqalu C. Jerimiassen Sermitsiamut aasaq juunip 15-ni oqarpoq.

 - Atassut oktobarip naanerani novembarillu aallartilaarnerani ataatsimeersuartussaavoq. Naalakkersuisoqataaneq tassani aamma qaqinneqarumaarpoq. Atassutip aallartitai taakkuujumaarput pingaarnerpaamik aalajangiisussat qanoq ingerlariaqqittoqarumaarnersoq.

AAMMA ATUARUK:

Atassut naalakkersuisoqatiminit isumaqatigineqanngitsoq

Maannakkut ingiaqataanissi akuersaarallarneranut ataatsimiititaliani akisussaaffilerujussuarni, soorlu aningaasaqarnermut aamma aalisarnermut ataatsimiititaliani siulittaasuuffeqarnersi naalakkersuisoqataaginnarnissinnut tunngavileeqataappat?

- Annerusumik oqimaalutarineqarsinnaanngillat taakkua. Siulittaasuuneq taamaallaat akisussaaffimmik annertuumik tunniussaqaannartarpoq pissaaniliinermik annerusumik tunniussineq ajorpoq. Isumaqanngilanga taakkua toqqammavigalugit naalakkersuisoqataanerput iluatigalugu pigipput, partiip siulittaasua juunip 15-ani oqarpoq.

Naalakkersuisoqatitik isorigaat

Atassut Inatsisartuni naalakkersuisoqatiminit akerlilerneqaannarani naalakkersuisoqatiminik nammineq aamma ukioq manna akerliliisareerpoq. 

Naalakkersuisunut ilaasortaasimasoq, Folketingemut maanna ilaasortaq, Naaja H. Nathanielsen (IA), aamma Peqqissutsimut Inunnullu Innarluutilinnut Naalakkersuisoq, Anna Wangenheim (D), Folketingemut ukioq qinersinissamut atatillugu qinigassanngortinnerat partiip sakkortuumik isornartorsiorpaat. Tamannali naalakkersuisoqataajunnaarnerannik kinguneqarnikuunngilaq. 

Atassutip taama isornartorsiuinerata kingorna, upernaakkut ataatsimiinneq aallartimmat, partiip ilaasortaatitai Inatsisartut ataatsimiititaliaanni inissanik amerlasuunik pissarsipput.